Aus der aktuellen Ausgabe vom September 2018

Za wobšěrnu inwesticiju nadźijeja so tójšto spěchowanja

Pančicy-Kukow (SN/MWj). Nowy hort w Pančicach-Kukowje njeje hišće hotowy, to měri so gmejna hižo na přichodny projekt. W třoch twarskich wotrězkach chce komuna Šulu Ćišinskeho přichodne lěta dale ponowić. Kaž gmejnska rada ­na swojim wčerawšim posedźenju jednohłósnje wobzamkny, chcedźa tam wot nalěta 2020 hač dosrjedź lěta 2022 dohromady 1,3 miliony eurow nałožić. Hłownje dźe wo to, wohnjoškit a wěstotu w twarjenju polěpšić, kaž wjesnjanosta Markus Kreuz (CDU) rozłoži.

Tak přitwarja při wuchodnym dźělu, potajkim z puća widźane naprawo, druhi wuchowanski puć. Kaž wjesnjanosta wčera připowědźi, ma wopomnišćo Jakuba Barta-Ćišinskeho na horni poschod přećahnyć. Na zapadnym dźělu, hdźež je hłowny zachod, budu cyłe schodźišćo ponowić, wobhrodźenje přiměrić a šulerske nuzniki kaž tež wučersku stwu saněrować. To wšo ma so stać pod krutym dohladom pomnikoškita. W třećim wotrězku chcedźa wšitke zbywace wonkowne pinčne murje wusušić a izolować. Dźěl su w zwisku ze saněrowanjom chódbow a rjadowniskich rumnosćow hižo wusušili.

Wjesne towarstwo Noweje Wjeski je minjenu njedźelu swojich čłonow na kolesowanski wulět přeprosyło. Prěni puć 25 wulětnikarjow wjedźeše k Miłočanskej žabje (na wobrazu), hdźež so dźěći přeswědčichu, zo so žaba woprawdźe njehiba. Na to wopytachu mjezynarodnu rězbarsku dźěłarničku w Miłočanskej skale, hdźež móžachu sej nowe twórby wuměłcow wobhladać a rozjasnić dać. Poslednja přestawka bě piknik w Lipju w Pančicach-Kukowje, hdźež šofer dypkownje ze słódnej jědźu a napojemi čakaše. Foto: Jana Hiccyna

Chrósćicy. Iniciatiwa za demokratiske ­ludowe zastupnistwo přeproša wšitkich zajimcow na informaciski a temowy ­wječor k wólbam Serbskeho sejma póndźelu, 10. septembra. w 19 hodź. do Chróšćanskeho Krawčikec hosćenca. Ini­ciatiw­nicy chcedźa ideju a perspektiwy sejma kaž tež wobstejnosće wólbow předstajić. Přizamknje so diskusija wo prašenjach kulturneje a kubłanskeje ­awtonomije Serbow.

Literarna rozmołwa

Budyšin. Z diskusijiu wo knize „Łójerjo sonow“ z pjera Jěwy-Marja Čornakec pokročuje Zwjazka serbskich wuměłcow rjad wuměłskich rozmołwow pod titulom „tracTare“ štwórtk, 13. septembra, we 18 hodź. w hosćencu „Tiroler Stuben“ na Lessingowej 1 w Budyšinje. Na zarjadowanje njejsu jenož čłonojo ZSW přeprošeni, ale wšitcy zajimcy.

Wobchod zaso wotewru

Budyšin. We wobłuku dnja wotewrjeneho pomnika chcedźa zajutřišim, njedźelu, w 14 hodź. Budyski tachantski wobchod na Mjasowych jětkach zaso wočinić. Zajimcy su přeprošeni sej wobhladać, što je so tam změniło, a so wo nowych poskitkach wobhonić, mjez druhim wo literarnej kofejowni.

Dwory šěroko wočinjene

Pisany kwěćel deliktow

Budyšin. Zawčerawšim wječor je policija na Budyskej Stieberowej wosobowe awto typa Seat Ibiza kontrolowała a hnydom wjacore delikty zwěsćiła. Přičinjene čisło scyła k awtu njesłušeše. Nimo toho namakachu w jězdźidle dalše, zwjetša njepłaćiwe čisła, mjez druhim jedne pokradnjene. Kaž so dale wukopa, 28lětny šofer scyła žanu jězbnu dowolnosć njewob­sedźeše a jeho awto ani přizjewjene ani zawěsćene njebě.

Rozšěrjena rěčna app

Budyšin. Androidna app za smart­phone „Sorbisch leicht – Serbsce lochko“ bu wobšěrnje rozšěrjena, kaž Rěčny centrum WITAJ zdźěla. W aplikaciji su nětko wšitke hornjoserbske wobroty z wobeju CDjow „Serbsce lochko 1“ a „Serbsce loch­ko 2“ zapřijate. Přistupnych je dohromady 30 krótkolekcijow, kóžda z wobrotami na konkretnu temu. App je w interneće darmotnje k dispoziciji.

