Aus der aktuellen Ausgabe vom September 2018

Šesćo na jednym, jedyn na tamnym boku: Tajka konstelacija njeje na nowinarskej konferency njewšědna. Zwjetša rěči potom jednotliwc a wotmołwja na prašenja zastupjerjow medijow. Wčera bě to nawopak, wuhotowarjo rozjimachu jeničkemu reporterej wobšěrny program interkulturnych tydźenjow. Je zajim na dobrym, často čestnohamtskim dźěle iniciatiwow, towarstwow kaž tež zastojnikow městow a wokrjesa woprawdźe tajki snadny? Organizatorojo móža wabić, kelkož chcedźa – dołhož nichtó njerozprawja, jich projekty jenož tych docpěja, kotřiž tak a tak hižo wo nich wědźa. Wusměrjene pak je zarjadowanje na (snano hižo starosćiwych) wobydlerjow. Zetkanje a wuměna wo wjele wjace wuskutkujetej hač žadanja, zakonje, namołwy a skanděrowanje parolow, dźe-li wo to, z „cuzymi“ so zeznajomić a předsudki přewinyć. Bohužel dyrbju so wospjetować: Integracija njeje jedno­směrowa hasa. Bosćan Nawka

Praha (ČŽ/K). Přerězna měsačna mzda je w Čěskej w druhim kwartalu 2018 z 8,57 procentami znowa nadpřerěznje přibyła a wučinja nětko rekordnych 31 851 krónow. Dźiwajo na inflacisku ratu a zwyšenja płaćiznow zwyši so realna mzda wo 6,2 procentaj. To wozjewi Čěski statistiski zarjad tele dny.

Postupili su mzdy bjez wuwzaća we wšitkich hałžkach industrije, wo 13,1 procent wosebje sylnje w kulturnym, zabawjenskim a turistiskim sektorje. Najwyšu přerěznu mzdu 39 668 krónow maja tradicionalnje w Praze. Najniša je wona ze 27 741 krónami w Karlovarskim wobwodźe. Nastupajo jednotliwe branše płaća w bankownistwje a zawěsćerni­stwje najwyše přerězne mzdy, mjenujcy 58 591 krónow. W Morawsko-šleskim wobwodźe zasłužeja dźěłopřijimarjo z 28 585 krónami přerěznje najmjenje.

Přerězna mzda w Čěskej wot lěta 2014 njepřestajnje přibywa. Tele wuwiće pohonjatej dobre hospodarske połoženje kraja kaž tež ćišć na mzdy čućiweho njedostatka fachowych dźěłowych mocow dla. Fachowcy su sej wěsći, zo dobre wuwiće tež přichodne lěta dale traje.

We wobłuku swjedźenskeje Božeje słužby składnostnje 750. róčnicy Wojerec su minjenu njedźelu w tamnišej Janskej cyrkwi na stawizniske wuwiće města zhladowali. Žony činjachu to w historiskich drastach. Wojerowsku drastu woblečena bě Židźinjanka Weronika Boswankowa (naprawo). Zhromadnje z Annett Hansetz, tohorunja ze Židźinoho, wona rysowaše, kak běchu Serbja a Němcy wot lěta 1850 w dźens­nišim Božim domje, něhdyšej měšćanskej cyrkwi, zhromadne kemše swjećili. ­We Wojerecach tele dny z mnohimi zarjadowanjemi na 750lětne wobstaće města spominaja. Foto: Gernot Menzel

Měrko Šołta z Budyšina kritizuje wopačne wužiwanje wobrotow w našim wječorniku:

Stajnje znowa čitam w Serbskich Nowinach słowa a wobroty, kotrež so po mojim měnjenju wopak wužiwaja. Často trjebaja so we wopačnym zmysle, druhdy njetrjebawši. Hdys a hdys njerozumju zmysł sady ani wospjet ani pomału čitajo. Jedne tajke słowo je „prawdźepodobnje“. My je trjebamy za něšto, štož njeje wěste, abo štož so nam jako wěste nje­zda. Pjatk, 7. septembra, pod wobrazom na 1. stronje, so wone wospjet jewješe: „Wysoke jehlinowe štomy tam prawdźepodobnje prěki a podłu leža.“ Na wobrazu wšak jara jasnje widźimy, zo to nječinja „prawdźepodobnje“, ale woprawdźe! Mam zaćišć, zo bjerje redaktor často prěni najlěpši, „prawdźepodobny“, wotpowědnik ze słownika za něšto, štož runje wopisuje abo přełožuje.

