Na zhromadnej nowinarskej konferency Němsko-Serbskeho ludoweho dźiwadła a hornjołužiskich nakładnistwow wčera we foyeru NSLDź informowaše jewišćo wo přichodnych wjerškach. Nakładnistwa předstajichu ćežišća na wot zajutřišeho wotewrjenych Lipšćanskich knižnych wikach a dachu dohlad do lětušeho programa.
Budyšin (SN/bn). „Mjeztym je naše zhromadne zarjadowanje z dobrej tradiciju. Dźakuju so za mjeztym 15 lět wobstejacu kooperaciju“, rjekny intendant NSLDź Lutz Hillmann. Mjez druhim skedźbni wón na lětuše lětnje dźiwadło na Budyskim hrodźe a na jewišćowy bal (wjace k tomu w jutřišim wudaću).
Ochranow (SN/at). Serbskaj přednošowarjej chcetaj program schadźowanja „Ochrachow – jako model křesćanskeje socialneje utopije“ 26. měrca w Ochranowje wobohaćić. Dr. Lubina Malinkowa z Rakec wěnuje so temje „Socialny angažement na přikładźe Ochranowskeho kubłanskeho dźěła a diakoniskich projektow mjez Serbami“. Za diskusiju wo aktualnej towaršnostnej relewancy Ochranowskeho modela su statementy planowane, mjez nimi serbskeho zapósłanca Hajka Kozela (Lěwica) wo Ochranowje a Serbach. Schadźowanje wuhotuje Załožba Modrowa zhromadnje ze studijnym nawodu Ewangelskeje bratrowskeje jednoty dr. Peterom Vogtom.
Załožbu je bywši ministerski prezident NDR dr. Hans Modrow lěta 2017 załožił. Zwisk do Ochranowa wobsteji přez jeho dźowku Irinu, kotraž zemrě kónc januara samsneho lěta. Dr. Irina Modrow dźěłaše mjez druhim jako kulturna wědomostnica na Europskej uniwersiće Viadrina a bě z dźěłom wo Ochranowskej bratrowskej jednoće 1990 promowowała. Załožba Modrowa chce nětko jeje wědomostne herbstwo dale wjesć.
Budyšin (CS/SN). Dźenikowe zapiski su něšto jara hódne. Wone swědča wo tym, što je čłowjek we wokomiku podawka myslił a začuwał. Po premjerje wudaća „Leben im Zwiespalt I“ w swojim nowym domizniskim měsće Drježdźanach je serbski basnik Benedikt Dyrlich swoje memoiry wčera w Budyskim Dźiwadle na hrodźe we wobłuku rjada „Łužiska literatura dopołdnja“ předstajił. Kaž Dyrlichowy lektor Pětr Thiemann rjekny, su zapiski basnika hłownje serbsce napisane. Z prof. Dietrichom Šołtu, wjelelětnym přećelom a přewodźerjom, nańdźechu přełožowarja do němčiny, kiž je tekst na wuběrne wašnje a adekwatnje přenjesł. Tak su Dyrlichowe zapiski šěrokemu kruhej publikuma přistupne.
