Aus der aktuellen Ausgabe vom Freitag, 27 Januar 2023

Zo nadeńdźeš w městach předawanišća za najwšelakoriše dariki, je znate. Zo tajke tež w małej wsy wuhladaš, je skerje wosebitosć, tež to, zo poskićuja takrjec „serbske dariki“.

Lejno. W Lejnje w gmejnje Pančicy-Kukow zwjetša jeno zastanješ, hdyž chceš do Kubicec hosćenca „K lipje“ załožić abo sej w bywšej cyhelerni pola Handrikec twaršćizny wobstarać abo twarsku mašinu wupožčić. Wot spočatka decembra minjeneho lěta je přidatna přičina, awto při hłownym puću wotstajić. Nětko móžeš so mjenujcy w Probianec samoposłužowarni rozhladować.

Něhdźe dwaj króć dwaj metraj wulka drjewjana chěžka ze serbskim a němskim napisom je tuchwilu hišće adwentnje wupyšena. W njej nadeńdźeš najwšelakoriše kreatiwne wudźěłki, kotrež so wulkotnje jako dariki k narodninam, mjeninam a dalšim składnosćam hodźa. Paleta poskitkow je jara wulka a saha wot zawkow ­a škleńcy hač k swěčkam a płatowym tobołkam. A to najrjeńše je, zo móže sej zajimc na kóždy wudźěłk cyle wosobinski napis zhotowić dać, tež ­serbski.

Chróšćanska gmejnska rada je swoju lětušu dźěławosć zahajiła

Chrósćicy (JK/SN). W rekordnej spěšnosći wotběža zjawny dźěl wčerawšeho prěnjeho lětušeho posedźenja Chróšćanskeje gmejnskeje rady. Přiwšěm pak při tym wažne naležnosće zrjadowachu, respektiwnje wot wjesnjanosty Marka Klimana (CDU) wažne nowosće zhonichu. Wón poda wobšěrnu rozprawu k stawej a k dalšemu postupowanju nastupajo prestižny objekt gmejny – nawjes a Cyrkwinsku horu w Chrósćicach. Miłe temperatury spočatk lěta su tomu dopomhali, zo hodźachu so dźěła zaso dale wjesć, prjedy hač je zymski intermeco zaso přetorhny. Tuchwilu su wšitke roły za wotwjedźenje spadkoweje wody do zemje składli a přihotuja so gulije. Kaž wjesnjanosta zdźěli, su tež statoki, kotrež su swoju spadkowu wodu do hłowneho systema zawjazali, zaso k nowym rołam přizamknyli. Při tym zwěsćichu, zo woda ze statokow zwjetša na wjace městnach do hłowneje roły běži hač su wobsedźerjo podali.

Budyšin (CS/SN). Něhdźe 70 do 80 socialnych dźěłaćerjow skutkuje w Budyskim wokrjesu we wobłuku prewenciskeho młodźinskeho dźěła. Kóždy z nich stara so potajkim wo něhdźe tysac ludźi z ciloweje skupiny. Někotři z nich su tele dny swoje dźěło zjawnosći předstajili. Na te wašnje wabjachu woni za swoju kampanju „Młodźinske a swójbne dźěło skutkuje“. Jedyn ze zaměrow je, w času snadnišich kasow budźić zrozumjenje, zo je socialne dźěło trěbne.

Slepo (AK/SN). Swoje 50lětne wobstaće swjeći lětsa Serbski folklorny ansambl Slepo. Na to skedźbni předsydka Stefanie Bierholdtec. Tónle jubilej chcedźa hódnje woswjećić a jón hižo nětko dołhodobnje přihotuja. Nazymu su wšelake akcije planowane. Po słowach předsydki chcedźa mjez druhim chroniku wo stawiznach ansambla wudać.

„Za tute předewzaće prosymy wšitkich bywšich a aktiwnych čłonow wo sobudźěło“, předsydka rozłoži. „Wjeselimy so na dopomnjenki ze zwučowanjow abo wustupow, na žortne anekdoty a wobrazy, zo móhła chronika čłonow za čłonow nastać. Wšitcy, kotřiž so z našim towarstwom zwjazani čuja, móža swoje dopomnjenki a stawiznički tohorunja zapodać.“ Móžno je to přez e-mail na abo z póštu na Serbski folklorny ansambl Slepo, Měrowa 65, 02959 Slepo.

Swjedźenske zarjadowanje k jubilejej ma so 8. septembra 2023 na žurli Serbskeho kulturneho centruma Slepo wotměć. Na samsnym městnje budźe dźeń na to tradicionalne zetkanje aktiwnych z něhdyšimi čłonami. Přichodne tydźenje chcedźa dalše informacije wo jubileju wozjewić.

