Aus der aktuellen Ausgabe vom September 2018

Wojerecy (SN). Podpěraćeljo, přećeljo a wopytowarjo Wojerowskeho zwěrjenca móža sej tam nětko ekskluziwne dožiwjenja zawěsćić. Tele dny su wulku crowdfundingowu akciju na internetnej stronje www.99funken.de zahajili. Za wěstu sumu pjenjez móžeš so na romantiski wječor při haće coowa wjeselić abo sej prawo zawěsćić, nowonarodźenemu zwěrjeću mjeno spožčić. Z dochodami z akcije chcedźa nowu a modernu připrawu za porik leopardow Baobao a San natwarić, wot kotrejuž nadźijeja so potom dorosta. Bjez noweje připrawy njemóže zwěrjenc swój plahowanski program ­wohroženych chinskich leopardow hižo dale wjesć.

Nowa připrawa płaći 165 000 eurow. Dźěl chcedźa z darowanskej akciju zwjesć, najwjace pak z darami regionalnych předewzaćow, kotrež móža potom při nowej připrawje za sebje wabić. Tež třo wulkosponsorojo su pomoc hižo připrajili. Kaž z Wojerowskeho zwěrjenca dale pisaja, tam za twar leopardoweje připrawy žane spěchowanske srědki njedóstanu a su tuž jeničce na podpěru sponsorow a wobydlerjow pokazani.

Mustwo wohnjowych wobornikow z Róžanta a Sernjan smě sej pokal zarjadniskeho zwjazka Při Klóšterskej wodźe na přeco zdźeržeć a smě wubědźowanje woborow, kotrež zwjazkej přisłušeja, klětu wospjet zarjadować. Měrko Domaška, předsyda zarjadniskeho zwjazka, ma tuž nětko nowy pokal wobstarać. Móžno, zo hašenske wurisanje 2019 w Sernjanach přewjedu, wšako swjeći wjes potom 600lětne wobstaće.

SJ Njebjelčicy – ST Nadrózna Hrabowka 3:2 (1:0)

Zestawa domjacych: Hahn – Kral (68. Ričel), Hrjehor, Pawlik, Šołta, Hoelzel (87. Domš). Hanuza, Haška, Lejnart, Čornak, Wagner (60. Korjeńk)

Za druhu domjacu hru běchu sej chowancy koparskeho trenarja Handrija Krawčika kruće předewzali, po jasnej poražce w Pančicach-Kukowje tři dypki nětko w Njebjelčicach zdźeržeć.

Hačrunjež poradźi so jim 1:0 hižo we 5. min. přez Gabriela Čornaka, so prawje do partije njenamakachu. Přećiwnik wustupowaše ćělnje robustnje, a někotři hrajerjo so nastajnosći hóršachu a reklaměrowachu. Tak nasta do přestawki jenož mało šansow. Najlěpšu měješe na stronje domjacych Sandro Šołta. Wón pak zhłójčkowa bul po přihrawce Ronyja Hanuzy w 13. min. nimo wrotow.

Angermündeski FC – FC Energija Choćebuz 0:3 (0:1)

Zestawa hosći: Rauhut – Starcew, Stein, Baude (60. Graudenz), Schlüter, Stanese, Knechtel, Zimmer, de Freitas (80. Zi­ckert), Viteritti (78. Broschinski), Mamba

Tež bjez škita dohladowanja šeftrenarja Clausa-Dietera Wollitza, kiž bu na kolenu operowany, je FC Energija Choćebuz w pokalu koparskeho krajneho ligista Angermünde z 3:0 porazyła a koło čisło tři docpěła. Hosćićeljo drje z něhdyšim dorostowym hrajerjom FCE Janom Beck­mannom přeco zaso nadběhowachu, škit wokoło druheho wrotarja FC Energije Kevina Rauhuta pak bě stajnje na městnje. Tak su wrota Marcela de Frei­tasa do přestawki kaž tež Fabija Viterittija a Fabiana Graudenza po přestawce přez dlěši čas jednostronsku partiju rozsudźili. A FCE postara so wo wěsty zaćah do wosmifinala. K finalnej partiji Babelsberg – Choćebuz pak klětu dóńć njemóže. Mustwo z filmoweho městačka je doma přećiwnikej Union Fürstenwalde z 2:3 podležało. Georg Zielonkowski

Wo 9. Połčničanskich strowotniskich běhach

31. awgusta wubědźowaše so 486 sportowčow a sportowcow we wobłuku 9. Połčničanskich strowotniskich běhow na distancach 0,8 hač do 10 kilometrow. Mjez nimi wojowaše na čarje 5 km tež 55 lubowarjow walkinga. Atleća běchu hłownje ze Sakskeje, ale tež z Braniborskeje, Berlina a něhdźe třicećo z pólskeje Złotoryje pola Legnicy, partnerskeho města Połčničanow. Tež tónkróć wobdźěli so zaso dźesatk serbskich entuziastow z brawuru.

Na 0,8 km (97 w cilu) a 2,0 km (76 w cilu) wubědźowachu so młódši a starši šulerjo. Dobyćerjej na 0,8 km běštaj Paul Frenzel (2:59 min) a Theresia Hesse (3:12 min). Šuler Budyskeje Serbskeje šule Jarek Schade wubědźi sej samo cyłkowne třeće městno w swojej starobnej skupinje (sk) U 10 w spěšnych 3:04 min a Franc Žur w sk U 8 z 4:38 min 9. městno.

