Za jednotnu policajsku syć
Berlin/Magdeburg (dpa/SN). Zwjazk a zwjazkowe kraje chcedźa natwar jednotneje internetneje syće za wšitke policajske zarjady ze zhromadnym etatom financować. Do njeho maja Zwjazk a jednotliwe kraje wotpowědnje swojim financnym móžnosćam přinošować. To je saksko-anhaltski nutřkowny minister Holger Stahlknecht (CDU) powěsćerni dpa zdźělił. Natwar jednotneje datoweje banki a internetnych syćow je wulke wužadanje, kotrež drje budu hišće lěta dołho zwoprawdźeć, wón doda.
Na kóncu ma tuchwilna njepřewidna syć jednotliwych policajskich systemow, kotrež njejsu mjez sobu zwjazujomne, wotstronjena być. By-li so plan poradźił, móhli zastojnicy na přikład při pytanju za skućićelemi a w podobnych padach daty z druhich zwjazkowych krajow widźeć a wužiwać.
Nadrobnosće financowanja zhromadneje internetneje syće chce Holger Stahlknecht na dźensa zahajacej so konferency nutřkownych ministrow ze swojimi kolegami wobrěčeć. Ministrojo wuradźuja hač do pjatka w Magdeburgu. Stahlknecht je předsyda konferency.
To a tamne (28.11.18)
Wopity šofer nakładneho awta je w Zwickauwje při wotbočenju ze swojim jězdźidłom pjeć awtow wobškodźił a dohromady 30 000 eurow škody načinił. 59lětny na to z Lkw-jom cyle jednorje dale jědźeše. Přez firmu šofera wšak móžeše policija zwěsćić, dokal je po puću. Na awtodróhowym parkowanišću jeho skónčnje namaka. Test wunjese, zo bě muž z wjace hač promilom alkohola jěł. Nětko čaka na njeho selena skóržba.
Přizemjenje zaspał je pilot dwumotoroweho lětadła na juhu Awstralskeje. Muž bě sej za wodźidłom wusnył a 46 kilometrow dale lećał, hač to poprawom dyrbješe. Jako to spózna, so zawróći a na prawym blaku wěsće přizemi. Prawdźepodobnje bě kompjuter lětadło awtomatisce wodźił. Hač je pilot sam wotućił, abo kompjuter jeho budźił, to drje wě jenož wón sam.
Skupinska skóržba móžna
Berlin (dpa/SN). Kupcy dieselowych awtow twarca Volkswagen móža so wotnětka skupinskej skóržbje přećiwo awtowemu koncernej přizamknyć. Kaž Zwjazk přetrjebarskich centralow Němskeje dźensa w Berlinje zdźěli, je wotpowědny register skóržbnikow wot wčera wječora w zwjazkowym zarjedźe za justicu přistupny. Zapis do registra je předewšěm za ludźi zajimawy, kotřiž nochcedźa so sami z VW rozestajeć. Nětko přewozmje Zwjazk škitarjow přetrjebarjow procesowe riziko, z Berlina rěkaše.
Trump hrozy awtotwarcej
New York (dpa/SN). Prezident USA Donald Trump je awtotwarca General Motors planowaneho masiwneho šmóranja dźěłowych městnow kritizował a z konsekwencami hrozył. Pozadk je planowane zawrjenje twornje w staće Ohio kóštow dla. Trump bě připowědźił, zo chce na předewzaće „masiwny ćišć“ wukonjeć, dyrbjało-li so to stać, wšako je „wjele za koncern činił“. Wón awtotwarca namołwja, produkciju w Chinje skónčić a město toho w USA inwestować.
Zyma wobchad haćiła
W dołhich rynkach čakaja migranća w mexiskim namjeznym měsće ...
Merkel a Putin wo krizy wuradźowałoj
Berlin/Moskwa (dpa/SN). Zwjazkowa kanclerka Angela Merkel (CDU) a ruski prezident Wladimir Putin staj wčera aktualnu krizu mjez Ruskej a Ukrainu po telefonje rozjimałoj. W rozmołwje Putin němsku kanclerku prošeše na ukrainske knježerstwo wliw wukonjeć, zo by so „dalšich njepřemyslenych kročelow wzdało“, ruska powěsćernja Tass rozprawja. K tomu rysowaše Putin situaciju jako „prowokatiwne akcije“ ukrainskeje strony kaž tež jako „hrube ranjenje mjezynarodneho prawa přez jeje wójnske łódźe“ a jako „wotpohladne ignorowanje prawidłow měrniweje pasaže přez teritorialne wodźizny ruskeje federacije“. Poziciju kanclerki Tass žanu njepodawa. Minjeny kónc tydźenja bě ruska mórska straža ukrainskej marinje přejězd přez Kerčsku mórsku wužinu zapowědźiła a tři ukrainske łódźe sćazała. Na to ukrainski prezident Petro Porošenko připowědźi, zo płaći wot jutřišeje srjedy 30 dnjow wójnske prawo. Parlament je naprawu wčera z wulkej wjetšinu schwalił. Dyrbjało-li so połoženje zaso změrować, móže Porošenko wójnske prawo „kóždy čas“ zaso zběhnyć, kaž rjekny.
6 000 ludźi bomby dla ewakuowali
Zwenkau (dpa/SN). W zwisku ze znješkódnjenjom bomby z Druheje swětoweje wójny w městačku Zwenkau južnje Lipska dyrbješe dźensa 6 000 ludźi swoje bydlenje wopušćić. Wot naprawy nimo toho potrjechene běchu pěstowarnja, šula a chorownja, kaž policija rano zdźěli. Kónčina we wobkruhu jednoho kilometra wokoło strašneje namakanki je zaraćena. Wšitke dróhi do Zwenkauwa su zawrjene. Pěškam a jězdźidłam stej přistup a přijězd do města zakazanej. Wot ranja su wobydlerjam nuzowe kwartěry přistupne. Bombu chcychu w připołdnišich hodźinach znješkódnić.