Podpěruja wšitke požadanja

Drježdźany. Sakske knježerstwo podpěruje po słowach statneje ministerki za wědomosć a wuměłstwo dr. Evy-Marije Stange (SPD) požadanja Žitawy, Drježdźan a Kamjenicy wo titul „europska kultur­na stolica 2025“ w samsnej měrje. Dr. Stange spřećiwja so tak prezidentej sakskeho sejma dr. Matthiasej Rößlerej (CDU), kiž bě so za Kamjenicu wuprajił.

Grabičanski jězor přepodali

Něhdźe měsac hižo je nowa kofejownja we wobchodźe Evis deko & café na Budyskej Bohatej hasy wotewrjena. Evelyn Thiemann poskića tam horce a chłódne napoje, słódke chłóšćenki a speciality, kaž na přikład japanske crêpes, wubrane wina a čerstwe­ solotje­. Jedna z posłužowarkow je Katrin Wandeltowa (na wobrazu), pola kotrejež móža kupcy swoje twory serbskorěčnje skazać.­ W pódlanskim dźělu rumnosće předawaja nimo toho wšelakore dekoratiwne accessoiry. Foto: SN/Hanka Šěnec

Stróža (SN/BŠe). Drjewo, jeho trěbnosć kaž tež jeho wobdźěłanje steja lětsa w srjedźišću přirodowych wikow pod hesłom­ „Wobhospodarjenje lěsa w změnje časa“ zajutřišim, sobotu, na dworje zarjadnistwa biosferoweho rezerwata Hor­njołužiska hola a haty w Stróži.

Serbske lajske cyłki tež lětsa zaso w třećim počasu chětro hibićiwe

Budyšin (SN/bn). Meteorologiski zazběh nazymy spočatk toho měsaca je we Łu­žicy zdobom stajnje tež zazběh wosebi­teho počasa kultury. Na powołanskimaj jewišćomaj Němsko-Serbskeho ludoweho dźiwadła a Serbskeho ludoweho ansambla w Budyšinje je so nowa hrajna doba započała, w Choćebuzu přihotuja 28. filmowy festiwal z ćežišćomaj Šleska a Georgiska kaž tež wospjet ze specifisce serbskim rjadom „Heimat – Domownja – Domizna“, a po koncertach pod hołym njebjom hotuja so zarjadowarjo na tak mjenowanu klubowu sezonu.

Torgau (SN/bn). Město Torgau wočakuje kónc tydźenja hosći 27. dnja Saksow. Na cył­kownje 30 hrajnišćach pokazaja tam wuměłcy resp. čłonojo najwšelakorišich towarstwow swoje programy. Poskitk saha wot koncertow přez čitanja hač k artistice. Wosebitej wjerškaj matej po připowědźenju zarjadowarjow być insce­nowane zetkanje sakskich kurwjerchow a wulki swjedźenski ćah ze 140 wobrazami. Zhromadnje ze załožbu Sakske wopomnišća přihotuja nimo toho mobilnu wustajeńcu wo woporach nacionalsocializma kaž tež wo namócnym politiskim režimje w sowjetsce wobsadźenej conje a wo NDR.

Tež lětsa stej zaso serbskej přinoškaj zapřijatej. Pjatk wustupi skupina MadStep na jewišću sćelaka Hitradio RTL, sobo­tu prezentuje so Łužičanka, dorostowy rejwanski cyłk Serbskeho ludo­weho ansambla, na jewišću Sakskeho krajneho sejma. Loni běštej Serbska kulturna informacija a 25. raz Serbski muski chór Delany na Dnju Saksow w Lubiju wobdźělenej.

Zarjadowarjo najwjetšeho towarstwoweho a ludoweho swjedźenja w swobodnym staće liča wot jutřišeho do njedźele z 250 000 wopytowarjemi.

Drježdźany/Njebjelčicy (SN/at). Lisćina namjetowanych kandidatow za prěnje wólby Serbskeho sejma so powjetša. Čłonam­ Drježdźanskeho towarstwa Stup dale­ předstajichu so wčera třo Serbja, kotřiž chcedźa rady nastupić. „Njeje rozsudne, hač woni našemu cyłkej přisłušeja, ale zo chcedźa za naš lud dźěłać. Jako Stup dale chcemy po tutym puću dalšim zajimcam kandidaturu zmóžnić“, rjekny Jadwiga Pjacec našemu wječornikej.

Tak su Stefan Nawka z Berlina, dr. Tomaš Wornar z Drježdźan a Jan Kosyk z Delnjeje Łužicy wčera swoje zaměry za skutkowanje w Serbskim sejmje roz­łožili. Jich wuwjedźenja přitomnych přeswědčichu, a su wšitkich třoch za kan­didaturu namjetowali.

Dwě kandidaturje za wólby serbskeho parlamenta poda wčera tež Njebjelčanske Domizniske a kulturne towarstwo. Na swojej zhromadźiznje namjetowachu sobustawojo wjesnjanostu a čłona ini­ciatiwneje skupiny Tomaša Čornaka kaž tež Sofiju Cyžec z Berlina.

Serbske towarstwa móža hišće hač do pón­dźele, 10. septembra, w 16 hodź. swoje wólbne namjety zapodać.