Budyšin. Po nimale lětomaj twarskeho časa chcedźa pjatk, 24. januara, přetwarjene Budyske dwórnišćo za wužiwanje přepodać. Oficialne zarjadowanje za prošenych hosći započnje so w 11 hodź. Wot 13 do 16 hodź. změja wobydlerjo składnosć, sej twarjenje wobhladać. Dohromady je tam něhdźe110 běrowow nastało a nimo toho rumnosće za wuradźowanja a techniku. Najwjetši dźěl stwow budu sobudźěłaćerjo Budyskeho krajnoradneho zarjada wužiwać.
Muzej prezentuje nowostce
Budyšin. Składnostnje 150. róčnicy załoženja Muzeja Budyšin wudachu tam nětko dwě publikaciji, kotrejž prezentuja jutře, štwórtk, w 11 hodź. zjawnosći. W spisu „Muzej Budyšin. Dohlady“ dźe předewšěm wo stawizny domu. Při tym steja přerjadowanja zběrkow kaž tež něhdźe sto wobrazow wubranych eksponatow w srjedźišću. Tamna nowostka wěnuje so bratromaj Ottej a Eduardej Weigang, kotrajž běštaj jako předewzaćelej kónc 19./spočatk 20. lětstotka hospodarski, twarski a kulturny rozmach Budyšina hłownje sobu postajałoj.
Podarmo ćeknyć spytał
Łomsk. Kontroli policije předwčerawšim wječor we Łomsku w Radworskej gmejnje chcyše so 30lětny wodźer transportera najprjedy wuwinyć. Wón drje na kromje puća zasta, ale na to pěši ćekny. To pak jemu ničo njepomhaše, přetož policisća jeho spěšnje dosahnychu. Čehodla měješe młody muž špatne swědomje, so spěšnje wukopa. Wón mjenujcy žanu jězbnu dowolnosć njeměješe a strózby tež hižo njebě. Pola njeho naměrichu 1,2 promilej alkohola, štož wězo bjez konsekwencow njewostanje.
Prěni tak mjenowany Serbski kofej wotmě so minjenu njedźelu popołdnju w Malešanskim hosćencu „Wódny muž“. Na nim wobdźěli so wjace hač třiceći ludźi. Hosćo přichwatachu z regiona wokoło Malešec, Barta, Hućiny, Kubšic a Klukša. Po tym zo bě jich motiwator za serbsku rěč a kulturu Budyskeje Domowniskeje župy w Malešecach a wokolinje powitał, dachu sej přitomni tykanc a kofej kaž tež pomazki a čaj zesłodźeć. Wo rjane wuhotowanje hosćenca běchu so někotre młode swójby z Malešec a Hućiny postarali. Wone so jara za serbstwo horja a nětko serbsku rěč wuknu.
Ćělnje posylnjeni sej wopytowarjo popołdnja hromadźe zaspěwachu. Při tym je jich akordeonist, kotrehož bě organizator zarjadowanja skazał, přewodźał. Zetkanje traješe hač do wječora. Na kóncu běchu sej wšitcy přezjedni, zo měli Serbski kofej wospjetować.
Přichodne tajke zarjadowanje pak njebudźe w Malešecach, ale ma so po woli přitomnych hosći druhdźe wotměć. Móžne přichodne wsy, hdźež móhli je přewjesć, su na přikład Bart, Bošecy, Krakecy abo Poršicy. Termin za přichodny Serbski kofej hišće wěsty njeje.
Lucian Kaulfürst
W Njebjelčicach rodźeny publicist a basnik Jan Skala wobwliwuje hač do dźensnišeho žiwjenje wsy a gmejny. Milenka Rječcyna je so z wjesnjanostu Tomašom Čornakom (CDU) rozmołwjała.
Kotru wažnosć kładźe Njebjelčanska gmejna na to, zo wostanje Jan Skala we a zwonka gmejny w zjawnym pomjatku?
T. Čornak: Dźensniša a předchadźace generacije njejsu ženje na njeho zabyli. Mamy w Njebjelčicach po nim pomjenowany puć a pěstowarnju. Ta nosy zdobom mjeno ,Barbojte kamuški‘, štož na basniske tworjenje Jana Skale pokazuje. Nažel je so jeničce jako manuskript předležaca, za ćišć přihotowana zběrka basnjow w 1960tych lětach zhubiła. Namołwjamy tuž ludźi, zo bychu na swojich knižnych polcach za manuskriptom pytali. Husto nadeńdźe so zhubjene zdate wo wjele pozdźišo zaso na njewšědnych městnach. Bychmy-li zběrku nadešli, móhli hižo dźěći w pěstowarskej starobje wo myslach Skale zhonić.
Ma wón za Was wosobinski wuznam?
Serbski patriot, poet a politikar Jan Skala narodźi so 17. junija 1889 w Njebjelčicach a zemrě na tragiske wašnje dźensa před 75 lětami w pólskich Dziedzicach. Z krótkim žiwjenjopisom jeho tule wopominamy.
Staršej, skałar Jakub Skala a šwalča narodneje drasty Marja, rodźena Glawšec, njeběštaj swojemu synej Janej ani materielnu bohatosć ani towaršnostne priwilegije, za to pak křesćanske hódnoty a lubosć k serbskemu ludej na puć žiwjenja sobu dałoj. Často formowaše wón z mjenowanymi hódnotami zwjazane ideale a žedźenja w serbskich basnjach; prěnje wozjewjenja slědowachu 1910 w časopisu „Łužica“. Dźesać lět pozdźišo wozjewi Skala wjacore basnje w zběrce „Srjódki“. W lěće 1923 wuńdźe dalša zběrka „Škrě“. Třeći zwjazk basnjow, lěta 1937 za ćišć přihotowany, z mjenom „Barbojte kamuški“, njebu hižo wozjewjeny a je so bohužel zhubił. Přičina njewuchadźenja su znate zakazy wšeje serbskosće přez nacionalsocialistow.
Wobwodna wolejbulowa klasa žonow wuchodneje Sakskeje
1. Schönbachske VV 11 28 : 13 25
2. VV Žitawa 09 II 8 24 : 5 22
3. VV Žitawa 09 III 9 21 : 14 16
4. HZ Pančicy-Worklecy II 9 16 : 14 14
5. Módro-běłe Wojerecy II 8 11 : 16 10
6. MSV Budyšin 04 III 7 10 : 12 9
7. Viktoria Worklecy 8 3 : 21 3
8. Nysa Wolejs II 8 0 : 24 0
Na šestym hrajnym dnju dojěchu sej wolejbulistki druheho zastupnistwa Hrajneho zjednoćenstwa PančicyWorklecy do Lubija, hdźež běchu pola žonow Schönbachskeho VV z hosćom. Domjace mustwo je tuchwilu prěnje wobwodneje klasy. Tak bě hižo zwoprědka jasne, zo njebudźe to žana lochka partija. Hwězdźičkam-mickam běštaj tón kónc tydźenja Jennifer Otto jako trenarka a Daniel Gall jako kotrenar poboku. Jimaj wutrobny dźak za pomoc a pozitiwny pohon.
Schönbachski VV – HZ Pančicy-Worklecy II 3:1 (25:19, 12:25, 25:13, 25:21)