Budyšin (SN/bn). Serbske jutrowne wiki su kónc tydźenja 2 500 wopytowarjow do Budyskeho Serbskeho domu přiwabili. To je něhdźe 700 ludźi wjace hač loni. Za zarjadowanje zamołwita Weronika Suchowa ze Spěchowanskeho kruha za serbsku ludowu kulturu zjima: „Wšitcy smy spokojom – my jako wuhotowace towarstwo runje tak kaž wobdźěleni ludowi wuměłcy. Ze stron wopytowarstwa njebě ani jeničkeho pohórška a mam zaćišć, zo je so hosćom jara spodobało.“
Serbska wuměłča Maja Nagelowa swjeći dźensa šěsćdźesaćiny. Rodźena Budyšanka bydli a skutkuje tuchwilu w Nossenskim měšćanskim dźělu Eula kaž tež w Drježdźanach. Na Wysokej šuli za tworjace wuměłstwo sakskeje stolicy je wona studij molerstwa a grafiki z diplomom wotzamknyła. Byrnjež tworjenje kaž tež temy jeje wuměłstwa mnohostronske a wobšěrne byli, so dwě ćežišći stajnje zaso jewitej: woda a brunica. Njezadźiwa tuž, zo so Maja Nagelowa prawidłownje z wotbagrowanjom serbskich wsow kritisce rozestaja a zo angažuje so za wobswětoškit a wobchowanje přirody – hač z instalacijemi, mólbami, performance abo we filmach. Wo tym swědči na přikład plakat za protestny „Łužiski energijowy a klimowy camp“ w Prožymju (2013). Jara jadriwa bě w tym zwisku tež zachodna twórba „Identita“ (1993/1994) w Drježdźanach. Mjez dwěmaj hromadomaj pjeršće, symbolizowacej mohili, je wona mloko a krej pomałku so skazyć dała.
Pančicy-Kukow (SN/BŠe). Zasada Serbskich Nowin je, ludźi we formje powěsćow, reportažow, interviewow, dopisow a pokiwow informować. To wuzběhny wčera šefredaktor dźenika Janek Wowčer na čitarskej rozmołwje w Pančičansko-Kukowskej „Karstenowej piwowej stwičce“, na kotruž bě tamniša Domowinska skupina přeprosyła. Něhdźe 25 zajimcam šefredaktor rozłoži, kak wšědny wječornik nastawa. Runje tak skedźbni wón na starosće, z kotrymiž so redaktorojo bědźa. Tak pobrachuje žurnalistiski dorost, kwalita zapodatych přinoškow woteběra a datowy škit wosebje nastupajo fota je wobćežny. Hladajo na razantne wuwiće digitalnych medijow je ćežko konkurencykmany wostać. „Přiwšěm zhladujemy na wobstajnu ličbu něhdźe 1 700 abonentow“, Wowčer rjekny.
Pančičan Alfons Kuring měnješe, zo měli Serbske Nowiny bóle za sebje wabić. Skerje je starši hač młódši ludźo čitaja, štož je jara škoda. „Mnozy maja serbsku nowinu za samozrozumliwu, ale njewědźa, kelko dźěła za tym tči“, wón rozłoži.
Budyšin (SN/bn). Přihotowanski wuběrk folklorneho festiwala „Łužica 2019“ je wčera aktualny planowanski staw rozjimał. „Nastupajo přihoty smy cyle we wobzamknjenym časowym ramiku, ćeže abo haćenja njejsu so dotal jewili. Wšako njejedna so wo prěni festiwal, kotryž zarjadujemy. Mamy takrjec wěstu rutinu“, podšmórny zamołwity za zjawnostne dźěło wuběrka Beno Šołta na naprašowanje Serbskich Nowin.
Přiwšěm su čłonojo přihotowanskeho dźěłoweho kružka nowince připowědźili. Swjedźenski ćah, z kotrymž so festiwal 4. julija w Budyšinje zahaji, změje porno dotalnym zarjadowanjam změnjenu čaru. Wobdźělnicy njepředstaja so lětsa na Hłownym torhošću, ale na Žitnych wikach. „To ma dwě přičinje: Sprěnja naměsto pod radnicu w lěću ponowja, tak zo tam w tym času žane wjetše zarjadowanja móžne njebudu. Zdruha drje su Žitne wiki atraktiwniše stejnišćo. Na centralnišim městnje zbudźimy wjace kedźbnosće“, Šołta rozłoži.
Wotewrjenski wječorny program po swjedźenskim ćahu njewuhotuja wjace pod hołym njebjom na Budyskim hrodźe, ale na hłownym jewišću Němsko-Serbskeho ludoweho dźiwadła.