Martin Delius na 210. Kamjenskim rańšim piwku přednošował

Kamjenc (RK/SN). Martin Delius bě hósć mjeztym 210. Kamjenskeho politiskeho rańšeho piwka wčera, njedźelu. 32lětna zajimawa wosoba bě za to z Berlina přijěła: studowany fyzikar, wuwiwar kompjuterowych programow, něhdyši politikar strony Piratow. Lěta 2010 bu wón znaty jako předsyda přepytowanskeho wuběrka Berlinskeho Domu zapósłancow, kotryž měješe­ dlijenja a rozwiwace so kóšty noweho Berlinsko-braniborskeho wulkolětanišća přepytować.

Podstupim (dpa/K/SN). Tež po krajnym „wjeršku“ nastupajo reformu wokrjesow w Braniborskej wostanu fronty skostnjene. Wyši měšćanosća Brandenburga, Choćebuza a Frankfurta běchu so w Podstupimje z ministerskim prezidentom Dietmarom Woidku (SPD) a dalšimi načolnymi zastupnikami krajneho knježerstwa zetkali, wočakujo, „zo nam statna kenclija praji, kak wotmysli podpěrać sylnjenje wyšich srjedźišćow, štož wona zjawnje twjerdźi. K tomu njejsmy pak ničo słyšeli“, rěka w dźensa wozjewjenym zhromadnym stejišću.

Wyši měšćanosća spomnjenych třoch městow wustupuja raznje přećiwo tomu, zo ma so jich komunam wzać status bjezwokrjesneho města a zo maja přichodnje być wobstatk přisłušneho wokrjesa. Kaž Choćebuski wyši měšćanosta Holger Kelch (CDU) rjekny, chcyše na zetkanju zhonić, „kak tomu je zwokrjesnjenje wonych­ třoch městow nuznje trěbne“. A wón přispomni: „Nochcu žanu reformu, kotraž atmosferu w kraju kazy.“ Braniborska čerwjeno-čerwjena koalicija planuje, w kraju měć jeno dźewjeć wokrjesow a bjezwokrjesne město Podstupim.

Čitaš-li wozjewjenu čornu knihu wo koncernje EPH, kotrejež wudawaćel je wobswětowa organizacija Greenpeace, so prašeš, kajku matej sakske a braniborske knježerstwo dowěru k čěskemu inwestorej. Hižo w prěnjej čornej knize, kotraž bě loni nazymu wušła, su pokazki na njepřewidne financne struktury. Dotal pak njejstej ani braniborske ani sakske knježerstwo reagowałoj a sej wěstotne naprawy nastupajo financy za rekultiwowanje žadałoj. Če­hodla nic? Kaž Greenpeace twjerdźi, hrozy dawkipłaćerjam riziko, dokelž móža na kóštach­ rekultiwowanja sedźo wostać. EPH móže swobodnje swoje předstawy zwoprawdźić. Přiwšěm móže wulki ćišć wukonjeć, wšako je zmilinjenje brunicy wažny hospodarski faktor w zwjazkowymaj krajomaj. Tež mnohe dźěłowe městna w tymle wobłuku na hračkach steja. Tak je wězo wažne je wobchować. Ale za kotru płaćiznu? Bianka Šeferowa

Cyły měsac bě wón zhubjeny – nětko su kocora Merlina žiweho z kanalizacije wućahnyli a wobsedźerce přepodali. Wčera bě pěška w Leutenbachu pola Stuttgarta mjawčenje z kanalizacije słyšała a poli­ciju wo pomoc prosyła. Policistka zalěze na to do štyri metry hłubokeho kanala a kóčku wuswobodźi. 29lětna wobsedźerka za Merlinom hižo wot srjedź decembra pytaše. Za to je samo lětaki rozdźělowała. Na jich zakładźe móžachu žonu­ nětko spěšnje zwěsćić.

Małoawto Polski Fiat 126p chcedźa pólscy fanojo ameriskemu filmowemu hrajerjej Tomej Hanksej darić. Awto su hižo kupili, zo móhli je ponowić, rjeknychu organizatorojo akcije w Bielsku-Białej powěsćerni­ PAP. Hanks bě při nahrawanju filma „Inferno“­ tajki wóz wužiwał a so do njeho zalubował. W Pólskej běchu Fiat hač do lěta 2000 twarili.