Přeproša na reje do lěća

Ćisk. Na „reje do lěća“ přeprošuje Kulturne towarstwo Ćisk jutře, 19. junija, na Ćiskowski dwór. Wot 20 hodź. postara so partyband Müllermugge z live-hudźbu wo dobru naladu. Zastup płaći w předpředani 12 eurow, při wječornej kasy 15 eurow.

10. festiwal dudakow

Slepo. Wot 19. do 21. junija wotměje so w Slepom 10. mjezynarodny festiwal dudakow. Hudźbnicy z tu- a wukraja prezentuja na dudach tradicionalnu hudźbu. Wjerškaj stej pjatk wječor koncert „Popsorben“ a njedźelu připołdnju swjedźenski ćah po wsy.

Zastup za cyły kónc tydźenja płaći 25 resp. potuńšeny 15 eurow, na jednotliwy dźeń płaća zajimcy znajmjeńša 8 resp. 5 eurow.

Zarjaduja Janske jěchanje

Drjowk. Njedźelu, 21. junija 2026, wotměje so w Kózłach pola Drjowka tradicionalne janske jěchanje – nałožk, kotryž dźensa jenož hišće w Delnjej Łužicy pěstuja. Zazběh je w 13 hodź. z kemšemi w cyrkwi w Kózłach. Wokoło 14.30 hodź. poćehnje Jan ze swojim přewodom wot nawsy k jěchanišću, prjedy hač so w 15 hodź. Janske jěchanje započnje. Wopytowarjow wočakuje wotměnjawy program za cyłu swójbu kołowokoło cyrkwje a jěchanišća při Kalawskej dróze.