Drježdźany (dpa/SN). Wólby Europskeho parlamenta je AfD w Sakskej z jasnym předskokom dobyła. Po wuličenju wšitkich hłosow dźensa rano docpěwa wona 31,8 procentow a je porno 2019 (25,3 procenty) jasnje přidobyła. Tež we wulkoměstach kaž Lipsku, Kamjenicy a Drježdźanach je AfD najsylniša móc.

Hakle z widźomnym wotstawkom slěduje strona ministerskeho prezidenta Michaela Kretschmera, CDU, z 21,8 procentami a ma tak hišće mjenje hač 2019 (23 procentow). Jasnje dobył je tež politiski nowačk w Sakskej: Zwjazk Sahry Wagenknecht je sej 12,6 procentow hłosow zdobył.

Strona zwjazkoweho kanclera Olafa Scholza, SPD, dóstanje jenož 6,9 procentow. Dalši koaliciski partner Zeleni ma 5,9 procentow, Lěwica ma 4,9 procentow.

Krajny předsyda AfD Jörg Urban je z wólbnym wuslědkom přewšo spokojom. Jemu je wažne, zo su „zeleni ekosocialisća dramatisce přisadźili“. Předsydka Zelenych Anna Cavazzini chce špatny wuslědk strony „dokładnje analyzować“.

Wólby Europskeho parlamenta politiski spektrum na prawo přesunyli

Berlin (dpa/SN). Jasne dobyće za CDU, plista za amplowu koaliciju, jasne polěpšenje AfD: Při wólbach Europskeho parlamenta je so politiska waha Němskeje do prawicarskeho směra přesunyła. AfD je mjeztym druha najsylniša móc w Němskej, we wuchodźe samo najsylniša. SPD, Zeleni a FDP dyrbja jasne straty na so wzać a docpěja zhromadnje runje hišće třećinu wšěch wolerskich hłosow. Tež Lěwica je zwrěšćiła, dokelž je ju nowy Zwjazk Sahry Wagenknecht přesćahnyła.

Kaž je zwjazkowy wólbny nawoda dźensa rano zdźělił, je so unija CDU/CSU snadnje na 30,0 procentow (2019: 28,9) polěpšiła. AfD docpěwa ze 15,9 procentami swój dotal najlěpši wuslědk w cyłoněmskim wothłosowanju (2019: 11). Na wuchodźe Němskeje je strona z wulkim wotstawkom najsylniša móc. SPD, kotraž bě so we wólbnym boju na nahladnosć zwjazkoweho kanclera Olafa Scholza spušćała, je na 13,9 procentow spadnyła (2019: 15,8). Je to najšpatniši wuslědk při cyłoněmskich wólbach scyła. Zeleni dóstanu jenož hišće 11,5 procentow (20,5). Jenož snadnje přisadźiła je FDP, kotraž dóstanje 5,2 procentaj (5,4).

Europske wólby w Sakskej pokazuja přeco trend za wólby do krajneho sejma něšto měsacow pozdźišo. To rěka: Lěwica dyrbi snadź parlament wopušćić, Zeleni a SPD maja wo to wojować, zo bychu přichodnemu krajnemu sejmej zaso přisłušeli. Předskok AfD před CDU je wot dweju na dźesać procentow rozrostł, posledni raz je CDU z „wupožčenymi hłosami“ wolerjow z lěweho spektruma na krajnych wólbach prěnje městno zakitowała – lětsa tajki potencial pobrachuje. Hłosy zapósłancow zwjazka Sahry Wagenknecht móhli rozsudne być, hač wostanje Michael Kretschmer ministerski prezident. Za dobyće direktneho mandata we Łužicy, hač Marka Šimana abo naslědnicy Alojsa Mikławška, Elaine Jenčec, trjeba CDU politiski dźiw. Wobdźělenje na wólbach bě wusahowace – w Sakskej wosom procentow wjac, nimale 70 procentow. Lud je rozsudźił, to je demokratija. Mamy to jako demokraća respektować a jako Serbja ze swojim widom wšě strony wužadować. Marcel Brauman

Drježdźany (BD/SN). Dowěra do politiki stronow z wulkej parlamentariskej tradiciju so dale a bóle drjebi. Pod tym ćerpi demokratija, kotraž měła so wobnowić – a to ze sylnišimi prawami a formami soburěčenja cyłeje ludnosće. Wo tym bě sej derje wopytane rozmołwne koło pře­zjedne, kotrež bě so na přeprošenje socialdemokratiskich jednotkow z Łužicy a sakskeje krajneje stolicy minjeny pjatk w Drježdźanskim Chinskim pawiljonje zešło. Pod moderaciju Astrid Riechmann, předsydki SPD w Budyskej měšćanskej radźe, rozjimachu juristisce zdźěłani eksperća staw a wuhlady kaž tež strachi a mjezy tak mjenowaneje direktneje demokratije.