Minakałčan Lars Hempel předstaji swój rybarski zawod, kotryž je wot nana přewzał
W swojim wšědnym dźěle přinošuja łužiscy rybarjo tomu, zo sej našu lětstotki staru kulturnu krajinu zdźeržimy. Woni njerjedźa a njeponowjeja jenož haty, ale hladaja tež pućiki a łuki kołowokoło nich. Nic naposledk zastaraja nas z přirodnymi, regionalnymi a čerstwymi produktami. 45lětny Lars Hempel je rybar a hatar w třećej generaciji w swójbnym zawodźe w Minakale. Wo lětušich žnjach rybow, wo wuměnjenjach, předsudkach, problemach kaž tež wo přichodźe zawoda je so Andreas Kirschke z nim rozmołwjał.
Knježe Hempelo, běše 2025 dobre lěto za rybarja?
L. Hempel: Haj. Ryby su so najebać suchoty w nalěću derje wuwili. Wosebje w aprylu a meji smy přeniłku wodu w někotrych hatach měli. Tohodla sym so nad spadkami w juliju a awgusće ćim bóle wjeselił, tež hdyž wone haty połnje napjelnili njejsu.
Kak wulki je Waš rybarski zawod? Kelko ludźi tule dźěła?
