Aus der aktuellen Ausgabe vom September 2018

Swójski podźěl gmejny za wohnjoškit mjeńši hač planowany

Chrósćicy (JK/SN). Wo stawje přihotow, přetwarić Chróšćansku staru šulu na zetkawanske a gmejnske srjedźišćo, informowaše wjesnjanosta Marko Kliman (CDU) Chróšćanskich gmejnskich radźićelow na zašłym posedźenju w Nuknicy. Nazornje a z pomocu twarskich podłožkow je tam architekt Marko Dźisławk radźićelam planowane naprawy rozjasnił. Kaž wón zdźěli, su dźěła wupisane. Byrnjež twarske firmy tučasnje z nadawkami derje wućežene byli, gmejna po měnjenju Dźisławka dosć poskitkow dóstanje. Te wočakuja w přichodnymaj tydźenjomaj, tak zo móže gmejnska rada nadawki w oktobru rozdawać. Twarske naprawy měli so w nowembru započeć a klětu w februaru zakónčene być. Wulki dźěl trěbnych wudawkow financuje gmejna z pomocu spěchowanskich srědkow. Předpołožene plany architekta radźićelow pohnuchu, tu a abo tamnu ideju dodać abo wobmyslenja wuprajić.

W Budyšinje je so na jubilejnym 25. Budyskim měšćanskim běhu 2 064 sportowcow wobdźěliło a na 12. HOYWOJ cityjowym běhu we Wojerecach samo 2 212. W Budyšinje za nowy rekord cyle dosahało njeje, we Wojerecach bě to porno lońšemu 450 běharjow wjace. W sprjewinym měsće na přikład wobsadźi Jurij Nuk z Budyšina 2. městno w swojej starobnej skupinje na čarje 5,5 kilometrow, w swojimaj starobnymaj klasomaj docpěštaj Budyšan Leo Čórlich 3. městno na čarje 5,5 km a Budyšanka Katja ­Žurec na 1 200 m tohorunja 3. městno. Foto: Jörg Stephan

TSV 1860 Mnichow – FC Energija Choćebuz 2:0 (1:0)

Zestawa hosći: Spahić – Weidlich, Stein, Matuwila, Schlüter, Kruse, Graudenz (61. Broschinski), Stanese (61. Zimmer), de Freitas, Viteritti, Mamba

Na bojowniskej runinje běše FC Energija w tutej hrě na samsnej wysokosći kaž TSV 1860 Mnichow, tež hdyž běchu domjacy z dwójce tak wulkim etatom do sezony startowali. Manko łužiskich koparjow pak běchu słabe nadběhi. Zrědka namaka posledni pas swójskeho muža. Najwjetša móžnosć Energije nasta w 31. min., jako Marcelo de Freitas wólny kop z centralneje pozicije z 20 metrow na łatu Mnichowskich wrotow smokny. Hnydom na to poradźi so hosćićelam nawjedowanje. Po dale a dlěšim wólnym kopje so žadyn z Bayerow w šěsnatce bula njedótkny, za to pak hwizdźel Choćebužana Daniela Stanesy. Wottam skoči bul do wrotow FC Energije (33.).

Po druhich wrotach po spěšnym konteru přez lěwe křidło bě partija za Mnichowske lawy rozsudźena (59.), byrnjež Choćebuženjo hišće raz wšitko dali. Dalšu dypkowu hru změja woni 15. sep­tembra doma, hdyž wočakuja koparjow SG Sonnenhofa Großaspach.

Georg Zielonkowski

Awtor dźensa

Clemens Šmit

We wudaću SN tydźenja pisa kolumnist wo tym, kak by sej nimale wot ultrafana na měcu dóstał, dokelž je pěsnje FC Energije Choćebuza w Lipsku spěwał. To čitajo dyrbjach na Kamjenicu myslić. Wobaj přikładaj tworitej pokazku na to, kak prezentne njetoleranca, hida a namóc w dźensnišim času w našim kraju su. Tež sport při tym wěstu rólu hraje. Poprawom wšak chcych skerje wo tym rozprawjeć, kak hłuboko sahaja wliwy politiki do sporta. Tónraz pak je samo nawopačny fenomen wobkedźbujomny.

Kak daloko sahace móža sćěhi być, hdyž so pozdatne sportowe towarstwa znjewužiwaja, pokazuja sceny z Kamjenicy. Jenož hodźiny po smjertnym nadpadźe namołwješe zakazana prawicarska ultraskupinka tamnišeho koparskeho kluba internetnje k tomu, „pokazać, komu město słuša“. Štož slědowaše, běchu zdźěla randale, prawicarske rjejeńcy a nadpady na wukrajnikow. Policija zliči w běhu njedźele něhdźe 800 ludźi. Mobilizacija ultrafanow tworješe we wěstym nastupajo zazběh kołoběha protestow a demonstracijow, kotrež hač do dźensnišeho traja.

