Aus der aktuellen Ausgabe vom Dienstag, 18 Januar 2022

Dwaj nowaj čłonaj w radźe

Budyšin. Wjelelětny zastupowacy předsyda Sakskeho wustawoweho sudnistwa dr. Jürgen Rühmann je nowy zastupowacy čłon serbskich zastupnikow w radźe Załožby za serbski lud. Wón naslěduje Marka Dźisławka, kiž je zastojnstwo časowych přičin dla złožił. Nawodnica wotrjada kultury w ministerstwje za wědomosć, slědźenje a wuměłstwo Braniborskeje Brigitte Faber-Schmidt wobsadźi po wobzamknjenju kabineta druhe městno kraja w gremiju.

Incidenca snadnje woteběrała

Budyšin. RKI podawa ze 169,1 tróšku mjeńšu incidencu za Budyski wokrjes. Dohromady 162 nowoinfekcijow z koronawirusom a jědnaće smjertnych padow je wokrjes wčera zwěsćił. W Zhorjelskim wokrjesu su 13 dalšich natyknjenych registrowali. Incidenca je tež tu po informacijach RKI na 170,4 spadnyła.

Wabjenske telefonaty wozjewić

Zajim na marketingowej akciji Załožby za serbski lud přiběra

Budyšin (SN/JaW). Tež lětsa přewjeduje Załožba za serbski lud znowa swoju akciju z wosebitymi pjekarskimi titkami k ptačemu kwasej. Mjeztym je to 4. króć, kaž zamołwita załožby za marketing a ko­operacije Hanka Budarjowa na naprašowanje našeho wječornika informuje.

Akcija „sroka“, kaž projekt mjenuja, bě spočatnje zhromadna iniciatiwa załožby, Budyskeho Lionsoweho kluba a wokrjesneho zjednoćenstwa pjekarjow. „Zahajili smy ju 2019 a wona bě wuspěšna. Wot lońšeho pak ju jeno z pjekarskim zjednoćenstwom jako partnerom dale wjedźemy. Zjednoćenstwo zamołwja mjez druhim komunikaciju ze swojimi čłonami-pjekarjemi.“ Lětušu akciju su wobdźěleni pjekarjo – jich je něhdźe 32 wot Wotrowa přez Kulow, Kinspork, Kamjenc, Budyšin a Njedźichow hač do Slepoho – zdźěla hižo zahajili abo tele dny zahaja. Za lětušu akciju móžachu dotal třoch dalšich pje­karjow z Budyšina a Biskopic kaž tež wulkopjekarnju z Hodźija z tójšto filialemi za sróču akciju zdobyć. A kaž Hanka Budarjowa pisa, zajim wobstajnje přiběra.

„Swojowola“ rěka najnowši titul hudźbneje dwójki Uty Šwejdźic a Michała Měrćinka z Berlina, kotrajž staj pod mjenom „Hara Crash“ znataj. Wo čim pěseń, kotruž běštaj wonaj zdobom jako widejo na platformje Youtube a na swójskim kanalu takatak records ­wozjewiłoj, dokładnje jedna, to chcyše Jan Bogusz wot Uty Šwejdźic wědźeć.

Kak staj ideju zrodźiłoj, so w aktualnym spěwje z tematiku Běłoruskeje rozestajeć?

Na 20. hłownej zhromadźiznje Domowiny loni w Slepom su wustawki Zwjazka łužiskich Serbow změnili. W jednym dypku pak ma Drježdźanske hamtske sudnistwo wobmyslenja. Předsydźa towarstwow faworizuja nětko wurjadnu hłownu zhromadźiznu.

Budyšin/Drježdźany (SN/at). Informacija Drježdźanskeho hamtskeho sudnistwa wuskutkowa krótkodobnje zwołane wuradźowanje předsydy Domowiny Dawida Statnika z nawodami župow a nadregionalnych towarstwow. A te je so wčera wotměło. Dźe wo artikl 8, wotrězk 1, po kotrymž smě zwjazkowe předsydstwo dalšich zastupnikow w zmysle § 26 BGB powołać, „jim pak prawo, Domowinu samostatnje juristisce zastupować, njepřenjesu“. Domowina chcyše tak „princip štyrjoch wočow“ zaručić. Formulacija pak njeje po měnjenju sudnistwa konkretna dosć, maćiznu měli jasnišo wopisać, kaž rěčnik Domowiny Marcel Brauman zdźěli.

Informacija Sakskeje agentury za strukturne wuwiće (SAS) někotrym komunam w Budyskim a Zhorjelskim wokrjesu je zamylenja zbudźiła. W potrjechenymaj gmejnomaj Wulka Dubrawa a Hamor nimaja za to žane zrozumjenje.

