Aus der aktuellen Ausgabe vom Dienstag, 02 März 2021

Genf (dpa/SN). Zajědojćenje kritikarja Krjemla Alekseja Nawalneho dyrbjeli po słowach fachowčow UNO z mjezynarodnym přepytowanjom wujasnić. Zamołwitych měli chłostać, rjeknyštej Agnès Callamard a Irene Khan, kotrejž w nadawku UNO morjenja a swobodu měnjenja zwonkasudnisce přepytujetej, wčera w Genfje. Wonej stej sej wěstej, zo je Ruska „jara prawdźepodobnje“ do atentata na Nawalneho splećena. Tón bě so loni w lěću zwjezł a ležeše dlěši čas w komje. Ruske wonkowne ministerstwo pak ma nadźiju, zo so „desinformacije“ wokoło Nawalneho skónča.

Praha (dpa/SN). Čěski prezident Miloš Zeman do toho wěri, zo budźe koronapandemija w kraju najpozdźišo w septembru přetrata. Wšitcy, kotřiž chcedźa přećiwo koronawirusej šćěpjeni być, budu hač do toho šćěpjeni“, rjekny Zeman telewizijnemu sćelakej CNN Prima News, kaž powěsćernja ČTK rozprawja. Nimo toho Zeman wěri, zo „trochu wobłudnjena skupina“, kotraž nochce so šćěpić dać, hač do toho swoje nastajenje změni.

Čěska bědźi so tuchwilu z dale přibě­racej ličbu natyknjenjow. Wot wčera­wšeho płaća tam po cyłym kraju razne wobmjezowanja. Tak smědźa ludźo swój bydlenski wobwod jenož hišće we wu­wzaćnych padach wopušćić. Čěske wobwody wotpowěduja w swojej wulkosći němskim wokrjesam. Tež přechodźowanje a sportowe aktiwity su na swójske město abo gmejnu wobmjezowane. Naprawy płaća tři tydźenje. 26 000 policistow a 5 000 wojakow chce dodźerženje wukazow přepruwować.

Sakska a Bayerska za zhromadny bój přećiwo koronawirusej

Mnichow/Drježdźany (dpa/SN). Bayerska a Sakska žadatej sej wot Berlina a Brüssela wurjadnu pomoc za ćežišća korona­infekcijow. „Přejemy sej wot Zwjazka a EU přidatne mnóstwo šćěpiwa přećiwo koronawirusej“, rjekny bayerski ministerski prezident Markus Söder (CSU) wčera w Mnichowje. To je wažne, zo móhli perspektiwisce tež tule z wo­tebě­ra­cymi incidencami zaso wšelke wo­ló­ženja zamołwić. Bayerska chcyła swoje ćežišća infekcijow „wědomje sylnić“ a wo­krjesam w pomjeznych kónčinach wjace šćěpiwa přewostajić.

Wobaj krajej chcetej nimo toho Čěskej lěpje pomhać, nic jeno z přewzaćom na ko­ronawirus schorjenych pacientow. „Chcemy wutrobu Europy podpěrać, kotraž­ korony dla wosebje ćerpi. Tale wutro­ba trjeba našu podpěru, zo móhła zaso porjadnje dźěłać.“ Zo móhli ćežke połoženje w Čěskej polěpšić, chcetej Bayerska a Sakska Čěskej nimo toho spěšnotesty a šćěpiwo přewostajić.

Na mjezynarodne přepytowanje zajědojćenja ruskeho opozicionelneho Alekseja Nawalneho sym hižo nětko wćipny. Móže tla być, zo dóńdu mjezynarodni fachowcy k cyle nowym dopóznaćam. Na kóncu móhło so wukopać, zo njeje ruska tajna słužba Nawalnemu něšto do čaja kidnyła, ale něchtó, kiž chcyše tak cyle wěstu mjezynarodnu reakciju zbudźić: Hdyž so Nawalnyj zwjeze, pokazuje wšón swět z porstom na ruskeho prezidenta Wladimira Putina a žada sej wězo „konsekwency“, na přikład hnydomny kónc twara płunowoda Nord Stream 2. A runje tak wšak su politikarjo tež reagowali. Njeje da to něšto, štož sej USA hižo dołho žadaja ...? Z mjezynarodnym přepytowanjom budźe nětko tež Němska nuzowana swoje po­zdatne „dopokazy“ nastupajo winu Ruske­je předpołožić. Na poskitki ruskeje strony, zajědojćenje zhromadnje přepy­tować a swoje dopóznaća předpołožić, w Berlinje dotal reagowali njejsu. Nětko drje dyrbja jednać. Marko Wjeńka

K přispomnjenjam Benjamina Hrjehorja w SN z 23. februara wo knize dr. Křesćana Kessnera měni Damian Dyrlich z Noweje Wjeski:

Pola přispomnjenjow Benjamina Hrjehorja wo artiklu dr. Pětra Nawki wo knize „Serbskeho archetypusa“ dr. Křesćana Kessnera přihłosuju wuprajenju, zo njebu kniha kritisce dosć předstajena. K tomu pak dyrbju přispomnić, zo by powšitkownje derje było, bychu-li nowiny abo serbske medije powšitkownje bóle kritiske strony wšelkich zjawow narěčeli. To by strowy diskurs był, sej myslu. Kritiki nowin wo schadźowance dla smy so jako studenća často mjerzali. Přiwšěm nas wone pohonjowachu, zo wobsahi stajnje dale na wysokim niwowje dźeržachmy, kaž kabarety, chór abo Šeršeń.

