Aus der aktuellen Ausgabe vom Mittwoch, 20 September 2017

Strachi, twjerdźenja a připowědźe njewoprawnjene byli

Moskwa (ČŽ/K/SN). Tydźeń trajacy rusko-běłoruski manewer Zapad 2017 je tak derje kaž nimo, a hranicy na Baltikumje a druhdźe na wuchodźe su dale tajke kaž do 13. septembra. W žanych medijach njeje ani noticki wo tym, zo bychu ruscy wojacy z běłoruskimi hromadźe něhdźe teritorij NATO nadpadnyli a zo bychu jich tanki tam něšto rozbili.

Smě so tuž za to měć, zo wotmě so manewer Zapad 2017 w zaměrowym wobłuku, za kotryž bě wot ruskeho zakitowanskeho ministerstwa připowědźeny. Dźěše wo strategiski trening zakitowanja a wotwobaranja terora. We wuchodnych kónčinach Ruskeje a Běłoruskeje je 12 200 wojakow (5 000 ruskich a 7 200 běłoruskich), 70 lětadłow a helikopterow, 250 tankow, dwěsćě kanonow a dźesać wójnskich łódźi operowało.

Gastronomija sej dźensniši dźeń zawěrno lochko nima. Raz hosćencarjo dodźěłać njemóža, dokelž njewočakowano wjele ludźi přińdźe, raz wostanje hosćenc prózdny. Ćim bóle dyrbiš hódnoćić, štož Budyscy korčmarjo kóžde lěto na nohi stajeja. Woni­ njeorganizuja jenož kóždu prěnju sobotu w meji korčmowy festiwal, ale stajnje 2. oktobra tež korčmarsku kermušu jako­ dźak hosćom za wopokazanu swěru. Tajkile wječor móžeš sej woprawdźe lubić dać a njetrjebaš za njón sam ničo orga­nizować. Hdyž w dźesać hosćencach najwšelakoriša live-hudźba zaklinči – w Culinariumje samo serbska –, je to kaž přeprošenje, při darmotnym zastupje do korčmow pohladnyć a při piwje abo winje chwilu na hudźbu słuchać. Potom dale ćehnješ abo cyle jednorje trochu po měsće dundaš. To so njech hišće něchtó hórši, zo so w sprjewinym měsće ničo njestawa. Ja znajmjeńša sej iniciatiwu Budyskich korč­marjow­ jara wažu. Marian Wjeńka

Nastupajo wuslědk wurjadneho posedźenja­ Budyskeho wokrjesneho sejmika reagujetej opoziciskej stronje Lěwica a Zwjazk 90/Zeleni z porokom ministerskemu prezidentej Stanisławej Tilichej (CDU).

Traktor je runje na wsach prěnjorjadny ratarski grat, hodźi pak so tež derje za wólbny bój. Wo tym běchu młodźi čłonojo Serbskeje Lěwicy přeswědčeni. Benjamin Hrjehor z delnich Sulšec a Ignac Wjesela z Chrósćic staj traktor wotpowědnje spřihotowałoj a so za to zhromadnje ze zapósłancom Sakskeho krajneho sejma Hajkom Kozelom na turu podałoj. Mjez druhim w Chrósćicach, Pančicach-Kukowje, Miło­ćicach, Njebjelčicach, Sernjanach, Koslowje a Njeswačidle su wólbny bój wčera tuž tróšku hinak dožiwili. Foto: Feliks Haza

Mjezynarodnu zahrodnu přehladku w Berlinje wopytał

Hač do 15. oktobra hišće je Mjezynarodna zahrodna přehladka (IGA) w Berlinje přistupna. Po­dawk to, kotryž so jenož kóžde dźesać lět wotměwa, Zwjazkowa zahrodna přehladka (BUGA) porno tomu kóžde druhe lěto. Toho­dla njech je na tymle městnje hišće raz na to skedźbnjene. Snano so tón abo tamny přichodne dny tola hišće rozsudźi sej wustajeńcu w stolicy wobhladać. Za to tule někotre wužitne pokiwy:

