925 wopytowarjow je lětsa štyrnaće nazymskich koncertow dožiwiło
Budyšin (SN/CoR). Z poslednim nazymskim koncertom minjeny tydźeń w Pančicach-Kukowje je so lětuši hudźbny rjad z lajskimi ćělesami za publikum skónčił. Hłownu organizatorku Mariju Swierczekowu pak wotličenja jězbnych wudawkow, honorarow a GEMA-popłatkow hišće chwilku zaběraja. Najwjace z dohromady 14 koncertow je sama dožiwiła, a jeje facit je pozitiwny. „Sym spokojom. Wšudźe bě jara dobra atmosfera. Wšitke cyłki su so jara prócowali a připosłucharjam swoje najlěpše dali“, je wona přeswědčena. Wosebje so wjeseli, zo bě młodźina lětsa z 1. serbskej kulturnej brigadu kaž tež z rejwanskej skupinu, z dźěćacym chórom a instrumentalistami Budyskeho Serbskeho gymnazija sylnje zastupjena. Tež dorostowa skupina Serbskeho folklorneho ansambla Wudwor je k tomu přinošowała. Wulki zaćišć je tež „nimale profesionelny wustup“ Smjerdźečanskeje rejwanskeje skupiny w njej zawostajił.