Drježdźany/Budyšin (SN/at). Za naprawy kraja a komunow je we wobłuku změny strukturow po kóncu zmilinjenja brunicy w prěnjej spěchowanskej periodźe 2020–2026 za łužiski rewěr 946 milionow eurow k dispoziciji. Regionalny přewodźenski wuběrk (RBA) pak bě na lońšimaj posedźenjomaj projekty za dohromady 989 milionow eurow přizwolił.

Berlin (dpa/SN). Zwjazkowy kancler Olaf Scholz (SPD) je dźensa generalneho sekretara NATO Jensa Stoltenberga přijał. Hłowna tema rozmołwy bě konflikt mjez Ruskej a Ukrainu. Nimo toho rěče­štaj wonaj wo přihotach wjerška NATO, kotryž ma w juniju w Madridźe być. W běhu popołdnja chcyštaj na nowinarskej konferency zjawnosć informować. Wječor zetka so Stoltenberg z němskej zakitowanskej ministerku Christinu Lambrecht (SPD).

Parlament EU ma prezidentku

Strasbourg (dpa/SN). Křesćanska demokratka Roberta Metsola z Malty je nowa prezidentka parlamenta EU. Zapósłancy wuzwolichu 43lětnu dźensa w Strasbourgu hnydom w prěnim wólbnym přeběhu na čoło Europskeho parlamenta. Metsola je třeća žona w tymle wažnym a prestižnym zastojnstwje a naslěduje minjeny tydźeń zemrěteho Davida Sassolija. Datum wólbow nima ničo z jeho smjerću činić. Čas zastojnstwa Sassolija by so bjeztoho w januaru skónčił.

Zakoń Johnsona zwrěšćił

Kaž w mnohich druhich městach Němskeje su wčera tež w Budyšinje přećiwo naprawam w zwisku z koronawirusom demonstrowali, kaž tule na Bohatej hasy. Hłownje měrješe so protest přećiwo planowanemu winowatostnemu šćěpjenju, mjez druhim w strowotnistwje. Policija bě na městnje, njeje pak zapřimnyła. Foto: dpa/Sebastian Kahnert

Palaca so baterija elektrokolesa je w delnjosakskim Isernhagenje škodu 1,5 milionow eurow zawostajiła. Aku bě so za čas nabiwanja zapalił. Wobydlerjo wosobneho domu buchu přez alarmowu připrawu warnowani a móžachu so wuchować. Płomjenja pak rozpřestrěchu so na biblioteku, w kotrymž aku ležeše. Fachowcy wohnjoweje wobory wšak spěšnje zwěsćichu, zo bě defekt kolesoweje baterije woheń zawinił.

Prěnje narodniny swojeho synka je wopity muž w Ludwigshafenje z wutřělemi woswjećił a so tak wo zasadźenje policije postarał. 30lětny bě z trašawku wospjet do powětra třělał. Přiwołani policisća zhonichu, zo bě muž wjacore salwy składnostnje synkowych narodnin třělał. Wón pak njeměješe žanu dowolnosć, tajku bróń wobsedźeć. Zastojnicy pistolu a municiju sćazachu a delikt přizjewichu.

London (dpa/SN). Hladajo na strachi móžneho ruskeho nadpada na Ukrainu dla chce Wulka Britaniska bywšu sowjetsku republiku z lochkimi tanki wotwobaracymi brónjemi zastarać. Dźe wo to, polěpšić kmanosć Ukrainy, so wobarać móc, rjekny britiski zakitowanski minister Ben Wallace wčera w parlamenće. „Njejedna so wo strategiske brónje, wone Rusku njewohrožeja. Zasadźić maja so za wobaranje“, wón potwjerdźi.

Snadna ličba britiskich wojakow ma ukrainske wójsko krótki čas we wobchadźenju z tutymi brónjemi wukubłać, minister doda. Wo kotre brónje so konkretnje jedna, Wallace njerjekny. „Ukraina ma prawo, swoju mjezu zakitować.“ Wón na to dopominaše, zo Wulka Britaniska Ukrainje pomha marinu natwarić.

Damme (dpa/SN). W mnohich ratarskich zawodach, hdźež skót plahuja, přiběra po informacijach branše hospodarski ćišć dlijacych so pomocnych srědkow koronawirusa dla. Pjenjezy měli zawody skónčnje docpěć, kritizuje zajimowy zwjazk plahowarjow swini. Často leži ­na běrokratiskich zadźěwkach při při­zwolenju statnych srědkow, rěka w zdźělence zwjazka. To ma razne wuskutki za plahowarjow. Mnozy su mjeztym w pjenježnej nuzy. Zawody trjebaja politisku podpěru, rěkaše do dźensa planowaneho kongresa k ratarskej politice, na kotrymž chcyštaj so ratarski minister Cem Özdemir a wobswětowa ministerka Steffi Lemke (wobaj Zeleni) wobdźělić.