Pančicy-Kukow. W pjećoch gmejnach zarjadniskeho zwjazka Při Klóšterskej wodźe je spočatk tohole lěta ze 7 223 wobydlerjemi 81 ludźi wjace bydliło hač před lětom. Tole wuchadźa ze statistiki, kotruž je předsyda zarjadniskeho zwjazka Stefan Anders wozjewił. Sobu wulki podźěl na tym ma Njebjelčanska gmejna, hdźež je so loni 26 dźěći narodźiło, lěto do toho wosom. Do gmejny Pančicy-Kukow je 105 ludźi přićahnyło, mjeztym zo bě to w lěće 2021 jenož 42. Po wšěm zdaću zwisuje to z ukrainskimi ćěkancami, kotřiž su sem přišli. Do Chróšćanskeje gmejny je 64 ludźi přićahnyło město 39 lěto do toho. Na tamnym boku je 44 wobydlerjow Worklečansku gmejnu wopušćiło, mjeztym zo bě to lěto do toho jenož 29. Nawopačny zjaw bě w gmejnje Ralbicy-Róžant, zwotkelž je jenož 41 wosobow přećahnyło, lěto do toho bě jich hišće 64. Na Pančičanskim stawnistwje mějachu loni dźewjeć wěrowanjow, w lěće 2021 bě jich dźesać.

Seniorojo zaso škotuja

Prochsrěbak pokradnyli

Słona Boršć. Njeznaći su srjedu njepřitomnosć wobsedźerjow wužili a so do chěže w Słonej Boršći zadobyli. Tam wšitko přepytachu a pokradnychu srěbanski roboter w hódnoće 150 eurow. Wěcna škoda pak wučinja něhdźe 650 eurow. Kriminalny technikar zawěsći slědy na městnje njeskutka. Kriminalna słužba je přepytowanja zahajiła.

Kak „krasnosć komunizma“ wšědny dźeń wupadaše, je tema knihi

Jurij Krawža je čisło 85 na lisćinje 132 serbskich inoficielnych sobudźěłaćerjow statneje bjezstrašnosće NDR (MfS), kotrychž je stawiznar Timo Meškank hižo před lětami dokumentował. Krawža je pod kryjacym mjenom „Günter“ z wulkim wotstawkom „najproduktiwniši“ donošowar tehdomnišemu ministerstwu za statnu bjezstrašnosć był. Šěsć rjadowakow z rozprawami je wón pjelnił, nimale dwaj tysac stron, takrjec telko kaž štyri tołste romany. Z dokumentami poslednjeho rjadowaka a někotrymi přidawkami druhich žórłow MfS je Timo Meškank třeću knihu w rjedźe „bjez wčerawšeho njeje jutřišeho“ wudał, z podtitulom „krasnosć komunizma abo 1980te lěta w Serbach“. Krasnosć programatisce proklamowaneho „raja na zemi“ běše hižo w swojej finalnej fazy. „Günter“ přijimowaše na 51 konspiratiwnych zetkanjach instrukcije za wučušlenje swojich serbskich bratrow a sotrow, zběraše informacije, pisaše a powědaše. W oficielnym žiwjenju běše Krawža wučer, lektor a spisowaćel. Pjeć knihow, kotrež je wón napisał resp.

Jadwiga Šurec z Rachlowa pola Kulowa piše wo swojim přebytku w Boliwiskej

Hdyž słyšiš wo južnoameriskim kraju Boliwiskej, mysliš zawěsće najprjedy raz na horiny Andy, na krasnu a mnohostronsku přirodu, snano tež na chudobu a na domoródnych w tradicio­nelnej narodnej drasće. Tak sym znajmjeńša mjez znatymi zhoniła, jako jim přeradźich, zo chcu wukrajne lěto tam přebywać. Haj, někak wšak to tež wšitko mjenje abo bóle woprawdźitosći wotpowěduje. W mojimaj wočomaj pak je Boliwiska wjele wjace. W swojej rozprawje wo přebytku w Južnej Americe chcu wam kraj, wobydlerjow a swoje dźěłowe městno tu zbližić a wam swoju nowu domiznu předstajić.

Před 150 lětami farar dr. theol. Jan Nowotny w Sprjejcach zemrěł

W druhej połojcy 19. lětstotka skutkowachu wjacori duchowni z Čěskeje a Słowakskeje jako fararjo w serbskich ewangelskich wosadach. Někotři z nich běchu w swojej čěskej domiznje katolscy měšnicy byli, do ewangelskeje cyrkwje přestupili a w Serbach nowu domiznu namakali. Do tohole rjada słuša dr. theol. Jan Nowotny, kotrehož 150. posmjertniny 31. januara wopominamy.

Z Čěskeje do Serbow