Sport (10.06.16)
Posledni test wubranki
Njedźelu, 12. junija, wot 11 hodź. nastupja holcy a žony Serbskeje koparskeje wubranki w Pančicach přećiwo žónskemu mustwu SV Großnaundorf. Sudnica hry budźe Lea Krječmarjec z Wulkeho Wjelkowa, asistentaj Kilian Hrjehor z Róžanta a Dominik Wjeńka z Pančic-Kukowa. Je to zdobom posledni test wubranki do europeady.
EVSE wuhotuje turněr
Energijowy zastaraćel Čorny Halštrow (EVSE) wuhotuje zajutřišim, njedźelu, w Kulowje štwórty koparski turněr za dorost. Na nim wobdźěla so mjez druhim koparki a koparjo z Horow, Rakec, Njebjelčic, Ralbic, Kulowa a Ćiska. Přeprošene je pjeć cyłkow młodźiny F a pjeć młodźiny D. Turněr započnje so w 14 hodź., z mytowanjom liča wokoło 17 hodź.
Sportowy swjedźeń
W Rakecach přewjeduja wot dźensnišeho hač do 12. junija sportowy swjedźeń. W poskitku maja tam dźensa, jutře a njedźelu najwšelakoriše sportowe zarjadowanja a turněry. Zajutřišim hraje mjez druhim młodźina B Dynama Drježdźany přećiwo młodźinje A z Rakec. Zakop je w 14. hodź.
Streetsoccer-wubědźowanje
Šram najrjeńše wrota docpěł
ST 1922 Radwor
– ST Wóspork/Hodźij 9:1 (5:1)
Zestawa domjacych: Wróbl – Sćapan, Henke, Bauer, Nuk, Šram, Zähr, Buša (83. Wünderlich), Šěrak, Omran, Schulze (86. Bischof)
Beachvolleyballisća Serbskeho gymnazija Budyšin sej bronzu ...
Najstarša šulerska starobna skupina w beachvolleyballu (9. do 11. lětnik) je při Olbersdorfskim jězoru pola Žitawy wuchodosakske wubědźowanja „Młodźina trenuje za olympiju“ zakónčiła.
Znowa dobyli
Sokoł Ralbicy/Hórki II
– Wětnica/Hola 4:0 (3:0)
Zestawa domjacych: Bjeńš – Materna, M. Matka, Zynda, Čornak, Bogusz, Rawš, Kurjat (81. Cyž), Serbin (65. Serbin), J. Matka, Šmit
Po dobytej hrě přećiwo koparjam Łužicy Wojerecy chcychu Sokoljo wězo tež partiju přećiwo předposlednjemu tabulki z třomi dypkami zakónčić. Tuž derje započachu a dachu bul běžeć. Dwójce kombinowachu so do šěsnatki přećiwnika, tola poslednja preciznosć pobrachowaše. Kurjat so w 24. min. tróšku zaměri, jako wólny kop z połlěweje strony na žerdź sadźi. Dwě mjeńšinje po tym skónčnje klinkaše. Čornak sflankowa z praweje strony do šěsnatki, a Jurij Matka běše spěšniši hač wrotar a bul do klětki suny. Druhe wrota padnychu po dwójnej kombinaciji Šmit–Čornak–Šmit, kiž zymnokrejnje přetwori (38.) Nimale z wothwizdanjom prěnjeho połčasa poradźi so Šmitej 3:0 (45.).
Ze změrowacym předskokom móžachu domjacy druhi połčas tróšku měrnišo nastupić. Wo štwórte wrota postara so Jurij Matka, jako bu znowa rjenje swobodnje hraty a wrotarja Wětnicy/Hole přewiny. Zasłužbnje zawěsćichu sej Sokoljo tři dypki.
Beachvolleyballisća SGB druhi raz w sakskim finalu
Šulerjo Serbskeho gymnazija Budyšin (SGB) dobychu w tudyšej Sprjewinej kupjeli wšitke hry a dóstachu za to złotu medalju. Jutře, 9. junija, pojědu ći ze starobneje skupiny IV (5. do 7. lětnik) na krajne finale do Drježdźan.
Maturantki a wučerjo dobyli
Rjana tradicija na Serbskim gymnaziju Budyšin (SGB) je, zo wučerjo a rozžohnowacy so abiturienća na kóncu šulskeho lěta hišće raz při wysokim saku mocy měrja. Volleyball je na serbskim kubłanišću nade wšo woblubowany.
