Južna Morawa wabi z njeličomnymi kulturnymi poskitkami a tradicijemi wo hosći
Nowogotiski hród w Lednicach z parkom w jendźelskim stilu je jedna z njeličomnych žadnostkow kulturneje krajiny Lednice-Valtice, kotraž słuša wot 1996 do swětoweho herbstwa UNESCO. W lěće 2024 zličichu w hrodźe wjac hač 300 000 wopytowarjow.„Tu je ten krasny kraj, co nám život, zdravi a vino dává.“ We 800 lět starej wsy Vrbice na juhu Morawy pyši tele hrónčko zachodne durje jedneje z njeličomnych winowych pincow – Češa praja jim sklep. Žiwjenje, strowota a wino su tež mnohim pućowacym z přičinu, sej wony krasny blečk Europy wotkryć. Z Łužicy sej tam z awtom w něšto wjac hač pjeć hodźinach dojědźeš.
Za „winowych turistow“ drje je pózdnje lěćo abo nazyma najlěpši čas, Morawu wopytać. Tola akcije koło wokoło wina njepřewjeduja so jeno w času winowych žnjow, kaž by to čłowjek snadź wočakował. W lětušej protyce zarjadowanjow bě prěni termin 9. januara, jako w městačku Hustopeče štyrjo wokolni winicarjo swójske wino k woptawanju poskićichu a zajimcam dohlad do swojeho dźěła a produkcije dachu.
