Berlin (dpa/SN). Po stratach hłosow wolerjow při wólbach zwjazkoweho sejma je předsyda AfD Jörg Meuthen konsekwentnu analyzu móžnych zmylkow připowědźił. „Pod smužku njemóžemy drje to jako wuspěch wobhladować“, rjekny Meuthen, kiž njebě sam za zwjazkowy sejm kandidował, wčera w Berlinje. AfD bě z hesłom „Zmužitosć k wěrnosći“ nastupiła. K tomu tež słuša, „zo sej wěcy rjenje njebarbimy“. Zapósłanc Europskeho parlamenta rjekny, zo dyrbjało so wo tym rěčeć, hač je mudre było, žadanje za wustupom Němskeje z Europskeje unije do wólbneho programa zapisać.

„Stoprocentowsce spokojom z wuslědkom njejsym“, rjekny načolny kandidat AfD Tino Chrupalla, kiž stronu jako ko-předsyda zhromadnje z Meuthenom nawjeduje. Wón rěčeše najebać to wo „stabilnym wuslědku“. Dalša načolna kandidatka Alice Weidel rjekny, zo „njeda sej wuslědk wólbow wočornić, wot nikoho“.

Wjetšina přećiwo nowemu knježerstwu pod nawodom CDU

Berlin (dpa/SN). W rjadach CDU spjećuja so přiběrajcy planam kanclerskeho kandidata Armina Lascheta, najebać historisku wólbnu poražku při wólbach zwjazkoweho sejma zhromadne knježerstwo ze Zelenymi a FDP wutworić. Předsyda delnjosakskeje CDU Bernd Althusmann sej žadaše: „Nětko měli wolu wolerjow ponižnje přiwzać, přistojnje a z krutym rjapom. Ludźo su změnu chcyli.“ Hessenski ministerski prezident Volker Bouffier podšmórny: „Nimamy žane prawo na knježerstwowu zamołwitosć.“ Předsyda Młodeje unije Tilman Kuban rjekny: „Smy wólby přehrali, dypk.“ Jasny nadawk leži po jeho měnjenju pola SPD, Zelenych a FDP.

Zadźerženje Armina Lascheta dopomina mje na lěto 2005. Tehdy sedźeše při wólbach runje podležany Gerhard Schröder (SPD) w telewizijnej diskusiji a twjerdźeše, zo ma wólbny wuslědk za jasny nadawk, nowe knježerstwo wutworić. Wólbna dobyćerka Angela Merkel (CDU) tak prawje njewědźeše, što měła k tomu rjec. Na kóncu dyrbješe moderator sćelaka Schrödera na to skedźbnić, zo je wólby zwjazkoweho sejma runje přěhrał a zo drje z „jeho“ noweho knježerstwa ničo njebudźe. Njewěm, štó Armina Lascheta poradźuje. Zjawna a dosć razna diskusija w rjadach CDU/CSU měła jemu wujasnić, zo je z prócowanjom nastupajo wutworjenje noweho knježerstwa pod jeho nawodom na dospołnje wopačnym puću, dokelž su jeho ludźo runje wotwolili. Zo nas Olaf Scholz jako zwjazkowy kancler takrjec ze stólca storhnje, so mi tak prawje wěrić nochce. Zwjazkoweho kanclera Armina Lascheta pak sej po tutych wólbach scyła předstajić njemóžu. Marko Wjeńka

London (dpa/SN). Hladajo na dale trajacu bencinowu krizu we Wulkej Britaniskej je strowotniski wobłuk kraja alarmowany. „Lěkarjo a druzy přistajeni strowotnistwa njemóža so wo pacientow starać, dokelž njepřińdu wjace na dźěło“, rjekny Julia Grace Patterson, předsydka zjednoćenstwa EveryDoctor, kotremuž něhdźe 1 700 lěkarjow přisłuša. Wona je słyšała, zo su mnozy kónc tydźenja po­darmo spytali swoje awto natankować. Trěbny je nuzowy plan knježerstwa, kotryž zaruči, zo móža přistajeni strowotniskeje słužby na dźěło přijěć.