Wčera tydźenja dóńdźe k sportowemu duelej muskeje generacije. Mnozy šulerjo widźachu w sportowej hali Serbskeho šulskeho a zetkawanskeho centruma optimalny start swojich dwanatkarjow. Woni jich mócnje pohonjowachu, štož wjedźeše k jasnemu předskokej 20:15. Wučerjo dyrbjachu so najprjedy na hrajnišću namakać, dokelž běštaj sylnaj nadběhowarjej Maćij Čižank a Roman Grzyb krótkodobnje wupadnyłoj. Tak zwosta jich pjeć pedagogow, kotřiž dźakowano wjetšej rutinje sadźbu hišće z 25:22 za sebje rozsudźichu. Wuspěšny kónc přinjese aktualnemu wokrjesnemu mištrej wučerskeje ligi wjac měra a stability do hrajnych akcijow. Tak přesadźichu so woni tež w přichodnymaj přechodomaj z 25:19 a 25:16.
Srjedźoněmski mišter we volleyballu
Štyrjo volleyballisća Budyskeje FSG a třo hrajerjo ST Marijineje hwězdy dobychu zhromadnje w Dessauwje Srjedźoněmski cup seniorow w starobnej klasy muži nad 50 lětami. Šěsć cyłkow – stajnje po dwěmaj z Durinskeje, Saksko-Anhaltskeje a Sakskeje – wojowaše w turněrowej formje wo medalje a rjany pokal.
Partija jednostronska była
SV Haselbachtal
– ST Marijina hwězda 0:3 (0:1)
Zestawa hosći: O. Schmidt – Wróbl, Łušćanski, T. Jurš, Lipič, Peschmann, Bělk, D, Jurš, Rab, Korjeńk (89. P. Schmidt), Winkler (85. Škoda)
K předposlednjej wonkownej dypkowej hrě sezony 2015/2016 podachu so koparjo ST Marijineje hwězdy do Rychbacha. Přećiwo třećemu najlěpšemu teamej druheje połserije SV Haselbachtal chcychu woni špatny derbyjowy wukon spěšnje zabyć. Tak hižo w 7. min. nawjedowachu. Překrótko wotwobarany bul třěli Lipič zaso do šěsnatki k Dawidej Juršej, kiž k 0:1 přetwori.
Wuslědki (07.06.16)
Wokrjesna koparska liga, stafla III
Njebjelčicy – Großröhrsdorf II 4:0 (2:0)
Ottendorf/Liegau – Wóslink/Ska. 3:0 (1:0)
Großharthau – Frankenthal 1:2 (1:1)
Haselbachtal – Marijina hwězda 0:3 (0:1)
Němske Pazlicy – Hlinowc 5:0 (2:0)
1. Ottendorf/Liegau 24 63 : 22 59
2. Frankenthal 24 70 : 33 58
3. Großnaundorf 24 67 : 32 49
4. Großröhrsdorf II 25 44 : 33 43
5. Arnsdorf 24 58 : 27 42
6. Njebjelčicy 25 50 : 36 41
7. Marijina hwězda 24 70 : 46 39
8. Haselbachtal 25 53 : 57 38
9. Sepicy 24 65 : 59 35
10. Němske Pazlicy 24 41 : 49 30
11. Hlinowc 24 34 : 63 18
12. Wóslink/Skaskow 24 27 : 64 12
13. Großharthau 24 24 : 75 12
14. Großdrebnitz 25 28 : 98 11
Domjacy koparjo njesměrnje efektiwni byli
Sokoł Ralbicy/Hórki – ST Ćisk 3:1 (2:0)
Zestawa domjacych: Gloxyn – Šewc, Schultz, B. Bjeńš, Lulak, Šołta, S. Bjeńš, Wałda, Korjeńk (87. Matka), Domaška (80. Kurjat), Bejma
Wčera popołdnju witachu w Ralbicach koparjow z Ćiska. Tele hry běchu w minjenych lětach stajnje jara bojowniske a nimale přeco doby na kóncu Sokoł. Tež tónkróć tomu tak bě, byrnjež hosćo wjac hrajnych podźělow měli. Hižo w 5. min. pak nawjedowachu domjacy 1:0, jako Bejma zymnokrejnje přetwori. Na to tłóčachu Ćišćenjo na wurunanje, domjacy pak wšitke rozsudne dwuboje dobychu, druhdy pomhachu sej tež z foulom. Kóždy wólny kop abo róžk přećiwnika pak bě tak strašny, zo so w šěsnatce stajnje paleše. Někotryžkuli raz dyrbješe Gloxyn z poslednim zasadźenjom wrotam zadźěwać. Z druhej prawej šansu steješe po poł hodźinje nadobo 2:0 za Sokoł. Rjana kombinacija přez Šołtu, Wałdu a Stefana Bjeńša docpě w šěsnatce Domašku, kiž suny bul do dołheho kuta. Efektiwnišo njemóžeš jako mustwo wustupować.