Za měšćansku štwórć Marzahn-Hellersdorf ma zahrodna přehladka wulki wu­znam. Jako so Berlinski senat město Tegela mjez druhim masiwnych wobydlerskich protestow dla za nowotwarsku štwórć na wuchodźe Berlina rozsudźi, bě to dosć chrobłe. Zwostachu mjenujcy jenož hišće tři lěta, zwoprawdźić projekt IGA. Bě mudre, „Zahrody swěta“, wote­wrjene 1987 składnostnje 750. róčnicy Berlina, jako centralne městno přehladki zapołožić a z Kienbergom a Wuhletalom powjetšić na dobre 104 hektary, štož wotpowěduje 140 koparskim hrajnišćam.

Wólnočasni volleyballisća Viktorije Worklecy su turněr wo pokal spěchowanskeho towarstwa Serbskeho gymnazija Budyšin suwerenje dobyli a tak do serije „top-šěsć“ wuspěšnje startowali.

Je jónkrótne we Łužicy, zo wojuja serbscy volleyballisća prawidłownje na šěsć turněrach wo dypki při wysokim saku.

Prěni hrajny dźeń noweje sezony wjedźeše volleyballistki Viktorije Worklecy do Běłeje Wody. Tam nastupichu młode Běłowodźanki přećiwo žonam z Haselbachtala a dobychu w tiebreaku ze snadnym 15:12. Tak startowachu euforisce do přichodneje hry přećiwo Dźiwim mickam. Wone hrajachu prěni raz po nowym běhanskim systemje a přesadźichu so z dobyćom 3:1. Přichodny hrajny dźeń Viktorije Worklecy budźe­ 30. septembra doma. To přijědźetej potom mustwo ze Zhorjelca a třeće zastupnistwo ze Žitawy. Foto: Melanie Spiesec

W Trjebinskej gmejnje njewola přichodnu njedźelu jeno zapósłancow noweho­ zwjazkoweho sejma, ale tež noweho wjesnjanostu resp. nowu wjesnjanostku. Wo zastojnstwo prócujetaj so Ariane Kraink a Waldemar Locke.

Trjebin (AK/SN). Hórnistwo Trjebinsku gmejnu hižo wjele lět poćežuje. Brunicoweje jamy Wochozy II dla wobydlerjow Miłoraza přesydla. Haru, proch a spadowacu dnownu wodu pak maja tež w Trjebinje samym. Štóž přichodnje čestnohamtsce na čole gmejny steji, změje tuž wjele dźěła.

Zdźěla wotpušćeny Budyski spjaty jězor skići tele dny wosebite wobrazy, kotrež drje fotograf přichodne lěta hižo zapopadnyć móc njebudźe. Nimo zbytkow domow bywšich Małsec wuhladaš tam samo zdónki podrězanych štomow. Wone stejachu něhdy podłu dróhi­ do wsy, zhubjeneje z twarom spjateho jězora. Foto: SN/Maćij Bulank

Iniciatiwa za wobmjezowanje wobstatka wjelkow žněje dobry wothłós

Njeswačidło/Koslow (JK/SN). Wobsah a zaměr peticije je rěčnik iniciatiwneje skupiny za wobmjezowanje wobstatka wjelkow we Łužicy, Koslowčan Jurij Leb­za,­ čłonam Njeswačanskeje gmejnskeje rady na jich zašłym posedźenju rozłožił. Zdobom chcyše wón komu­nalnych politikarjow wo tym informować, kak wobydlerjo Budyskeho wokrjesa w naležnosći postupuja. Čłonojo gmejnskeje rady widźa w tym demokratiske prawo starosćiwych wobydlerjow. Z podpěru Njeswačan­skeje gmejny, ale tež dalšich, kotřiž su wo zaměrach iniciatiwy zhonili, su wuhlady dobre, być z peticiju w Sakskim krajnym sejmje wuspěšni.