Hižo 250 króć lepjeneho čornojězdźerja je policija w Lüneburgu znowa ze spěšnika ćisnyła. Šafner chcyše jeho tež tohodla wotbyć, dokelž strašnje za alkoholom a urinom smjerdźeše, policija zdźěli. Ćehodla muž z Uelzena stajnje zaso z ćahom do Hamburga jězdźi, njewědźa. Wjacore skóržby a samo jatby njejsu dotal ničo wunjesli. Na policajskim rewěrje je muž, kotryž tež přez agresiwne zadźerženje napadnje, derje znaty. Zastojnicy znaja jeho personalije mjeztym z hłowy.

Z kruchom swinjaceho mjasa je sej španiski fan kopańcy košlu sławneho hrajerja Reala Madrid Sergija Ramosa zawěsćił. Za čas hry dźeržeše taflu w ruce, na kotrejž steješe: „Sergio, daj mi swój trikot a dam ći swinjace mjaso w šmałcu“, štož je delikatesa z južneje Španiskeje. Bjezpo­srědnje po hrě Ramos mužej trikot přićisny. Tón swoje slubjenje dodźerža a jemu mjaso da.

Athen (dpa/K/SN). Třeći dźeń za sobu su grjekscy burja ze swojimi traktorami hraničny přechod do Macedoniskeje zašlahali. Na woběmaj stronomaj hranicy nakopichu so dołhe rynki awtow. Nakładne wozydła z čerstwymi cyrobiznami su burja hdys a hdys přepušćili. Wažnu awtodróhu Athen-Thessaloniki ratarjo pola města Larissa wob dźeń tohorunja wjacore hodźiny blokěruja. Z tym protestuja přećiwo tomu, zo je jim knježerstwo dawki zwyšiło a diesel podróšiło.

Płaćizny čućiwje přibyli

Luxemburg (dpa/K/SN). Inflacija je so w europasmje w januaru chětro zwyšiła. Porno decembrej postupichu płaćizny wo 1,8 procentow, zdźěla statistiski zarjad Eurostat. Po februaru 2013 je to najwyša rata. Čućiwje dróše běchu w januaru energija a cyrobizny. Eksperća su to wočakowali. Z róstom płaćiznow je inflacija cilowu marku Europskeje centralneje banki we wysokosći njecyłeju dweju procentow nimale docpěła. To je přičina łahodneje pjenježneje politiki notoweje banki w poslednich lětach.

Bosch zapłaći miliony