K 80. narodninam tworjaceje wuměłče Boženy Nawka-Kunysz (1946–2000)

Molerka, grafikarka a knižna ilustratorka Božena Nawka-Kunysz liči k najwuznamnišim zastupjerkam serbskeho wuměłstwa druheje połojcy 20. lětstotka. Jeje dźěło wobsteji při tym z dweju runohódneju dźěłoweju polow – ze swobodneho tworjaceho wuměłstwa a z knižneje ilustracije. Wone zaběra we wuměłstwowych stawiznach wosebite městno, dokelž zwjazuje serbske, pólske a srjedźnoeuropske kulturne tradicije. Jeje­ dźěło njehodźi so regionalnym abo narodnym kategorijam přiličić, ale překročuje je přez uniwersalnu wobrazowu rěč mjez lokalnym a globalnym. Jako Serbowka, wukubłana w Pólskej a skutkowaca mjez Łužicu a Hornjej Šleskej, čuješe so wona sama wjacorym kulturnym rumam přisłušna. Serbske tradicije su wažny wobstatk jeje ikonografiskeho portfolija, njejsu pak folkloristisce přewzate.