Tysacy na hepatitis schorjeli
Ekologiske połoženje w Donbasu so z kóždym dnjom pohubjeńša
„Ekologiska situacija we wot separatistow kontrolowanymaj regionomaj Luhansk a Donjeck na wuchodźe Ukrainy so pomjeńša a wjedźe do dale a wjetšeje epidemiskeje katastrofy.“ To rjekny Wadim Černiš, ukrainski minister za wobsadźene teritorije a wonkownych přesydlencow, na konferency spočatk junija. Daty za tajke wuprajenje maja sobudźěłaćerjo ministerstwa ze satelita. Ekologojo tuž měnja: Hdyž w starych industrijnych podkopkach wodu njeprawidłownje abo scyła njewuklumpaja, hrozy zemja zapadnyć. Wjace hač 20 podkopkow mjez městomaj Horlowku a Zolotojom je dospołnje z wodu pjelnjenych. Woda je zanjerodźena z wysokej koncentraciju sele a ćežkometalow. Pozdźišo běži do rěkow po cyłym regionje a wohroža tam bydlacu ludnosć z epidemijemi.
Štyrjoch kandidatow namjetowali
Wólby Serbskeho sejma podpěruje dalša politiska strona. Dźěłowy kruh Serbja pola krajneho předsydstwa SPD Sakskeje je to wčera w Kamjencu z jednym hłosawzdaćom wobzamknył a jednu kandidatku a třoch kandidatow za legitimowane serbske ludowe zastupnistwo namjetował.
Pitna woda zawěsćena
Berlin (dpa/SN). Najebać trajacu suchotu wostanje dale dosć pitneje wody, rěka w zdźělence komunalnych zastararjow Němskeje. Połoženje je zwjetša hišće njenapjate. Dnowna woda spadki składuje. Rěčne zawěry a hłuboke studnje su tuž přez lětnje měsacy zastarane. Lokalne ćeže móža zastararjo zhromadnje rozrisać. Suche pola a brune łuki njewoznamjenjeja zdobom mjenje pitneje wody. Přiwšěm měli ludźo wotwažować, hač je potrjeba pitneje wody na wšě pady, hladajo na přikład za krjepjenje, trěbna.
Pomoc plahowarjam skotu
Berlin (dpa/SN). Hladajo na dale a mjenje picy za skót w mnohich regionach Němskeje móža ratarjo ze spěšnej pjenježnej podpěru ličić. Zwjazkowa ministerka za ratarstwo Julia Klöckner (CDU) je wčera w Berlinje ze zamołwitymi alarmowace połoženje rozjimała. Nuzowemu rězanju skotu dyrbjeli zadźěwać. Nanajručišo měli kraje nětko pomocne programy předpołožić, kotrež chce Zwjazk podpěrać, ratarske ministerstwo informuje.
Knježerstwo „lěnjeho pasło“
Třo žurnalisća morjeni
Moskwa/Bangui (dpa/SN). Třoch ruskich žurnalistow, kotřiž rešeršowachu w nadawku projekta Krjemloweho kritikarja Michaila Chodorkowskeho, su w Centralnoafriskej republice morili. Po zdaću běchu so woni tam wo aktiwitach ruskeje zóldnarskeje jednotki Wagner wobhonili. Po informacijach medijow zasadźa Ruska nimo regularnych wojakow tež priwatne jednotki, agěrowace pod mjenom Wagner. Wone njepřisłušeja tuž wójsku, ale su priwatnje financowane. Žurnalisća přebywachu z turistiskim wizumom w južnoafriskim kraju.
Ruske wonkowne ministerstwo je idenditu woporow wobkrućiło. Našli běchu je blisko města Dékoa, něhdźe 200 kilometrow wot stolicy Bangui zdaleneho. Detaile dotal žane znate njejsu. Tamniši minister za informacije Ange Maxime Kazagui pak zdźěli, zo buchu mužojo wot skupiny wobrónjenych morjeni.
Trjebamy kóždy cyłk
Wudawki stupali
Wiesbaden (dpa/SN). Ličba přijimarjow Baföga so dale pomjeńša. Loni dósta 782 000 šulerjow a studentow statne wukubłanske spěchowanje, něhdźe 41 000 mjenje hač lěto do toho, kaž Zwjazkowy statistiski zarjad we Wiesbadenje informuje. Na wosobu pak bu wjace pjenjez wupłaćenych, a tak su statne wudawki wo 70 milionow na cyłkownje 2,9 miliardow eurow rozrostli.
Přerěznje dóstawa student měsačnje 499 eurow, šuler 456 eurow. Kaž zwjazkowy zarjad dale zdźěla, ličba spěchowanych hižo wot lěta 2013 woteběra.
