Frankfurt nad Wódru (SN/at). Lětuši Hudźbny festiwal nad Wódru je so ze swjedźenskim aktom minjeny pjatk w Frankfurće nad Wódru zahajił. Program wopřijima hač do 22. měrca wjace hač 20 koncertow a dalše zarjadowanja w dźewjeć němskich a pjeć pólskich městach.
Prěni hudźbny wjeršk bě sinfoniski koncert minjenu sobotu w Zielonej Górje, partnerskim měsće Choćebuza. Zaklinčeli su tam twórby Edvarda Elgara, Pjotra Iljiča Čajkowskeho, Czesława Grabowskeho a Ludwiga van Beethovena. Koncert wuhotowachu Zielonogórska filharmonija, chór Šleskeje filharmonije a chór Szczecinskeje akademije wuměłstwa. Njedźelny zahajenski koncert w Frankfurtskej koncertowni „C. P. E. Bach“ steješe cyle w znamjenju pasiona po Mateju, předstajeny wot wulkeho chóra Spěwneje akademije a Braniborskeho statneho orchestra Frankfurt.
Europska uniwersita Viadrina je pólske wučbnicy wo starym němskim pismje wozjewiła.
Frankfurt nad Wódru/Słubice. Z wonym dwójnym wudaćom dóstawaja mnozy pólscy wužiwarjo archiwow pomocny kluč k zašłosći do rukow: Pod titlom „Dawne pismo niemieckie“ („Staroněmske pismo“) je na Europskej uniwersiće Viadrina Frankfurt nad Wódru pólska wučbnica wo hač dosrjedź 20. lětstotka rozšěrjenym němskim kurrentowym rukopisu wušła. Wudospołnjena je kniha z ekstra za to wuwitym zwučowanskim zešiwkom „Kurrenta“ za pisanje a čitanje pisma. Wobě wozjewjeni nastaštej na katedrje za pomnikowědu Viadriny w zhromadnym dźěle z Institutom za nałožowane stawizny. Podpěru dóstachu tež ze stron pólskeho statneho archiwa w Poznanju. Spěchowany bu projekt ze srědkami społnomócnjeneje zwjazkoweho knježerstwa za kulturu a medije kaž tež Regenburgskeje załožby Sanddorf.
Wuhotować jendźelske zahrody a parki je w hrabi Hermannje von Pückleru hłuboki zaćišć zawostajiło. To podšmórnyštaj diplomowaj historikarjej Christian Friedrich a Volkmar Herold z Choćebuza minjeny tydźeń na přednošku wo Pückleru w Delnjowujězdźanskej radnicy. Přeprosyło bě na njón Spěchowanske towarstwo Adelspädagogium-Dannenberghaus Uhyst, a wjac hač dwaceći zajimcow je přišło.
Serbski institut poskići zhromadnje z wjacorymi partnerami wědomostnemu dorostej znowa forumaj za nawjazanje stykow, wuměnu a diskusiju. Ćežišći stej sociologija a sorabistika.
Fulda/Budyšin (SN/bn). Sekcija krajina, agrarna a zežiwjenska sociologija Němskeje towaršnosće za sociologiju (DGS) a Serbski institut (SI) wuhotujetej w meji druhi raz dźěłarničku za młodych wědomostnikow. Třidnjowske zarjadowanje ma tomu słužić, „doktorandkam a doktorandam kaž tež młodym wědomostnikam, přihotowacym fachowu publikaciju, w přihódnej wokolinje a konstruktiwnej atmosferje ćežišćowe dźěło, nawjazanje stykow a wuměnu idejow zmóžnić“, kaž we wopisanju projekta rěka. Nimo „intensiwnych wědomostnych diskusijow“ wopřijima dźěłarnička tež „zhromadne aktiwity w regionje“. Po swójskim zajimje móža sej wobdźělnicy indiwidualny program zestajeć.
Budyšin (SN/bn). Lipšćanski stawiznar Hartmut Zwahr je wčera w Budyskej Smolerjec kniharni swój prěni roman „Rozžohnować so“ předstajił. Wjednica předawanišća Annett Šołćic witaše něhdźe 30 zajimcow a poda krótki přehlad najwažnišich žiwjenskich datow profesora na wuměnku, čłona Hornjołužiskeje towaršnosće wědomosćow a wjelelětneho poradźowaceho sobudźěłaćerja Serbskeho instituta. Birgit Röhling, w kotrejež nakładnistwje Sax bě roman wušoł, na to wuzběhny, zo „je prěnička Hartmuta Zwahra zdobom tež za nas premjera. Naše nakładnistwo je na stawizny a fachowu literaturu specializowane. Wěcne knihi Zwahra na přikład smy wuspěšnje publikowali. Z jeho romanom chcemy so nětko trochu wobšěrnišo nastajeć. Dotalne recensije nam wobswědčeja, zo njejsmy cyle wopak jednali.“
Mjeztym zo nory hišće póstniske a karnewalowe ćahi přihotuja, hotuja so ludźo z knižneje branše hižo pilnje na wažny event: W měrcu Lipšćanske knižne wiki znowa swoje wrota wotewru. Čitarjo listuja w dołhich lisćinach nowowudaćow za zajimawymi knihami, sćěhuja hižo prěnje recensije a wjesela so na wokomik, hdyž móža tajku cyle nowu, runje z ćišćernje dóšłu knihu do ruki wzać. Něšto, štož tež najlěpša kniharnja njezmóžni, dožiwi čitar jeničce na knižnych wikach – z nimale kóždeho wobłuka, wot beletrije hač k fachowym publikacijam, k tomu mnóstwo digitalnych poskitkow, wšo a wšitko hodźi so do ruki wzać, naposkać, zaso nabok połožić abo hnydom na městnje kupić. A z trochu zbožom móže sej zajimc knihu samo wot awtora signować dać.
Tři nowe zynkonošaki skića zajimcam móžnosć, bohaty spektrum serbskeje hudźby dale, znowa abo snano tež prěni raz docyła sej wotkryć. Skupina Lídova muzika z Chrástu poskića čerstwy wid na serbsku ludowu hudźbu, Heidemarja Wiesnerec zhladuje na „150 lět Serbskeje klawěrneje hudźby“ a Serbski rozhłós je zběrku aktualnych popularnych štučkow zestajał. Produkciju wšitkich CDjow je Załožba za serbski lud spěchowała.
Najnjewšědniša z třoch cejdejkow rěka „Za čěskimi horami“. Na njej prezentuje skupina Lídova muzika z Chrástu cyłkownje 25 „spěwow Łužiskich Serbow“ – zdobom to podtitul edicije – a přidatnje tři nowe kompozicije, inspirowane wot tudyšeje kultury. Pola nas znate pěsnje pak njezaklinča tak, kaž smy to najskerje zwučeni, ale we wobdźěłanjach. A sadźby so zdźěla chětro wot tradicionalnych aranžementow rozeznawaja.