Berlin (dpa/SN). Dohladowanska rada Němskeje železnicy je so dźensa ze sa­něrowanskim programom Zwjazkej słušaceho koncerna zaběrała. Koncept je ­nawoda předsydstwa Richard Lutz předpołožił. Z nim chcedźa ponowjenje w přichodnych třoch lětach nastorčić. Program měri so w prěnim rjedźe na saněrowanje infrastruktury kaž tež zawodoweho a hospodarskeho połoženja. Zwoprawdźenje koncepta chcedźa prawidłownje wuhódnoćić. Minjene měsacy su słabosće železniskeho systema w Němskej za wšěch widźomnje wotkryli, Lutz rjekny. Po informacijach nowin ma železnica w lěće 2027 zaso profitabelna a dypkowna być. Tole wšak su hižo před pjeć lětami za lěto 2024 přilubili.

Beirut (dpa/SN). Škričkowe nastroje, kotrež su w Libanonje runočasnje po stach eksploděrowali, běchu israelscy agenća po informacijach medijow do toho z rozbuchadłom pjelnili. Tójšto tak mjenowanych pagerow pochadźeše z posyłkow, kotrež bě z Israelom znjepřećelena Hisbollah minjene dny dóstała. To rozprawja nowina Wall Street Journal. Israelscy agenća běchu w Taiwanje twarjene aparaty wotpopadnyli, prjedy hač su Libanon docpěli, a w nich 25 do 50 gramow rozbuchadła zatwarili, medije pisaja.

Runočasne detonacije su w Libanonje po informacijach strowotniskeho ministerstwa 2 750 ludźi zranili. Dźewjećo su žiwjenje přisadźili. Mjez zranjenymi su mnozy wojowarjo elitneje skupiny Radwan. Detonacije zlemichu tež najwjetši dźěl wojerskeho komandoweho a kontrolneho systema Hisbollah. Israel chcyše po měnjenju wobkedźbowarjow signalizować, zo je ze swojimi agentami kmany, tež najsensibelniše struktury Hisbollah trjechić. Organizacija je wjećbu hižo připowědźiła.

Z třomi milionami eurow chce stat kóžde dźěłowe městno chipoweje fabriki Intela w Magdeburgu subwencionować. Telko přerězny dźěławy čłowjek w Němskej, kiž ze swojimi dawkami tute subwencije financuje, čas žiwjenja njezasłuži. Intel je nětk najebać to swoju inwesticiju wo (znajmjeńša) dwě lěće přestorčił – financielnych wušparanjow dla. Njedawno je druhi koncern, VW, bolostne skrótšenja připowědźił. Tu kaž tam je management wuwiće na wikach „zaspał“. Koncern je kaž wulki tankowc, druhdy njemóža so jeho kapitanojo sčasom zadźěwkej wuwinyć. W Sakskej je 3 650 předewzaćow mikroelektroniki z 81 000 dźěłowymi městnami. Z nich je 49 procentow w produkciji za software. Tworjenje clusterow, mjeńšich syćow, ale ćim bóle kreatiwnych producentow, je lěpši puć hač kormjenje dale a wjetšich koncernow. Nimo toho su strategiske partnerstwa na přikład z aziskimi krajemi zmysłapołniše hač „hospodarska wójna“ z ekstremnymi přiražkami stata. Bianka Šeferowa

Tupperware je insolwencu připowědźił. Fachowc tyzow za składowanje žiwidłow z USA chce najebać to dale dźěłać. Tupperware, pioněr na polu domjacych tyzow, bědźi so hižo dlěši čas z hospodarskimi problemami. Minjene měsacy su z pjenjezydawarjemi rěčeli, kotrymž dołži Tupperware hišće wjacore miliony dolarow. Z předaćom zawoda chcedźa mjeno zachować a zawod poněčim na moderne technologije přetwarić.

Při rězanju pjerizny je 71lětny w Rosenbachu w Zhorjelskim wokrjesu bróžnju zapalił. Twarjenje je so póndźelu popołdnju wotpaliło, policija zdźěla. Muž bě wosebity wósk zwohrěwał, z kotrymž chcyše pjerja skotu lěpje wotskubać. Při tym wósk w horncu přeběža a so na płunowych kachlach zapali. Policija trochuje škodu na 7 000 eurow a přepytuje lochkomyslneho zapalerstwa dla.