Sylniši angažement tak mjenowaneje srjedźizny Budyskeje měšćanskeje towaršnosće je trěbny, zo by so sprjewine město zaměrnišo přećiwo nacistiskim machinacijam wobarało. Dale je trjeba, zo policija w swojich rozprawach z jasnišim widom na wobstejnosće a pozadki tajkich njeskutkow zhladuje. Hesło „rozestajenja mjez młodostnymi“ dowola najwjetše spe­kulacije wo tym, što je so tam woprawdźe stało. W samsnym wokomiku přiběra strach, zo wopory policiji njedowěrjeja. A wo pobrachowacej dowěrje zastojnikam słyšachmy hižo w oktobrje na forumje w Nukničanskej barace, hdźež stejachu nadpady na serbskich młodostnych w srjedźišću. Dwěluju, zo so město Budyšin widźomnje přećiwo nacistiskim machina­cijam wobara. To z tym zwisuje, zo so bohužel přewjele wobydlerjow radšo za za­wěškami woknow chowa. Axel Arlt

„Prosće jenož kołwrótny“ mjenuje Alan Feely medijowy hołk a tołk wokoło swojeho fish-and-chips-wobchoda w sewjeroirskim Belfasće. Tydźenja bě wón skazanku młodeje žony na swoju Facebook-stronu stajił, wot toho časa telefon nastajnosći klinka. Skazarka chcyše, zo wón pola Spara zastanje a jej wottam gripowe tablety sobu přinjese. „Skazam jenož něšto k jědźi, zo bych tablety dóstała. Sym jara chora.“­ Sobudźěłaćer je jej lěk wobstarał.

Za transport mjedu do hnězda wužiwaja mrowje optimalne pomocne srědki kaž móličke kruchi hubicy. To su wědomostnicy na uniwersiće w madźarskim Szegedźe na pospytach z mrowjemi wuslědźili. Insekty wužiwaja tež srjódki, hałžki abo papjerjane šlebjerdki, zo bychu měd transportowali. Wo tym rozprawjachu wědomostnicy w fachowym magacinje Animal Behaviour.

Podstupim (SN/MiR). Braniborske ministerstwo za wědomosć, slědźenje a kultura (MWFK) je wudało nowy flajer wo prawach braniborskich Serbow. Informacije su němsce a delnjoserbsce podate. „Njeje to prěni flajer tohole razu, ale mjeztym druhi nakład“, rjekny na naprašowanje SN referent zamołwiteje kraja za naležnosće Serbow pola MWFK Měto Nowak.

Nowy flajer wo prawach Serbow bu trěbny, dokelž skutkuje jako zamołwita kraja wot lońšeho 20. septembra statna sekretarka dr. Ulrike Gutheil. Wona přewza zastojnstwo wot Martina Gorholta, kiž je wot awgusta 2016 zamołwity kraja pola Zwjazka za mjezynarodne poćahi. Nimo pokiwow na podate zakonske rjadowanja podawa flajer informacije wo zamołwitych w měsće Choćebuzu kaž tež we wotpowědnych wokrjesach Bra­niborskeje. Podaty je tohorunja zwisk k Radźe za serbske naležnosće. W dosć wosobinskich słowach Ulrike Gutheil wobydlerjow namołwja so při starosćach na nju a jeje sobudźěłaćerjow wobroćić. Zdobom jich pozbudźa, zakonske teksty ze žiwjenjom pjelnić a wjetše sebjewědomje pokazać.

Damaskus/Berlin (dpa/K/SN). Wot Ruskeje a Turkowskeje wujednany přiměr mjez wójskom knježerstwa a wěstymi skupinami rebelow so w dalokej měrje dodźerži. Silwester je jón tež Bjezstrašnostna rada UNO jednohłósnje schwaliła. K třěleńcam dochadźa pak přeco zaso z bojownikami teroristiskich zeskupjenjow, kotrež su z přiměra wuzamknjene. Němski wonkowny minister Frank-Walter Steinmeier (SPD) widźi w přiměrje šansu za trajny měr w Syriskej.

Diplomaća zaso w domiznje

Moskwa (dpa/SN). Pozdatnych ruskich hackerskich nadpadow dla z USA wupokazani ruscy diplomaća su so do swojeje domizny wróćili. Lětadło z nimi je dźensa rano na jednym z Moskowskich lěta­nišćow přizemiło. Prezident Wladimir Putin­ je dźěći pósłancow na tradicionalny nowolětny swjedźeń do Krjemla pře­prosył. Prezident USA Barack Obama bě minjeny štwórtk 35 ruskich diplomatow z kraja wupokazał. Ruska bě z akcijemi hackerow pječa wólbny bój w USA wob­wliwowała. Moskwa njeje na kročel USA ze samsnej naprawu reagowała.

Liči z bórzomnym dobyćom