Berlin/Połčnica (dpa/SN). Zwjazkowy prezident Frank-Walter Steinmeier komunalnych politikarjow podpěruje a jim rjap skruća. Často dźě su woni wopor hidy. Dźensa je so wón do Połčnicy podał, hdźež běchu tamnišu měšćanostku Barbaru Lüke (njestronjanka) hižo wohrozyli. Kaž z naprašowanja zwjazka městow a gmejnow wuchadźa, je so kóždy pjaty komunalny politikar hižo raz z woporom hidy stał. Jednaćel zwjazka Gerd Landsberg potrjechenych namołwja, wohroženja wozjewić.
Knježerstwo chce pomhać
Berlin (dpa/SN). Zwjazkowe knježerstwo je připowědźiło, dowolnikam pawšalnych jězbow insolwentneho předewzaća Thomas Cook financielnje pomhać. Tak dźe wo pjenjezy, kotrež zawěsćernja Zurich płaćić nochce, rěkaše dźensa w telewiziji ARD. Knježerstwo je powěsć dźensa připołdnju wobkrućiło. Kaž zawěsćernja informuje, zawěsćenska suma za wšitkich njedosaha. Wšako je škoda wo wjele wjetša. Konkretne ličby hišće žane njepředleža, dotal pak wuchadźeja z wjac hač 250 milionow eurow škody.
Dale a wjac staršich dźěła
Brüssel (dpa/SN). Prezidentka komisije Europskeje unije Ursula von der Leyen je dźensa w Brüsselu swój plan za „klimyneutralnu Europu hač do lěta 2050“, tak mjenowany „green deal“, předstajiła. Tón předwidźi wobšěrny wobstatk nowych zakonjow, zo móhli zastaranje z energiju, industrijnu produkciju, wobchad a ratarstwo w běhu přichodnych 30 lět klimyneutralnje přetworić. Připowědźene naprawy maja zdobom signal klimowej konferency UNO w Madridźe a jutřišemu wjerškej EU być, kotryž ma zaměr klimoweje neutrality tohorunja na programje.
Klimowa neutralita rěka po lěće 2050 žane dalše klimje škodźace parnišćowe płuny z Europy do atmosfery njewustorkować, zo by so woćoplenje zemje na 1,5 procentow wobmjezowało. Zadźěwać chcedźa předewšěm škódnym płunam, kotrež nastawaja při spalenju wuhla, wolija a płuna, ale tež w ratarstwje.
Pulowry z hodownymi motiwami su mjez kupcami tuchwilu jara požadane, byrnjež někotre grawoćiwe byli. Tak poskićeše předewzaće Walmart na swojej kanadiskej internetnej stronje pulower, na kotrymž rumpodich drogi bjerje. Dźerži rołku w ruce, jeho woči stej chětro wulkej a na blidźe su tři rynki z běłym próškom wotmolowane. Mjeztym je Walmart poskitk wotstronił.
Prěnje němske žonjace mustwo, wobstejace ze štyrjoch Hamburgčankow, chce so na najćešim wubědźowanju swěta wobdźělić a z wosom metrow dołhim čołmom Atlantiski ocean přeprěčić. Za cyłkownje 5 000 kilometrow na wodźe planuja wone 40 dnjow a podadźa so jutře na puć. Cyłkownje 18 měsacow su so na wubědźowanje přihotowali, na kotrymž wobdźěli so sto ludźi z dwanaće krajow.
Berlin (dpa/SN). Wonkowny politikar SPD Nils Schmidt je ruskeho prezidenta Wladimira Putina wuprajenjow w padźe morjeneho Georgičana w Berlinje dla kritizował. „Sym wustróžany tajkich słowow dla“, rjekny Schmidt dźensa w rańšim magacinje sćelaka ARD. Putin bě morjeneho na kromje Pariskeje konferency wo Ukrainje „bandita a mordarja“ mjenował, kiž ma sam wjele ludźi na swědomju. Putin kritizowaše Němsku, zo njebě wona muža Ruskej přepodała.
