Posledni tydźeń schadźowanjow
Naslědnik Junckera dale njejasny
Brüssel (dpa/SN). Zwjazkowa kanclerka Angela Merkel (CDU) chcyše dźensa zhromadnje ze swojimi europskimi kolegami spytać, zwadu wo wodźacy personal Europskeje unije rozrisać. Najebać marathonowe wuradźowanje njejsu so dotal dojednać móhli. Mjez druhim dźe wo naslědnistwo prezidenta komisija EU Jeana-Claudea Junckera. Prezident rady EU Donald Tusk je wuradźowanja na dźensa přestorčił. Wobdźělnicy steja pod časowym ćišćom: Jutře chce so nowy parlament prěni króć schadźować.
Nachwilnje wupadaše wčera za přibliženjom: Po tym móhł Nižozemjan Frans Timmermans Junckera naslědować, načolny kandidat Europskeje ludoweje strony Manfred Weber móhł so z nowym prezidentom parlamenta EU stać. Tomu pak so mnozy spjećowachu. Předewšěm wuchodoeuropske staty Visegrádskeje štyrki su přećiwo Timmermansej. Čěski premier Andrej Babiš rjekny: „Timmermans je wunamakar migraciskich kwotow a je našej kónčinje napřećo negatiwnje nastajeny.“
Podpěraja rozšěrjenje insektow
Sakski minister Thomas Schmidt nowy jednanski koncept předstajił
Lipsk (SN/BŠe). Sakski minister za ratarstwo, wobswět a geologiju Thomas Schmidt (CDU) je minjeny štwórtk jednanski koncept za wšelakorosć insektow w swobodnym staće předstajił. Dźewjeć wobłukow wopřijacy koncept wopisuje nowe naprawy, z kotrymiž ma so mnohotnosć překasancow spěchować. Naćisk ministerstwa za wobswět a ratarstwo budźe nětko we wobšěrnym konsultaciskim procesu k programej dalewuwity. „Škit překasancow je dawno fachowe ćežišćo. Dokelž je jich dale a mjenje, je to alarmowacy signal a wuskutkuje so na cyłkowny ekosystem“, Thomas Schmidt zwurazni.
Wšitcy akterojo towaršnosće su namołwjeni. W městach a we wjesnych kónčinach maja na přikład insektam nješkodźace swěcy instalowane a zahrodki kaž tež łuki z wjele kćějacymi rostlinami wuhotowane być. Zdobom měło mortwe drjewo zdźěla w lěsach wostać, žiwe płoty podłu polow spřihotowane a přibrjohi rěkow zwosadźane być. Z najwšelakorišimi naprawami hodźi so tak překasancam přihódny žiwjenski rum wutworić.
To a tamne (02.07.19)
Njewšědny napohlad skićeše so njedźelu rano wobydlerjam mexiskeho města Guadalajara: Sylny zliwk bě cyłe město z krupami pokrył. W někotrych dźělach města ležachu wone cyły meter wysoko, awta běchu jenož hišće zdźěla widźeć. Zamołwići mějachu ruce połnej dźěła, krupy z dróhow rumować, rěka w zdźělence města na juhu kraja z 1,5 milionami wobydlerjow.
Had z plasty je w Porynsko-Pfalcy policajsku akciju zawinił. Žona bě wčera w Fußgönheimje kobru z pozběhnjenej hłowu na swojej zahrodźe wuhladała a policiju zawołała. Zo njemóhła kobra ćeknyć, połoži žona šklu na hada a poćeži ju z kamjenjom. Policisća pak nańdźechu jeničce plastowu hrajku w formje hada. „To bě kuriozne zasadźenje“, rěka w zdźělence policije, „w našej kónčinje drje su hady, tajki pad pak hišće njemějachmy.“
Za wupisanje městnow puć runany
Wutworjenje serwisoweho běrowa za serbsku rěč je kročel bliše. Budyski krajny rada a přisłušna přirjadnica staj minjeny tydźeń wot Domowiny naćisnjenej směrnicy za zarjadnišćo přihłosowałoj a wokrjesnej społnomócnjenej za serbske naležnosće Reginje Krawcowej nadawk dowěriłoj, ze stron krajnoradneho zarjada dalši proces přewodźeć.
Budyšin (SN/at). Na měrcowskim informaciskim zarjadowanju wo lětsa prěni raz napołoženym Serbskim komunalnym programje bě předsydka serbskeje rady Marja Michałkowa jara optimistiska: W programje zakótwjeny serwisowy běrow budźe w meji dźěłać započeć, bě wona tehdy přeswědčena. Mjeztym je julij a puć je skónčnje zrunany za wupisanje personalneju městnow.
Kriza ortodoksneje cyrkwje
Genf (B/SN). Metropolit rusko-ortodoksneje cyrkwje Hilarion widźi swětowu ortodoksnu cyrkej w ćežkej krizy. Šćěpjenja dla winuje Hilarion ekumeniskeho patriarcha Konstantinopela ze sydłom w Istanbulu, Bartholomäusa I. Wón je swoju poziciju jako čestny nawoda swětoweho zhromadźenstwa ortodoksnych wěriwych na hrački stajił, dokelž je w januarje samostatnu ortodoksnu cyrkej na Ukrainje oficialnje připóznał. To je za Hilariona „ilegalne“. Rusko-ortodoksna cyrkej pak wobsteji tež na Ukrainje pod Moskowskim patriarchatom. Z wida Ruskeje móže we wěstym kraju jenož jedna ortodoksna cyrkej eksistować, a na Ukrainje hižo tajka je – pod Moskowskim patriarchatom.
