Kónc wobmjezowanja
To a tamne (13.04.23)
Hněwajo so na bywšeho podružnika je wobsedźer domu w bayerskim Rammingenje wobsydstwo muža, kotrež po poł lěće přeco hišće w bydlenju ležeše, na wjacorych městnach w měsće wotpołožił a podružnikej daty pósłał, hdźe wěcy leža. Te wšak běchu spěšnje namakane, mjez druhim wot ludźi, kotřiž policiju wo namakankach informowachu. Policija před tajkimi akcijemi warnuje, pokazujo tež na prawniske konsekwency.
Stražu zwjazkoweje policije w Frankfurće nad Wódru je sej muž wupytał, zo by tam swój mobilny telefon nabiwał – a přińdźe na to do jastwa. Zastojnicy zwěsćichu, zo za mužom wjacorych njeskutkow dla z wukazom zajeća pytaja. Nimo toho je pólskemu staćanej zakazane, do Němskeje přińć. Zastojnicy dowjezechu 37lětneho do jastwa. Swój mobilny telefon muž w jastwje wužiwać njesmě.
Nowe plany cannabisa dla
Berlin (dpa/SN). Zwjazkowy minister za strowotnistwo Karl Lauterbach (SPD) a minister za ratarstwo Cem Özdemir (Zeleni) chcyštaj dźensa předźěłany plan nastupajo legalizaciju cannabisa předstajić. Prawdźepodobnje njeje nowa wersija tak daloko sahaca kaž prěnjotna. Tak njebudźe drje móžno, wopojny jěd we wobchodach kupować. Kóždy smě najwjace 25 gramow cannabisa za swójsku potrjebu wobsedźeć, zakoń předwidźi.
Wobaraja so wotpinjenju
Berlin (dpa/SN). Krótko do wotpinjenja poslednich třoch atomowych milinarnjow w Němskej přichodnu sobotu dale wo tym diskutuja. Wosebje ze stron FDP naprawu dale kritizuja. Liberalni chcedźa milinarnje jako rezerwu zachować. Tež fachowcy nimaja wotpinjenje za trěbne. Porno tomu Zeleni dale na wotpinjenju milinarjow wobstawaja a tež zastopnjowanje jako rezerwu wotpokazuja.
Wolóža mobilizowanje muži
Nižozemska policija je dźensa w Amsterdamje wjacorych demonstrantow ...
USA: Wobroćimy kóžde stwjelčko
3,4 miliony ludźi je offline
Přihłosuje wuprajenjam Macrona
Berlin (dpa/SN). Předsyda frakcije SPD w zwjazkowym sejmje Rolf Mützenich je wjele kritizowane wuprajenja francoskeho prezidenta Emmanuela Macrona wo róli Europy w konflikće mjez Chinu a Taiwanom zakitował. „Dyrbimy kedźbować, zo njestanjemy so z dźělom wulkeho konflikta mjez USA a Ludowej republiku Chinu. Europa dyrbi spytać, swójsku rólu namakać, zo njeby w tutym regionje jako přiwěšk USA skutkowała“, rjekny Mützenich dźensa w rańšim magacinje sćelaka ARD. Tohodla „ma Macron prawje“, rjekny Mützenich hladajo na wuprajenja francoskeho prezidenta. Zdobom Mützenich wahu Europy relatiwowaše: „Stejimy w druhim a třećim rynku. Wažne su USA a druhe staty w tutej kónčinje.“
Francoski prezident bě so na swojim njedawnym wopyće w Chinje za „europsku suwerenitu“ wuprajił, zo njeby EU w mjezynarodnej politice kaž wotročk USA wustupowała. Za tute wuprajenje běchu Macrona raznje kritizowali, wumjetujo jemu, zo chcył so we wěstotnych prašenjach wot USA wotrjeknyć.
Dźiwna njewotwisnosć
Kritizuje raznu reakciju Ukrainy
Köln (dpa/SN). Předsydka rady Ewangelskeje cyrkwje w Němskej (EKD) Annette Kurschus je hrube wotpokazanje měroweho apela wuznamnych socialdemokratow a dźěłarnikow Němskeje ze stron Ukrainy kritizowała. „Mjerzam so tuteje konstruktiwneje alternatiwy mjez dodawanjom bróni a rozmołwow dla“, rjekny wona nowinarjam. Tući běchu so ju prašeli, hač je wjesoła, zo njeje měrowy apel podpěrowała. Hewak drje by ju zastupowacy wonkowny minister Ukrainy Andrij Melnyk tohorunja „senilnu“ mjenował.
Ukrainje brónje dodawać je dale trjeba, Kurschus rjekny. Na tamnym boku njesměmy w prócowanjach wo rozmołwy popušćić, sej wona žada.
Andrij Melnyk, bywši wulkopósłanc Ukrainy w Berlinje bě pisał: „Čert a hela! Senilna to myslička, přiměr bróni z Ruskej wujednać.“ Namołwu „Za měr, přiměr a zhromadnu wěstotu nětko“, běchu sobotu tydźenja wozjewili. Wodźacy zastupnicy SPD, bywši předsyda DGB Reiner Hoffmann a bywši zapósłanc SPD Michael Müller běchu ju podpisali.
To a tamne (12.04.23)
Zatłusnjena wjewjerčka je jutry póndźelu w Dortmundźe zasadźenje wohnjoweje wobory zawinowała. Žona bě při přechodźowanju zwěrjo we wěku gullyja wuhladała. Podarmo wona spyta, wjewjerčku sama wuswobodźić. Na to wołaše wohnjowu woboru. Pomocnicy mějachu swoju lubu nuzu, dokelž „njebě rozpjeršena wjewjerčka kooperatiwna“. Skónčnje so akcija tola poradźi. Mały hrymzak zminy so na přichodny štom.
Z wjace hač 200 km/h je šofer w Badensko-Württembergskej spytał, so kontroli policije wuwinyć. Skónčnje jeho zastojnicy na štomje zajachu. 48lětny bě na nócnej honjeńcy zdźěla bjez swěcy jěł a njejapce borzdźił, zo by zražku z policajskim awtom prowokował. Na kóncu muž pěši ćěkaše. Helikopter policije jeho skónčnje na štomje sedźo wuhlada, sobujěducy chowaše so w kerku. Muž bě wopity.
