142. schadźowanku w Budyskej „Krónje“ swjećili

Budyšin (jb/SN). Kaž kóžde lěto je tež sobotu wječor zaso tójšto Serbow do Budyšina přichwatało, tak zo bě „Króna“ nimale hač na poslednje městno wobsadźena. Zdypkom w sedmich wukopa so hnydom prěnje potajnstwo, jako stupi­štaj Christoph Cyž z Prěčec a Krystof Cyž z Jawory na jewišćo. Młodostnaj staj program suwerenje a lóštnje moderěrowałoj a připowědźištaj hnydom na spočatku jedyn z wjerškow wječora. 1. serbska kulturna brigada předstaji scenu z opery „Insalata Italiana“. Běše to spěwarsce kaž tež dźiwadźelnisce wuběrny wukon wšěch čłonow, za kotryž žnějachu sylny přiklesk. Po tutym wulkotnym zazběhu wabješe studentske towarstwo Sorabija Lipsk za swoje 300. narodniny w decembru a wosta tež hnydom na jewišću. Wosebje w satiriskim naprašowanju kaž tež slědowacej diskusiji, štož zahrachu jako skeč, su iniciatiwnu skupinu Serbski sejm zdźěla chětro kritizowali.