Magdeburg (SN). Saksko-anhaltski ministerski prezident Reiner Haseloff (CDU) warnuje před tym, ze zwadu wo brunicy nowy konflikt mjez wuchodom a zapadom Němskeje zahajić. Kaž wón rozhłosej MDR Aktuell w rozmołwje rjekny, nowe zwjazkowe kraje energijowu změnu hakle zmóžnjeja. „W Sakskej, Saksko-Anhaltskej a Braniborskej su minjene 27 lět štyri króć wjace wuhlikoweho dioksida zalutowali hač w zapadnych zwjazkowych krajach. Na to ma so w bilancy skedźbnić. Zo dyrbja zaso wone přichodny krok k docpěću klimowych zaměrow zdźěłać, to njeńdźe.
Reiner Haseloff rjekny, zo njehodźa so klimowe zaměry hač do lěta 2020 z brunicu samej docpěć. Čini-li so wšitko z brunicu, so cyłe hospodarstwo hižo njeliči, a inwestorojo so wróćo sćahnu. Porno tomu namołwja wón hospodarske předewzaća na zapadźe, kotrež sej spěšny kónc wudobywanja brunicy žadaja, wutworić dźěłowe městna. Tak njeměł koncern Siemens na wuchodźe žane stejnišća zawrěć, ale měł nowe wutworjeć.
Budyšin (SN/mwe). Financny wuběrk Budyšina je na swojim posedźenju dźens tydźenja přilubjenu sumu 25 000 eurow za sobufinancowanje integraciskeho centruma w Budyskim Sprjewinym hotelu cofnył. Kaž we wozjewjenju města rěka, je pozadk toho, zo bě wotnajenske zrěčenje mjez wobhospodarjenskej towaršnosću a krajnoradnym zarjadom Budyšina jako zaměstnjenskim zarjadnistwom k 30. junijej wuběžało. „W přezjednosći ze sakskej statnej kencliju, Budyskim wokrjesom kaž tež Budyskim wyšim měšćanostu Alexanderom Ahrensom (SPD) wupraji so wobhospodarjenska towaršnosć zwólniwa, zarjadnišćo hač do kónca lěta dale wobhospodarjeć“, rěka we wozjewjenju města. 28 tuchwilu tam zaměstnjenym ćěkancam z připóznatym statusom přebywanja w Němskej chcedźa nětko bydlenja w měsće a wokolinje sposrědkować a jich do wšědneho žiwjenja pola nas integrować.
Zo bě ze smjerću dr. Franka Stübnera a z rozpušćenjom jeho nakładnistwa Lusatia tež kónc Hornjołužiskeje domjaceje protyki jasny, bě zrudźacy pódlanski efekt. Tak so zdaše, zo bě lońše jubilejne wudaće jara woblubowaneje publikacije zdobom poslednje. Ćim rjeńšo je, zo je so z dr. Larsom-Arne Dannenbergom něchtó namakał, kiž chce rjad dale wjesć – po mnohich naprašowanjach kaž tež přećach wjacorych awtorow a dalšich zajimcow. Dannenberg je renoměrowany wědomostnik kaž tež nazhonity wudawaćel na polu regionalnych publikacijow. Wón chce charakter protyki wobchować, a k tomu tež słuša, zo su serbscy awtorojo respektiwnje serbske temy dale zastupjene. To je jara chwalobne. Prěnje wudaće Hornjołužiskeje domjaceje protyki druheje eksistency je nimale doćišćane. Móžemy tuž wćipni być, kajka wona wupada.
Cordula Ratajczakowa
ZAJIMCOW je tójšto, kotřiž chcyli so z přichodnym čěskim prezidentom stać. 19 ludźi je so pola nutřkowneho ministerstwa přizjewiło, dać so w januaru na hłowu stata wuzwolić. Wěste wšak je, zo wjacori z nich zakonske žadanja njespjelnjeja. Na přikład nimaja trěbnu ličbu jich podpěrowacych senatorow abo wolerjow. Před pjeć lětami bě so z dwaceći přizjewjenych kandidatow naposledk dźewjeć na wólbnu lisćinu dóstało.
Delnja Łužica přisłušeše w 16. lětstotku z wulkeho dźěla Čěskej krónje, a nic kurwjerchowstwu Sakskeje, kaž smy w interviewje z nawodu Choćebuskeho měšćanskeho muzeja Steffenom Krestinom we wudaću SN z 9. nowembra mylnje pisali. Prosymy wo zamołwjenje.