Hižo wčera popołdnju dyrbješe něhdźe 600 ludźi we wokolinje sto metrow wokoło bomby swoje bydlenje wopušćić. Blisku chorownju su minjenu nóc ewakuowali. Bombu běchu wčera dopołdnja namakali, jako wuzběhnychu twarsku jamu za nowy jednoswójbny dom. Fachowcy za znješkódnjenje municije z Drježdźan zwěsćichu, zo dyrbja bombu na městnje znješkódnić. Za potrjechenych su wobydlerski telefon zarjadowali.
To a tamne (27.11.18)
Štyri měsacy njewinowata w jastwje sedźała je žona w staće USA Georgia, dokelž bě policija cokorowu watu za drogi měła. Při kontroli běchu zastojnicy titu ze zdźěla roztłóčenej módrej cokorowej watu našli, kotruž mějachu za metamfetamin. Dokelž bě prěni drogowy test k tomu hišće pozitiwny, zajachu žonu jako dealerku drogi crystal meth. Hakle měsacy pozdźišo sej w laborje namakanku bliže wobhladachu a zwěsćichu, zo je to wata. Žona skorži nětko přećiwo policistam a zhotowjerjej drogoweho testa.
Z „přećelnymi chłostankami“ chcedźa tež lětsa zaso wopytowarjow hodownych wikow w Annabergu-Buchholzu na to skedźbnić, hdyž wopak parkuja. Na lisćiku při awće chcedźa wopytowarjow prosyć lěpje na wobchadne tafle dźiwać, kotrež parkowanje na wšelkich městnach poprawom zakazuja. Pjenježnu pokutu chcedźa sej jenož potom žadać, hdyž wopytowarjo zakaz wospjet ignoruja.
„Z lubosću so njehrajkać!“
Vatikan (B/SN). Bamž Franciskus je znowa přesnadne přihoty na mandźelstwo w katolskej cyrkwi kritizował. Někotre „pozdatne přihoty“ za zrały rozsud njedosahaja. Dźe tu wo sakrament a nic wo někajku formalitu. Cyłe žiwjenje wjerći so wokoło lubosće. „Z lubosću njesměš so hrajkać!“, praji swjaty wótc.
Myto spožčili
Berlin (B/SN). Myto za „ciwilnu kuražu“ přećiwo prawicarskemu radikalizmej, antisemitizmej a rasizmej spožčichu Janinje Levy z Hamburga. Jednaćelka kreatiwneje agentury bě w aprylu zakročiła, jako buštaj młodaj mužej z kipu na hłowje w Berlinje wot młodeho Syričana z pasom nadběhowanaj a z antisemitiskimi wudmami hanjenaj. Z 3 000 eurami dotěrowane myto dósta Levy 29. oktobra w Berlinje na zarjadowanju Carity.
Wobwinuja měšnika
Varanasi (B/SN). W indiskim měsće Varanasi (zwjazkowy stat Uttar Pradesh) su 18. nowembra katolskeho měšnika Vincenta Pereiru radikalni hinduistiscy nacionalisća wosrjedź nyšpora w modlerskim centrumje atakowali. Policija měšnika zaja, dokelž měni, zo je ze swojej modlitwu a wustupowanjom tumulty hindu-přiwisnikow prowokował.
Myto Miny Witkojc spožčene
Bórkowy (SN/at). Žylowska Witaj-pěstowarnja „Mato Rizo“ je prěnja lawreatka krajneho Myta Miny Witkojc za wuběrny serbskorěčny angažement. Z rukow braniborskeje ministerki za wědomosć, slědźenje a kulturu dr. Martiny Münch (SPD) přija nawodnica kubłanišća Diana Buchanowa wuznamjenjenje na swjatočnosći sobotu w Bórkowach.
Na prócowanja wo přichod serbskeje rěče skedźbni ministerka Münch w swojim postrowje runje tak kaž na ćeže, mjeńšinowu rěč wšědny dźeń konsekwentnje nałožować. „Tohodla su rěčne přikłady trěbne“, wona podšmórny. Narodny přikład je Mina Witkojc, mjenowa patronka noweho serbskeho myta, dotal jeničkeho po žonje pomjenowaneho.
Do rozsudneho wothłosowanja
London (dpa/SN). Po wčerawšim přihłosowanju čłonskich krajow EU k zrěčenju z Wulkej Britaniskej wo wustupje kraja z EU měrja so woči zaso na britisku stolicu London. Tam chcyła premierministerka Theresa May wujednany kompromis w Delnjej komorje parlamenta zakitować, byrnjež přećiwnicy masiwne spjećowanje připowědźili. Rozsudne wothłosowanje ma so w decembru wotměć. Dyrbjało-li zrěčenje zwrěšćić, hrozy chaos.
Migrantow wróćo dowjezć
Tijuana (dpa/SN). Po tumultach na mjezy k USA je Mexiko připowědźiło, zo chcyło migrantow ze srjedźoameriskich krajow, kotřiž běchu spytali mjezu ilegalnje přewinyć, do jich domizny wróćo dowjezć. Skupina něhdźe 500 migrantow chcyše so na namjeznym přechodźe El Chaparral na sewjeru kraja namócnje do USA dóstać. Mexiska policija podarmo spyta, tomu zadźěwać. Wěstotne mocy USA zasadźichu sylzopłun.
Za dobrowólny zawjazk