Módro-běłe Wojerecy – HZ Pančicy-Worklecy 3:1 (23:25, 25:21, 26:24, 25:22)

Po poradźenej generalce w předkole wobwodneho pokala, jako OSC Lubijej z 0:2 podležachu a přećiwo JTVG Koblicam z 2:1 dobychu, běchu volleyballistki Hrajneho zjednoćenstwa Pančicy-Worklecy sobotu tydźenja hósć zastupnistwa Módro-běłe Wojerecy w prěnjej dypkowej hrě sezony. Ze snadnym dobyćom 25:23 dźěše prěnja sadźba na konto Pančičankow-Worklečankow. Tež přichodnej sadźbje běštej napjatej, tej pak zawěsćichu sej hosćićelki z 25:21 a 26:24. Nětko rěkaše za hóstne hrajerki, wšitke mocy mobilizować. Zazběh do štwórteje sadźby pak zaběža hinak hač planowane. Po krótkim času ležachu wone z dźesać dypkami w zastatku. Z mudrymi taktiskimi změnami a ze sylnym mustwowym wukonom pak žony hrajneho zjednoćenstwa dale wojowachu. Přiwšěm njemóžachu so z dobyćom mytować, přetož podle­žachu Wojerowčankam z 22:25.

Kopańca, wokrjesne pokalne koło

ST Bart II – SJ Chrósćicy II 1:5 (0:0)

Augustusbad – Marijina hwězda 1:6 (1:5)

TSV Wjazońca – ST Ćisk II 3:0 (0:0)

Łaz/Běły Chołmc II – N. Hrabowka 

3:5 (1:0) po podlěšenju

TSV Połčnica II – ST Wjelećin 1:5 (1:0)

ST Lubuš II – ST Mały Wosyk 5:0 (1:0)

Budissa Budyšink – Malešecy0:11 (0:3)

Kulow II – Germania Budyšin 2:3 (0:1)

Wětnica/Hola/Łuty II – Wachau 0:5 (0:1)

ST Kubšicy – Bretnig-Hauswalde 1:2 (0:1)

ST Budyšin II – TSV Wjernarjecy 2:3 (0:0)

ST Bart – ST Budyšin1:3 (1:0)

Dwaceći namjetow dóšło

Budyšin. Nominowanska faza za 23. hornjołužiske předewzaćelske myto je nimo. A Marketingowa towaršnosć Hornja Łužica-Delnja Šleska zdźěla, zo je 20 namjetow předewzaćow z wokoliny dóšło. 18. septembra chce jury wo mytach rozsudźić. We wobłuku Hornjołužiskeho hospodarskeho dnja 8. nowembra w Lubiju budźe myto spožčene.

Wotewru nowu přehladku

Budyšin. Nowu stajnu wustajeńcu „Jatba pod hokatym křižom. Budyšin I a Budyšin II 1933 – 1945“ chcedźa jutře za tydźeń w Budyskim wopomnišću wotewrěć. W srjedźišću steja wopory režima nacijow, zajate tehdy w sprjewinym měsće. Z přehladku ma so tež na stawi­zny jastwa na Weigangowej pokazać, ­kotrež su w zjawnym wědomju dotal hłownje z NDRskim časom zwjazane.

Ben Foster jako Žižka

Iniciatiwna skupina Serbski sejm diskusijny wječor přewjedła

Chrósćicy (SN/MkWj). Zajimawe a kontrowersne zarjadowanje móžachu wšitcy ći dožiwić, kotřiž su wčera wječor přeprošenje iniciatiwneje skupiny za wutworjenje Serbskeho sejma sćěhowali. Něhdźe 60 ludźi je na žurlu Krawčikec hosćenca w Chrósćicach přišło, mjez nimi zastupnicy wšitkich generacijow.

Zastupnicy iniciatiwneje skupiny, kaž Njebjelčanski wjesnjanosta Tomaš Čornak (CDU), skedźbnichu na mjeztym sydom lět trajace prócowanje skupiny, kotraž ma zaměr, serbsku rěč a kulturu dołhodobnje zaručić. Tomaš Čornak bě runje tak kaž Alexander Pólk wo tym přeswědčeny, zo su wuhlady za to ćim lěpše, hdyž maja Serbja ze swójskim parlamentom awtonomiju. Potom změja woni wjetšu politisku wahu a smědźa sami rozsudźić, kak móža spěchowanske srědki na dobro našeho ludu zasadźić.

„Łužica – Europski kompetencny region za rěče narodnych mjeńšin w digitalnej dobje“ rěka hesło jedneje z cyłkownje šěsć dźěłarničkow na konferency wo strukturnej změnje we Łužicy. Z Mětom Nowakom, kiž z dr. Fabianom Jacobsom dźěłarničku pjatk w Złym Komorowje moderěruje, je Axel Arlt rěčał.

Wo čim chceće z wobdźělnikami dźěłarnički scyła diskutować?

M. Nowak: Jako moderatoraj budźemoj z nimi rozjimać, kotre wočakowanja na „kompetencny region“ maja a kotre wužadanja woni za serbsku rěč w digitalnej dobje widźa. To chcemoj zwjazać, zo bychmy wužadanja za dalše rěčne wuwiće zwěsćili. Z tym zwisuja tež – zo bychmy to zmištrowali – móžne serbske strategije a trěbne kompetency. Prašamy so, kotry wužitk móhł druhim krajam abo mjeńšinam z toho wurosć.

Što predestinuje Łužicu, zo by so z tajkim kompetencym regionom stała?