ST Bart II – SJ Chrósćicy II 1:5 (0:0)

Zestawa hosći: Hejduška – M. Donat, Mark, Wowčer, Pjetaš (57. Förster), Šołta, Domaška, J. Donat, Jakubaš (84. Dórnik), Šmit

Vatikan (B/SN). Vatikan je kritiske wuprajenje bamža Franciskusa, za homoseksualne dźěći pytać psychiatrisku pomoc, cofnył. „W dźěćatstwje maš tójšto, štož hodźi so z psychiatriju činić“, rjekny bamž na wróćolěće z Irskeje. W statemenće Vatikana tele słowa pobrachuja. Njejsu mysle swjateho wótca sfalšować chcyli, kaž rěčnica zdźěli. Franciskus nochcyše rjec, zo je homoseksualita chorosć, ale „zo dyrbi so hladać, kak so wěcy na psychologiskej runinje předstajeja“. Tajka „homoseksualna powěsć“ bamža je „jěre přesłapjenje“, praji čłon předsydstwa zwjazka homoseksualnych LSVD Henny Engels.

W lěće 2013 bě bamž hišće­ přećiwo diskriminaciji homoseksualnych wustupował a za mjezsobnu akceptancu wabił.

Spřećiwja so podhladej

Ludwig Kola njeboh

Choćebuz. Wjelelětny serbski rozhłosownik Ludwig Kola je wčera w starobje 86 lět w Choćebuzu zemrěł. Wot lěta 1963 hač do přewróta bě wón Serbski rozhłós w Budyšinje nawjedował. Pozdźišo wutwori delnjoserbsku redakciju rozhłosa, kotraž dźensa we wobłuku sćelaka RBB wusyła. Nimale 40 lět je rodźeny Radworčan za serbski rozhłós dźěłał.

Na wuprawje w Słowjenskej

Wudwor. Wudworski folklorny ansambl zastupuje Serbow na tuchwilu wotměwacym so 13. mjezynarodnym folklornym festiwalu „Od Celja do Žalca“ w Słowjenskej. 29 čłonow poda so wčera na wukrajnu turneju. Prěnja stacija je město Celje. Dalšej programaj stej w bliskim měsće Žalec a we wsy Petrovče planowanej. Sobotu předstaja so Wudworčenjo w słowjenskej stolicy Ljubljanje.

Wutwar dróhi pruwować

Statny lěsniski zawod liči z najhubjeńšim lětom wot časa zapisowanja

Budyšin (SN/BŠe). Přestrjeń lěsa w Hornjej Łužicy wučinja cyłkownje 123 154 hektarow. Z toho je najwjetši dźěl, ně­hdźe 80 000 hektarow, w priwatnym wob­sydstwje. Najwjac mějićelow ma mjez jednym a pjeć hektarami lěsa na starosći. Lěto 2018 bě za nich wurjadnje ćežke lěto­. Orkan Friederike, kiž w januarje howrješe, je wulke škody zawostajił. Hač do dźensnišeho na mnohich městnach, kaž mjez Šunowom a Tradowom, spo­walane štomy leža. Tež suchota je w lěsach widźomna. Lětsa maja skórniki tuž idealne wuměnjenja so rozmnožić.

„Pućnik za integraciju w Budyskim wokrje­su“ jako brošurka předleži. Přiručka je pomoc tym sobudźěłaćerjam a sobudźěłaćerkam na zarjadach, kotřiž maja ze zapućowanjom wukrajnikow činić. Rozkładowane tam je, štó ma kotre­ z płaćiwych zakonjow wurosćace nadawki spjelnić. Wo tym informowachu srjedu w Budyskim krajnoradnym zarjedźe.

Budyšin (SN). „Kuzło dejmantneje soniny“ rěka nowostka za dźěći wot štyrjoch lět, kotraž je wčera w Ludowym nakładnistwje Domowina wušła. Fantazijepołnu podawiznu wo soninje Jasničce spisa Doris Kasper, mějićelka dožiwjenskeho statoka w Ćisku. Angažowana młoda žona ze serbskimi korjenjemi bě so z manuskriptom na LND wobroćiła, po tym zo bě jeje němskorěčna prěnička wo husańcy a nosatym mjedwjedźu wuspěšna. Z nowej, wot Jadwigi Kaulfürstoweje zeserbšćenej a wot Barbary Schumann wulkotnje ilustrowanej knižku maja nětko tež soniny swoje městno w načasnej serbskej dźěćacej literaturje.