Scholz chce prašenje dowěry stajić
Berlin (dpa/SN). Dobre tři lěta po tym, zo je Olaf Scholz (SPD) zastojnstwo zwjazkoweho kanclera nastupił, chcyše wón dźensa w zwjazkowym sejmje prašenje dowěry stajić, zo by nowowólby sejma 23. februara 2025 nastorčił. Powołujo so na artikl 68 wustawy chcyše wón zapósłancow prosyć, jemu dowěru wuprajić.
Njedyrbjał-li wón žanu wjetšinu w sejmje dóstać, chcyše so wón bjezposrědnje na to do hrodu Bellevue podać a zwjazkowemu prezidentej Frankej-Walterej Steinmeierej namjetować, zwjazkowy sejm rozpušćić. Powšitkownje z toho wuchadźachu, zo Steinmeier 28. septembra 2025 planowane wólby zwjazkoweho sejma na 23. februar přestorči.
Zo Scholz na kóncu tola hišće přećiwo swojej woli wjetšinu 367 hłosow dóstanje, je tak derje kaž wuzamknjene. Po pušćenju financneho ministra Christiana Lindnera (FDP) nawjeduje Scholz mjeńšinowe knježerstwo SPD a Zelenych. Zo njeby wón z hłosami AfD tole hišće wjetšinu hłosow dóstał, chcedźa so Zeleni při wothłosowanju hłosa wzdać.
Zeleni wo Kretschmera njerodźa
Njejasne poměry do wólbow sakskeho ministerskeho prezidenta
Drježdźany (dpa/SN). Sakscy Zeleni wo ministerskeho prezidenta Michaela Kretschmera (CDU) hižo njerodźa a nochcedźa při toho planowanym wuzwolenju zajutřišim, srjedu, za dotalneho mějićela zastojnstwa hłosować. We wozjewjenym stejišću wopodstatnjeja Zeleni to wosebje z wuskim časowym planom. Kretschmer bě so hakle minjeny pjatk z wjacorymi načolnymi kandidatami Zwjazka 90/Zelenych zetkał.
„Wězo smy zwólniwi, wo rjadowanych poměrach rěčeć. To běchmy tež minjenych 104 dnjow po wólbach“, w stejišću rěka. W běhu pjeć dnjow pak njeje to prosće móžne. Za spušćomny zakład trjebamy zwólniwosć wobeju stronow. „Tak krótko do wólbow bjez kóždeho plana rozmołwy zahajić, njepokazuje runjewon na chutnu wolu, za zhromadnosćemi pytać. Pod tutymi wuměnjenjemi njemóže ministerski prezident z hłosami frakcije Zelenych ličić.“ CDU podawa so 18. decembra „bjez jasneje wjetšiny ze stron demokratiskich stron do wólbow“.
Žana hańba wjace
Tysacy na mosće nad Nysu spěwali
To a tamne (16.12.24)
Wosamoćeny kófer na Kölnskich dohodownych wikach je so jako njestrašny wukopał. Policija namaka w nim jenož pěsk. Do toho běchu wčera adwentne wiki na Synowych wikach w Kölnje ewakuowali a wšu kónčinu zaraćili. Hižo sobotu dyrbjachu adwentne wiki na Kölnskim Rudolfowym naměsće podhladneho kófra dla ewakuować. Tež w nim namakachu jenož pěsk. Policija wšak nima žane zrozumjenje za tajke žorty.
Kuriozne misnjenje na jednej z Erfurtskich šulow: Wobydler wołaše policiju, po tym zo bě paduchow z retlemi w ruce wuhladał, kotřiž so na šulu měrjachu. Jako zastojnicy přijědźechu, paduši ani njećeknychu, ale so policistow zadźiwani prašachu, što wot nich chcedźa. Pozdatni paduši běchu sobudźěłaćerjo rjedźenskeje firmy a retle běchu chošća.
Tafle nimaja dosć žiwidłow
Osnabrück (dpa/SN). Najwjetši dźěl taflow w Němskej dyrbi hladajo na dale a wjace potrěbnych žiwidła sylnišo přidźělić. „Třećina taflow spyta, sej z čakanskimi lisćinami wupomhać, kotraž poněčim wotdźěłaja. 60 procentow dyrbi mnóstwo žiwidłow skrótšić, kotrež ludźom přewostaja“, rjekny předsyda třěšneho zwjazka taflow Andreas Steppuhn nowinarjam. Wón politikarjow namołwja, wjace přećiwo chudobje činić.
UNO: Syriska stabilna
Damaskus (dpa/SN). Po powalenju syriskeho wjelelětneho mócnarja Bashara al-Assada je so połoženje po posudku UNO w dalokich dźělach kraja stabilizowało. W kónčinach na sewjeru kraja wokoło Manbidsha dochadźa dale k wojowanjam, běrow UNO za nuzowu pomoc rozprawja. Tam maja rozprawy wo woporach wójnskich powostankow dla. Minjeny dny su ludźo minow dla žiwjenje přisadźili, mjez nimi dźěći. Jordaniska přihotuje wjeršk wo połoženju w Syriskej.
Zaso mortwi w Gazy
Hordźe so wojowarjo dobyćerskich milicow w Syriskej po powalenju ...
Ruske truty na ukrainske města
Kijew (dpa/SN). Ruska je Ukrainu minjenu nóc znowa masiwnje z trutami nadběhowała. W stolicy Kijewje a w druhich kónčinach kraja rujachu sireny. Wobydlerjo běchu namołwjeni, so do škitnych rumnosćow podać. Wo škodach njeje ničo znate. Nadpady registrowachu mjez druhim w městach Sumy, Charkiw a Wynnyzja na zapadźe kraja.
Na fronće so połoženje ukrainskich zakitowarjow dale pohubjeńša. Južnje města Kurachowe hrozy ukrainskim jednotkam wobkruženje přez ruske wójsko. Rozkazowarjo wo tym rozmysluja, so wróćo sćahnyć. Mjeztym připowědźa USA dalšu wojersku pomoc w hódnoće 500 milionow dolarow za Ukrainu. Pósłać chcedźa rakety a bojowe tanki.
CSU dale přećiwo Zelenym
Berlin (dpa/SN). CSU njeje w prašenju móžneje koalicije unije CDU/CSU ze Zelenymi po wólbach krajneho sejma k žanym kompromisam zwólniła. „Robert Habeck njebudźe z nami za kuchinskim blidom sedźeć a Zeleni nic za kabinetnym blidom“, rjekny šef krajneje skupiny CSU w zwjazkowym sejmje Alexander Dobrindt Augsburgskim nowinarjam wo Zelenych a jich hospodarskim ministrje.
Unija chce změnu dotalneje politiki přesadźić. „Ze Zelenymi njeje tajka politiska změna w Němskej předstajomna. Njecham Roberta Habecka ani za mojim kuchinskim blidom ani w tepjerni w pincy widźeć“, Dobrindt měni. Habeck je „mjezwočo hospodarskeje krizy w Němskej“. Dobrindt spřećiwja so tak runje kaž předsyda CSU Markus Söder jasnje kanclerskemu kandidatej CDU Friedrichej Merzej (CDU), kiž koaliciju ze Zelenymi njewuzamkuje. Habeck chcył tež w nowym knježerstwje z ministrom być.