Praha (ČŽ/K/SN). W naležnosći Turówskeje brunicoweje jamy Čěska nětko na Europskim sudnistwje přećiwo Pólskej skorži. „Za škit našich wobydlerjow je skóržba njezbytna, dokelž njeje Pólska donětka na žadanja reagowała, kotrež Čěska na dobro swojich ludźi kaž tež wobswěta staja“, wopodstatnja minister za wobswět Richard Brabec juristisku kročel. Zdobom wón informuje, zo Čěska Europske sudnistwo prosy, jeje skóržbu před druhimi procesami wob­jednać a postajić, zo so z Turówskeje jamy tak dołho žana brunica wudobywać njesmě, doniž we wěcy njeje rozsudźene. „Di­rektna skóržba přećiwo druhemu statej EU je woprawdźe ekstremne rozrisanje“, Brabec přiznawa. Intensiwne diplomatiske jednanja z Pólskej njejsu pak ničo wunjesli, a komisija EU je čěske skóržbne přičiny připóznała, wón wobkruća. Pólske ministerstwo za wobswět reaguje na čěsku kročel ze zadźiwanjom. „Składnostnje njedawneho wopyta delegacije čěskeho knježerstwa we Waršawje smědźeše so za to měć,, zo je šansy na měrniwe rozrisanje konflikta“, praji jeho rěčnik Aleksander Brzózka.

Staru pěstowarnju w Chrósćicach nětko torhaja. Zajimcy móža sej tam tele dny hišće durje, wokna a dźěle aluminijoweje třěchi za­ poměrnje mało pjenjez wutwarić. Minjenu sobotu su poskitk gmejny hižo mužojo Hórčanskeho wjesneho towarstwa wužiwali­. Foto: Feliks Haza

Nowu pěstowarnju sej za čas korony wobhladać, je to móžno? W Budyšinje to je, tež hdyž tuchwilu jeničce digitalnje. Wčera, póndźelu, su z oficialnym přepodaćom noweho dźěćaceho dnjoweho přebywanišća na Třělnišću 4a tež link na interaktiwny kołoběh www.bautzen.de/kitapurzelbaum/ wozjewili.

Budyšin (SN). Jedne znamjo zarjadnišća je štom, kotryž ze swojimi korjenjemi za přirodu steji. Překul (Purzelbaum) pak steji za lóšt dźěći so pohibować a za bjezstarostnosć w dobrej atmosferje. Tónle koncept w nowym Budyskim dźěćacym dnjowym přebywanišću zwoprawdźeja. Sakska, wokrjes kaž tež město Budyšin su do nowotwara nimale sydom milionow eurow inwestowali. Wčera staj Budyski měšćanosta Alexander Ahrens (SPD), měšćanosta za financy a socialne dr. Robert Böhmer a měšćanostka za twarstwo Juliane Naumann personalej symboliski kluč přepodali. W juniju chcedźa tam, budu-li tajke zarjadowanja zaso dowolene, dźeń wotewrjenych duri přewjesć.

Zapósłancy Njebjelčanskeje gmejny wěste dary dale wotpokazuja

Njebjelčicy (SN/JaW). Gmejnscy radźi­ćeljo w Njebjelčicach wostawaja krući a wšitke pjenježne dary dale wotpoka­zuja, kotrež poskićeja komunje k zarunanju kóštow wuprawy zastupjerjow Njebjelčanskeje gmejny loni do afriskeho Benina. Po tym zo bě gremij hižo w januarje dar sponsora 5 000 eurow wotpokazał, sta so na zašłym wuradźowanju minjeny štwórtk to samsne.

We Wojerecach je so dźensa rano ćežke wobchadne njezbožo stało. Z dotal njejasneje přičiny stej na křižowanišću zwjazkoweje dróhi B 97 na Teschensku Ford Fiesta a Mitsubishi Outlander při ampli nimale frontalnje do so zrazyłoj. Šěsć zranjenych wosobow dyrbjachu do chorownje dowjezć. Wohnjowa wobora wotstroni z awtow wuběžace ćěriwo. Křižowanišćo běše za čas wuchowanja znjezboženych a trěbnych rumowanskich dźěłow dla dospołnje zawrjene. Policija přičinu njezboža nětko přepy­tuje. Foto: LausitzNews.de/André Klimann