Redakcija SN
Pod nadpismom „Koho zajimuje wčerawši sněh?“ kritizuje Radworčan Jan Nuk aktualnosć rozprawnistwa wo sportowych podawkach ze serbskimi cyłkami w SN:
Kaž zawěsće mnozy čitam tež ja rady w Serbskich Nowinach wo sportowych podawkach našeje wokoliny. Předewšěm zajimuja mje wuslědki koparskich hrow serbskich mustwow z kónca tydźenja. Jako Radworčanej pak je mi napadnyło, zo wozjewja redakcija rozprawu wo hrě Radworskeho prěnjeho mustwa bjezwuwzaćnje jako poslednju po rozprawach wo hrach wšěch tamnych mustwow. To drje bych jako přiwisnik kopańcy hišće na někajke wašnje znjesł. Hdyž pak wozjewjeja jenički serbski dźenik rozprawu hakle we wudaću po dalšim kóncu tydźenja, to rěka dźesać dnjow po hrě, da swět hižo njerozumju.
Dźěći a młodźinu za něšto zahorić, štož njeje z internetom, telewizorom abo z hudźbu zwjazane, njeje dźensniši dźeń docyła tak lochko. To nazhonjeja starši runje tak kaž kubłarki a kubłarjo.
Radwor (BHR/SN). Wot spočatka šulskeho lěta poskića Kamjenjan Křesćan Sćapan na Radworskej wyšej šuli „Dr. Marja Grólmusec“ we wobłuku cyłodnjowskich poskitkow kurs za nawuknjenje šacha. Dwójce wob tydźeń zetkawa so wón z wjacorymi zajimcami, zo by jim pomhał sej potajnstwo tejele hry wotkryć. Nimo sposrědkowanja teorije a taktiki pak je jemu tež porjadne nałožowanje serbšćiny w njewšědnym wobłuku wažne.
Budyšin (SN/MWj). Wonkownje wot wčerawšeho dwanaće metrow wysoka jědla na Budyskim Hłownym torhošću na to pokazuje, zo wotměja so tam, na Bohatej hasy a na Žitnych wikach wot 1. do 23. decembra lětuše Wjacławske wiki, a to 634. raz. Nowe porno zašłym lětam je, zo započnu so wone wšědnje w 11 hodź. a nic kaž hewak hodźinu zašo, z čimž je město přećam wikowarjow wotpowědowało. Něhdźe 90 wikowarjow a gastronomow chce lětsa swoje wudźěłki poskićeć.
Za čas wikow je kulturny běrow města wobšěrny kulturny poskitk zestajał, a tón wopřijima tohorunja serbske dypki. Tak wuhotuje chór Budyšin 2. decembra w 15.30 hodź. na Hłownym torhošću pod nawodom Michała Jancy adwentny koncert, poł hodźiny pozdźišo budźe Wojerowske dźěćatko z přewodźerkomaj na hasach po puću. Wšědnje w 15 hodź. wočini rumpodich z dźěćimi adwentne woknješko, 6. decembra z hortowymi dźěćimi Budyskeje Serbskeje zakładneje šule. Samsny dźeń koncertuja Bošečanscy dujerscy muzikanća. Sobotu, 9. decembra, wuhotuje Židźinski chór pod nawodom Kerstin Liederoweje na Hłownym torhošću adwentny koncert.
Njebjelčicy (AKr/SN). Runje tak kaž w druhich póstniskich centrumach Hornjej Łužicy su minjenu sobotu dypkownje w 11.11 hodź. tež nory Serbskopazličanskeho karnewaloweho towarstwa ceptar w gmejnje přewzali. Symboliski kluč a křinju za pjaty počas přewostaji jim zastupowacy wjesnjanosta, kiž bě ekstra do gmejnskeho zarjadnistwa přijěł. Na to poda so amtěrowacy princowski por princ Daniel II. z princesnu Bernadet I. z radu jědnaćoch na farsku žurlu. Tam běchu tež princowske pory zašłych lět k wobjedu prošene.
Wječor zahajichu nowu, mjeztym hižo 48. karnewalowu sezona z wólbami noweho princowskeho pora. Wězo so wopytowarjo prašachu, štó drje to lětsa budźe. Na wotmołwu wšak dyrbjachu hišće chwilu čakać.