Budyšin (CS/SN). We wobłuku rjada „Łužiske literarne dopołdnjo“ je zawčerawšim, njedźelu, Ivonne Hübner ze swojeho historiskeho romana „Łužiske muzy“ čitała. Mała žurla Budyskeho Dźiwadła na hrodźe bě dospołnje wupředata. 38lětna awtorka je z wjacorymi wurězkami ze swojeho romana bjezdwěla wćipnosć zbudźiła knihu sam čitać. Přetož w kriminalnym padźe w małej wsy njedaloko prusko-sakskeje mjezy wostawa hač do kónca wotewrjene, štó je mordar třoch młodych žonow, kotrež běchu wšitke z Lubaty wućahnyli. Kaž Ivonne Hübner napjeće přisłuchacym wopytowarjam přeradźi, bě kóždej wobdźělenej wosobje wotpohladnje dźěl podhladnosće připisała.