Aus der aktuellen Ausgabe vom Mittwoch, 22 März 2023

Berlin (dpa/SN). Kanclerski zarjad měješe so poprawom rozšěrić, tola zwjazkowy financny minister Christian Lindner (FDP) je tomu nětko zadźěwał. Planowany twar so tuchwilu přepruwuje, rěkaše wčera z financneho ministerstwa. „Nam pobrachuja zapłaćomne bydlenja. Tohodla njeje zmysłapołne k dispoziciji stejace přestrjenje za nowe ministerstwa wužiwać. Město toho pruwujemy, hdźe móhli bydlenja nastać“, Lindner zwurazni.

Zwjazkowy financny minister je hižo minjeny tydźeń přikazał projekty přepruwować. Pozadk toho je tež rozkora wo etaće zwjazkoweho knježerstwa. „Dyrbimy dołh pomjeńšić. Tohodla je trěbne wo tym wotwažować, što je trěbne a kotre naprawy móhli na zwoprawdźenje čakać. Nimo rozšěrjenja kanclerskeho zarjada słuša k tomu tež nowo­twar financneho ministerstwa.

New York (dpa/SN). Tři dny trajacu konferencu UNO po wšěm swěće pobrachowaceje pitneje wody dla su dźensa w New Yorku zahajili. Na zetkanju wočakowachu něhdźe 6 500 wobdźělnikow, mjez nimi knježerstwowych šefow, ministrow a zastupnikow hospodarstwa a ciwilneje towaršnosće. Wjeršk ma po woli swětoweje organizacije směrnicy a program dalšeho skutkowanja zdźěłać. Dotal žadyn mjezynarodny program nastupajo pitnu wodu njeeksistuje. Tež UNO žanu organizaciju nima, kiž by so wo to starała.

Problem swět wopřijaceje pobrachowaceje pitneje wody so po přeswědčenju UNO přichodny čas dale přiwótři. Je to sćěh přiběracych wobswětowych a hospodarskich problemow w zwisku z přiběracym zanjerodźenjom wody, rěka w rozprawje UNO. Hižo nětko bydli dźesać procentow swětoweho wobydlerstwa w krajach z wulkim abo jara wulkim strachom zastaranja z pitnej wodu. Dotalne wuspěchi na dobro zachowanja pitneje wody ma UNO za njedosahace, wšako problemy přichodnje dale přiběraja.

Wukrajni fachowcy z „módrej kartu“ měrja so na zapadne zwjazkowe kraje

Podstupim (dpa/SN). Z tak mjenowanej „módrej kartu“ chcedźa derje kwalifikowanych fachowcow zwonka krajow Europskeje unije jednorišo do Němskeje nawabić. Naprašowanje za tutym srědkom je pak w zwjazkowych krajach rozdźělne.

Wot awgusta 2012 ma módra karta připućowanje fachowcow z wukraja wolóžić – dobre dźesać lět pozdźišo je nawal fachowcow do Braniborskeje skerje přewidny. Prěnje połlěto 2022 su 193 fachowcam z krajow zwonka EU w Braniborskej časowje wobmjezowanu dźěłowu dowolnosć přizwolili. To bě 76 wjace hač samsny čas 2021, zwjazkowy zarjad za migraciju a ćěkancow zdźěli.

Přikład módreje karty bě tak mjenowana greencard za wukrajnych fachowcow w USA. Wuměnjenja tajkeho přizwolenja móžneho dźěła w Němskej su wysokošulski studij, dźěłowe zrěčenje abo kruty dźěłowy poskitk z jasnymi wuhladami na měsačnu zasłužbu.

„Dobre towarstwa za Serbow, te su naša nadźija“, rěka w spěwje „Kiž so swěrnje ­lubo maja“, kotryž zasłužbnym Serbam na jubilejach rady zaspěwaja. Zwjazana z tym je nadźija, zo towarstwa tež přichodnje dale na dobro našeho ludu skutkuja a předewšěm – zo namakaja dorost! Na wčerawšej hłownej zhromadźiznje Towarstwa Cyrila a Metoda mějach zaćišć, zo so tam tež w tymle prašenju něšto hiba. Wulka ličba swěrnych a zasłužbnych čłonow na jednej, a młodźi čłonojo wokoło noweho předsydy Cyrila Hančika na druhej stronje běchu widźomny wuraz generaciskeje změny. Hdyž so w druhich serbskich towarstwach wobhladujemy, widźimy, zo maja tam samsne problemy, zo pak so tež tam dale a bóle młodźi ludźo gratu přimaja. Z nazhonjenjow staršich čłonow wuknyć, dźěło z młodźinskim elanom dale wjesć a po tutym puću nowych ludźi za čestnohamtske dźěło zahorić, to drje je najlěpši puć, zo bychu „dobre towarstwa“ dale wobstali. Marko Wjeńka