Němska jenož na 27. městnje
Madrid (dpa/SN). Na klimowej konferency UNO w španiskej stolicy předstaji wuwićowa organizacija Germanwatch dźensa najnowši klimowy indeks, z kotrymž hódnoći prócu jednotliwych krajow w boju přećiwo woćoplenju zemje. Loni bě Němska dalše městna přisadźiła a steji nětko na 27. městnje za Słowakskej, Rumunskej a Indiskej. W Madridźe su dźensa jednanja na runinje ministrow zahajili. Němsku zastupuje wobswětowa ministerka Svenja Schulze (SPD).
Stawkuja mjeztym šesty dźeń
Madrid (dpa/SN). Zakoń wo skónčenju zmilinjenja brunicy drje po słowach statneho sekretara we wobswětowym ministerstwje Jochena Flasbartha wo dalši tydźeń přestorča – ministerstwa pak su sej mjez sobu přezjedne. Po wuprajenjach Flasbartha zakoń jutře w zwjazkowym knježerstwje hišće njeschwala, za to pak přichodny tydźeń „cyle wěsće“. To rjekny wón wčera w Madridźe na kromje swětoweje klimoweje konferency.
Hospodarske, financne a wobswětowe ministerstwo su sej „we wšitkich prašenjach skónčenja zmilinjenja brunicy přezjedne“. Zakoń rjaduje, kak měła Němska zmilinjenje brunicy a kamjentneho wuhla skónčić. Nětko dźe hišće wo jednanja Zwjazka z brunicowymi předewzaćemi wo wotškódnjenjach. Budźe-li to wotzamknjene, móža brunicowy wotrězk do zakonja zaplesć. Flasbarth je sej wěsty, zo so to hišće do hód poradźi.
Ostrava (dpa/SN). Při třěleńcy w chorowni w čěskej Ostravje je šěsć wosobow žiwjenje přisadźiło. To je ministerski prezident Andrej Babiš medijam wobkrućił, rěčo wo „wulkej tragediji“. Pozdatny třělc bě w čakarni uniwersitneje chorownje na pacientow třěleć započał a je so z pistolu „z bjezposrědnjeje bliskosće na hłowu a šiju“ swojich woporow měrił.
Po najnowšich informacijach je so třělc sam morił, prjedy hač je jeho policija dosahnyła. Wona je mjeztym foto hišće njeznateho skućićela wozjewiła. „Njeznajemy jeho motiwy“, Babiš rjekny. Čěski premier z toho wuchadźa, zo jedna so wo snano psychisce choreho jednotliweho skućićela. Po informacijach chorownje su wopory pacienća prěnjeje zastaranskeje ambulancy trawmatologije.
Policija za skućićelom pytaše, zasadźiwši tež wosebite komando a helikopter. Nutřkowny minister Jan Hamáček a Andrej Babiš staj wšitke terminy wotprajiłoj, zo móhłoj so do Ostravy podać. Chorownju běchu přechodnje zawrěli. Tež areal susodneje uniwersity bě zaraćeny.
Paris (dpa/SN). Po skónčenju wjerškoweho zetkanja nastupajo konflikt na wuchodźe Ukrainy je hosćićel Emmanuel Macron wuspěchi w dołho dlijacym so měrowym procesu wuzběhnył. Z přiměrom, cofnjenjom wojerskich jednotkow a wuměnu jatych je wjeršk prěni króć po třoch lětach we wažnych dypkach konkretne wuslědki docpěł, rjekny francoski statny prezident wčera wječor w Parisu zastupnikam medijow.
Po něhdźe wosom hodźin trajacych jednanjach běchu so wobdźělnicy wjerška wčera na to dojednali wožiwić měrowy proces na wuchodźe Ukrainy, hdźež ukrainske jednotki přećiwo proruskim separatistam wojuja. Tak chcedźa přiměr hač do kónca lěta přesadźić. Konflikt je „wotewrjena rana wosrjedź Europy“, Macron skoržeše.