Arcybiskop w Africe był
Kapitanku přesłyšowali
Rom (dpa/SN). Kapitanka němskeje pomocneje organizacije Sea-Watch Carola Rackete bě dźensa popołdnju na italske sudnistwo k přesłyšowanju skazana. Policisća dowjezechu ju za to z kupy Lampedusa do sicilskeho města Agrigent, kaž rěčnik organizacije zdźěli. 31lětnej žonje wumjetuja podpěru ilegalneho zapućowanja, ranjenje mórskeho prawa a spjećowanje přećiwo statnej mocy. Rackete bě minjeny tydźeń z wjace hač 40 migrantami najebać zakaz do přistawa na Lampedusa dojěła. Tam ju zajachu.
Koalicija wutworjena
Bremen (dpa/SN). Po hodźiny trajacych jednanjach su so SPD, Zeleni a Lěwica minjenu nóc na koaliciske zrěčnje za čerwjeno-zeleno-čerwjene knježerstwo w Bremenje dojednali. W běhu dnja chcychu zrěčenje zjawnosći předstajić. Je to prěnja koalicija tajkeho razu w jednym ze zapadnych zwjazkowych krajow. Socialdemokraća běchu wólby 26. meje po wjace hač 70 lětach přěhrali, po tym zo běchu dwanaće lět ze Zelenymi knježili. Dobyćerska CDU pak njeje koaliciske knježerstwo wutworić zamóhła.
Bjezdźěłnosć snadnje woteběra
Štó chcył nowy předsyda SPD być?
Berlin (dpa/SN). W SPD je so dźensa oficialnje doba přizjewjenja za naslědnistwo wotstupjeneje předsydki Andreje Nahles zahajiła. Hač do 1. septembra móža so zajimcy přizjewić. Při tym je předsydstwo strony wuraznje tež skupiny ke kandidaturje pohonjowało. Na wólbnym zjězdźe w decembru chcedźa potom móžnosć pruwować, dwójne předsydstwo we wustawje socialdemokratiskeje strony zakótwić. Hinak hač w druhich stronach měli so tajke dwójki hižo do wólbow namakać a zhromadnje nastupić, a jedna žona měła znajmjeńša pódla być.
Za móžnu předsydku abo móžneho předsydu socialdemokratow maja mnozy swójbnu ministersku Franzisku Giffey a generalneho sekretara Larsa Klingbeila. Dotal pak njeje hišće nichtó kandidaturu přizjewił. Přizjewjenja z dobrymi wuhladami wočakuja tak a tak hakle na kóncu přizjewjenskeje doby.
Hišće wo čole EU so njedojednali
Brüssel (dpa/SN). Na wurjadnym wjeršku Europskeje unije k wobsadźenju wodźacych zastojnstwow w Brüsselu njeje žane rozrisanje wotwidźomne. To je italski ministerski prezident Giuseppe Conte medijam zdźělił. Hač so dźensa tola hišće dojednaja, njeje scyła jasne, rjekny Conte w Brüsselu.
Prezident Rady EU Donald Tusk bě jednanja wčera w 23 hodź. přetorhnył a so na to cyłu nóc jednotliwje ze wšitkimi 28 statnymi a knježerstwowymi šefami rozmołwjał. Dźensa rano su so znowa k jednanjam zetkali, kaž powěsćernje rozprawjeja.
Zwjazkowa kanclerka Angela Merkel (CDU) chce zhromadnje ze swojimi kolegami naslědnistwo dotalneho šefa komisija EU Jeana-Claudea Junckera zrjadować. Po jeje předstawach měł so načolny kandidat Europskeje ludoweje strony Manfred Weber z nowym šefom komisije EU stać. Tomu so druzy statni šefojo, mjez nimi francoski prezident Emmanuel Macron, spjećuja. Wuradźowanja wo tym su pječa „jara komplikowane“.
Kretschmer we wólbnym boju
34. zjězd sakskeje CDU w Kamjenicy wjacore změny wobzamknył
Kamjenica (dpa/SN). Hladajo na wólby Sakskeho krajneho sejma 1. septembra chce ministerski prezident a předsyda krajneje CDU Michael Kretschmer předewšěm wo tych wojować, kotřiž wolić njechodźa. „Přeju sej jara, zo dóstanjemy koaliciju z njewolerjemi“, rjekny Kretschmer sobotu na 34. stronskim zjězdźe CDU w Kamjenicy. Strona chcyła mjez ludźimi, kotřiž su wot politiki přesłapjeni, zaso dowěru wróćo zdobyć, wón potwjerdźi. CDU jich trjeba, zo móhła wólby krajneho sejma dobyć.
Zdobom atakowaše Kretschmer AfD, bjeztoho zo by stronu mjenował. Politiski přećiwnik moluje „dezastrozny wobraz Sakskeje“. Wólbny program tuteje „cwólby“ njewobsahuje ani rozrisanja ani rozsudne prašenja. „Spjećujmy so tomule duchej, kotryž chcył wšitko zničić.“ Premier kritizowaše prawicarski ekstremizm jako jedyn z najwjetšich strachow za přichod kraja. Minjeny čas bě wón zhromadne dźěło z AfD stajnje zaso kategorisce wuzamkował.
