„Najwjace basnikow je w Serbach“, stej mjeno a zdobom prěni wjerš basnje Víta Kolmački. Čitajće njewšědnu stawiznu morawskeho poeta, kiž drje njeje w Serbach znaty, kiž pak wo Serbach na putace wašnje w modernym stilu pisa.
Daloko wot Serbow zdaleny na wuchodnej Morawje je w měsće Zlín basnik Vít Kolmačka žiwy. Njenapadny ćichi muž steji zboka zjawneho literarneho žiwjenja. Swoje basnje je pozdźe wudawać započał – klětuši sydomdźesatnik je swoju literarnu prěničku hakle před pjeć lětami wozjewił. K tomu su mjeztym wšak tři dalše zběrki přišli, znaty awtor pak najebać to njeje. A w Serbach docyła nic. Njeznaty pak njerěka, zo njezajimawy abo njewažny był, předewšěm potom nic, hdyž swoje twórby tež ze Serbami zwjazuje.