Podstupim (dpa/SN). Nastupajo stupace žiwjenske kóšty za swójby žada sej frakcija Lěwicy w braniborskim krajnym sejmje darmotny wobjed za dźěći a młodostnych w pěstowarnjach a šulach. „Kóžde pjate dźěćo bydli w chudych poměrach. Swójbam je financielne wužadanje, dźěćom ćopły wobjed zapłaćić“, zdźěli wčera frakciski šef Sebastian Walter. Tež za swójby z normalnej zasłužbu je to dale a ćešo. Próstwu wo darmotny wobjed je Lěwica knježerstwu sposrědkowała.

Předsydka Maćicy Serbskeje dr. Anja Pohončowa wupraji so k rozprawje wo hłownej zhromadźizny a konkretizuje:

Na prěnjej stronje Serbskich Nowin z 20. měrca 2023 bě krótka rozprawa wo hłownej zhromadźiznje Maćicy Serbskeje wotćišćana. Tuta rozprawa njebě we wšěm nastupanju korektna.

18. měrca 1998 zemrě w Budyšinje bywši direktor Serbskeho wučerskeho wustawa (SWW) prof. dr. Kurt Pětř. Na Tuchorskim pohrjebnišću namaka wón swój posledni wotpočink. W žarowanskej hali rysowaše žarowanski rěčnik Achim Wjenk jeho zasłužby jako kubłar generacijow pedagogow, wosebje serbskich. Jako so kašć ze zemrětym z hale njeseše a wonka wotstaji, steješe jeho najwuši přećel z młodych lět, superintendent Gerat Wirth za nim, modleše so ćicho a jeho požohnowa. „Wšědnje smój z ćahom, wón z Rakec a ja z Komorowa, do Budyskeho gymnazija a wróćo jěłoj. Smój byłoj, njehladajo na rozdźělnej powołani a swětonahladaj, hač do smjerće dobraj přećelej“, praji Gerat Wirth.

Ze spočatkom nalěća tež město Budyšin rozkćěwa. Tele dny zwosadźeja sobudźěłaćerjo Budyskeje wobdźělenskeje a wobhospodarjenskeje towaršnosće (BBB) hrjadki a rostlinske bowy ze syrotkami a druhimi nalětnimi kwětkami. Městna wokoło štomow na Mjasowych wikach při tachantskej cyrkwi porjeńšištaj wčera Benedikt Gräsche a Silke König. Foto: Carmen Schumann

Na mnohich kubłanišćach maja ­najwšelakoriše poskitki, w kotrychž so temam zwonka wšědneho wučbneho plana wěnuja. Druhdy wobdźělnicy ­za to tež swoje kubłanišćo wopušća.

Budyšin/Ralbicy (JR/SN). Sydom šulerkow a šulerjow Serbskeje wyšeje šule Ralbicy je minjenu póndźelu redakciju MDR Radija Satkule wopytało. Wuknjacy z Ralbic su wobdźělnicy cyłodnjowskeho poskitka „Podcast a nowe medije“, w kotrymž mjez druhim rozhłosowe přinoški produkuja. Wot spočatka 2022 tónle poskitk na Serbskej wyšej šuli Ralbicy maja. Jón nawjeduje tamniši wučer Jan Rjeda.

Gmejnska rada zrěčenju mjez komunu a inwestorom přihłosowała

Krynhelecy (AK/SN). Sewjernje Wochoz w Hamorskej gmejnje ma solarny park Hamorska milinarnja nastać. K tomu je so tamniša gmejnska rada na swojim ­zašłym posedźenju znowa wuznawa. W Krynhelečanskim kulturnym domje radźićeljo wustawkam wo twarskim planje a wotpowědnemu zrěčenju přihło­sowachu.

Zrěčenje wotzamknjetej Hamorska gmejna a Łužiske předewzaće za wobnowjomne energije EPNE. „Jako wjesna rada předewzaće witamy. Naše najwjetše wobmyslenja su mjeztym z blida“, rjekny Wochožanski wjesny předstejićer Mario Weber. Dokelž pak je zarjadniske dźěło za tajki projekt jara wobšěrne, dyrbjał energijowy koncern LEAG gmejnu pjenježnje podpěrać, zo móhła wona wšitko zmištrować“, Weber měni.