To a tamne (02.08.18)
Wołanje wo pomoc je wobydlerjow w Aachenje rano zahe budźiło a wuskutkowało, zo woni policiju wołaja. Ze štyrjomi awtami smalachu zastojnicy na městno pozdatneho njeskutka, hdźež za woporom pytachu. Kedźbliwy policist pak tukaše na blisku chorownju, zwotkelž wołanje słyšeše. Kaž so wukopa, njebě jeho myslička tak wopačna. Hnydom štyri žony su tam w samsnym času wokoło štyrjoch dźěćko porodźili. Krótko na to so wšitko změrowa. Zastojnicy smědźachu so tuž woměrje zaso wotsalić a posrědkowachu młodym maćerjam zbožopřeća.
Wobchod za rybu a zeleninu we Wuppertalu je ze swojimi słódnymi tworami dweju paduchow-chłóšćakow njesměrnje wabił, zo so tam zadobyštaj. Jednoho wšak zatraši alarm, čehoždla ćekny. Tamneho pak nadeńdźechu zastojnicy z morcheju w ruce. Wjacore tyzy šrimpsow bě sej pakostnik hižo zesłodźeć dał.
MSPI wuspěch za ludy Europy
Budyšin (SN/at). Dohromady 1 128 385 podpismow su narodne zarjady 28 čłonskich statow Europskeje unije jako płaćiwe za wobydlersku iniciatiwu Minority SafePack (MSPI) připóznali, rěka w aktualnej nowinskej zdźělence Federalistiskeje unije europskich narodnych mjeńšin (FUEN). W jědnaće krajach su žadanu ličbu podpismow docpěli, w Němskej nic.
Zezběrane podpisma ma předsyda Domowiny Dawid Statnik za wulke wudobyće. „Wjeselu so jara, zo je iniciatiwa wuspěšna. Dźakuju so wšitkim podpisarjam – Serbam, přećelam a politikarjam –, kotřiž su našu naležnosć podpěrali. Tež hdyž njejsmy w Němskej trěbnu ličbu podpismow docpěli, smy přiwšěm k poradźenju iniciatiwy přinošowali.“
Kaž FUEN dale piše, je Minority SafePack hakle pjata europska wobydlerska iniciatiwa, kotraž spjelnja wuměnjeni milion płaćiwych podpěranskich podpismow kaž tež sydom čłonskich statow, w kotrychž dyrbja wěstu ličbu signumow docpěć.
Iniciatorojo chcedźa so nazymu na Europsku komisiju wobroćić, zo bychu dalše kroki MSPI rozjimali.
Azylowe centrumy wutworjene
Mnichow (dpa/SN). Jako prěni zwjazkowy kraj je Bayerska dźensa dwělomny program kótwicowe centrumy zahajiła. Po migraciskim masterskim planje zwjazkoweho ministra za nutřkowne naležnosće Horsta Seehofera (CSU) měli centrumy jednanja azyla dla pospěšić a tak tež wupokazanje ludźi, kotřiž nimaja žane prawo w Němskej wostać. Tamne zwjazkowe kraje najprjedy raz žane centrumy njewutworja. Na sydom stejnišćach w Bayerskej su zamołwići centrumy wutworili.
Nowe prawidła za přićah
Berlin (dpa/SN). Wot dźensnišeho płaća nowe prawidła za přićah swójbnych w Němskej přebywacych ćěkancow z wobmjezowanym škitnym statusom. Tak smědźa nětko zaso bliscy přiwuzni do Němskeje přińć. Předwidźane pak je, zo njeměło po cyłej Němskej měsačnje wjac hač 1 000 wosobow přińć. Dorosćeni móža nětko swojich mandźelskich a njepołnolětne dźěći k sebi wzać, njepołnolětni ćěkancy swojich staršich.
Staršiski popłatk hižo njeje
Najprjedy žana spěšna pomoc
Berlin (dpa/SN). Najebać dale a wjace hłosow, kotrež su za spěšnu financnu pomoc buram, wobstawa zwjazkowa ministerka za ratarstwo Julia Klöckner na tym, „wočaknyć dokładnu bilancu žnjow. To su pjenjezy dawkipłaćerjow, a trjebamy najprjedy reprezentatiwne daty.“
Fachowcy ministerstwa, Zwjazka a krajow běchu wčera w Berlinje wo škodach suchoty dla wuradźowali. Je jasne, zo su ratarjo w Němskej na najwšelakoriše wašnje potrjecheni. Horce wjedro pak połoženje ekstremnje přiwótřa. Dźensa chcyše so zwjazkowy kabinet schadźować a sćěhi suchoty rozjimać, wobzamknjene pak po wšěm zdaću ničo njebudźe. Poprawom su najprjedy raz zwjazkowe kraje zamołwite. Su-li škody „narodneho rozměra“, móže so Zwjazk wobdźělić. Tomu běše w lěće 2003 tak. Hakle kónc awgusta, hdyž budu konkretniše ličby předležeć, chce Zwjazk wo financnej pomocy rozsudźić.