Kóždej dwě lěće organizuje hońtwjerske a lěsne drustwo w Nowym Měsće nad Sprjewju tak mjenowany zeleny swjedźeń. Minjeny kónc tydźenja steješe tam znowa lěs ze swojimi rozdźělnymi wobłukami, kaž hońtwu a hospodarstwom, w srjedźišću. Mjez ­druhim předstajichu najwšelakorišu techniku za wobhospodarjenje lěsa, kaž tónle mobilny rězak. Foto: Jost Schmidtchen

Hinak hač na druhich wsach su sej w Ralbicach tradiciju wobchowali, zo kóžde lěto swój wjesny swjedźeń přewjeduja, kotryž babylěćo mjenuja. ­Minjeny kónc tydźenja poskićichu tam wjesna rada a mnozy pomocnicy wotměnjawy program za wšitke generacije

Ralbicy (mbr/SN). Přijomne lětnje wjedro skićeše najlěpše wuměnjenja za Ralbičanske babylěćo. Pjatk so tróšku pode­šćowa, tak zo so na wubědźowanju wohnjowych woborow njepróšeše. Jako najspěšniši wopokazachu so kameradojo z delnich Sulšec před wobornikami z Konjec a Brěžkow.

Pytaja dale za namjetami, koho móhli za čestnohamtske dźěło počesćić

Chrósćicy (JK/SN). Dźěło a angažement mnohich čestnohamtskich je wažny zakład wuspěšneho komunalneho dźěła. Zo bychu spomóžne dźěło tychle zwjetša za ćichim skutkowacych tež hódnje připóznali, je Budyski krajnoradny zarjad nastorčił iniciatiwu, zasłužbnym čestnohamtskim wuprajić dźak a připóznaće. Dokelž pak maja wo tym w městach a gmejnach lěpši přehlad, je wokrjes zhromadnje ze sakskim krajnym knježerstwom přepodał kóždej komunje šek 1 250 eurow, zo bychu z pjenjezami připó­znali čestnohamtske skutkowanje.

Nimale třiceći čłonow Serbskeho folklorneho ansambla Wudwor (SFAW) je so minjenu njedźelu z kónctydźenskeje turneje na 13. mjezynarodny folklorny festiwal CIOFF „Od Celja do Žalca“ w Słowjenskej nawróćiło.

Po napinacej jězbje w nocy wot štwórtka na pjatk dojědźechmy rano do Celja. Hnydom po přijězdźe podachmy so na wustupaj w zakładnej a wyšej šuli, hdźež nas tójšto přihladowarjow wočakowaše. Po zajimawym wodźenju po měsće Celje přizamkny so wječor wulka gala. Po wuspěšnym programje dožiwichmy zhromadny skupinski wječor ze spěwanjom a rejwanjom.

Brošurka znowa wušła

Kamjenc. Krabatowe towarstwo je brošurku wo Krabatowej kolesowanskej šćežce znowa wudało. Kaž praji předsyda towarstwa Reiner Deutschmann, dóstanu kolesowarjo nětko wjele wažnych pokiwow wo regionje mjez Budyšinom, Kamjencom a Wojerecami kaž tež informacije wo kulturje a zajimawostkach. Wobstatk 32 stron wopřijaceje brošurki je lětak z wopisanjom čary, a to w němskej, serbskej, čěskej a pólskej rěči. Brošurku z lětakom dóstanu zajimcy pola Krabatoweho towarstwa, w turistiskich informacijach a na mnohich městnach podłu Krabatoweje kolesowanskeje šćežki.

Dźěłaja z wołmu

Nowe Město. Dohlad do předźenja wowčeje wołmy dóstanu zajimcy sobotu, 15. septembra, wot 13 hodź. w starej předźerni w Nowym Měsće nad Sprjewju. Zajimcy móža so za dźěłarničku hišće přizjewić, a to pod telefonowym čisłom 035727/ 579 341.

Prawa adresa

Budyšin. Adresa, pod kotrejž móža młodźinske kluby, towarstwa a skupiny swoje terminy za lěto 2019 přizjewić, rěka prawje . Zawčerawšim wozjewichmy adresu bohužel z wopačnej kóncowku.

Skónča jubilejny tydźeń

Z 222 km/h po awtodróze smalił

Budyšin. Při kontroli na awtodróze A 4 pola Budyšina lepichu zawčerawšim w běhu třoch hodźin 90 přespěšnych šoferow. Najnuznišo měješe wodźer awta, kiž je při dowolenych 120 kilometrow na hodźinu z 222 km/h nimo błyskača smalił. Wón ma nětko 600 eurow pokuty płaćić, dóstanje dwaj dypkaj w Flensburgu a njesmě štwórć lěta žane awto wodźić.