To a tamne (06.04.23)
Dokelž njeměješe 11lětna holca prawdźepodobnje wjace lóšt, ze swójbnym psom so wuchodźować, je wona psa prosće bjez wědźenja staršeju cuzemu na dróze předała. Nan holcy přizjewi pad policiji. Minjenu póndźelu bě holca w Landshuće z Yorkshire-terrierom po puću a narěča cuzeho, hač chce psa za něšto stow eurow kupić. Nimo rjaneho fenka pak ma 11lětna wulke mjerzanje ze staršimaj, kotrajž nětko za njeznatym kupcom pytataj. Policija jimaj pomhać njemóže.
Pilot w Južnej Africe dožiwi na lěće 3 300 metrow wysoko njeluboznu překwapjenku. Dokelž bě pytnył, zo so jeho naraz něšto „zymneho“ dótkny, wuhlada pod swojim sydłom jědojtu kobru. Pilot so tuž rozsudźi spěšnje na přichodnym lětanišću přizemić. Wón a štyrjo pasažěrojo mjeńšeje mašiny móžachu so wuchować. Njelubozny hósć, kobra, wšak bě so mjeztym zminył.
Planuja ofensiwu
Kijew (dpa/SN). Ukrainska wicešefina knježerstwa Irina Werešćuk je Ukrainjanow namołwjała, wot ruskich jednotkow wobsadźene kónčiny wopušćić. Tak planuje ukrainske wójsko ofensiwu. „Ukrainjanam radźu, kónčiny wopušćić a so do druhich krajow podać abo so na to přihotować“, wona wčera na syći telegram pisaše. Ukrainski prezident Wolodomyr Zelenskyj je so mjeztym do Pólskeje podał, hdźež chce so dźensa z tamnišim prezidentom Andrzejom Duda zetkać.
Medikamenty zaručić
Berlin (dpa/SN). Zwjazkowy kabinet měješe so dźensa w Berlinje z dowožowanjom medikamentow zaběrać. Tak bě minjene měsacy ćežko, wěste medikamenty schorjenym dodawać. Zwjazkowy minister za strowotnistwo Karl Lauterbach (SPD) namjetuje mjez druhim nowe postajenja za płaćizny. Němska dyrbjała za zhotowjerjow medikamentow zaso atraktiwna być. Předewšěm medikamenty za dźěći a antibiotika njemóžachu apoteki pacientam dodawać.
Płaća nětko wjace danje
Hačrunjež sławny Lipšćanski hosćenc „Auerbachs Keller“ w ...
Wuběrk z tójšto prašenjemi na Olafa Scholza
Berlin (dpa/SN). Unija ma při politiskim předźěłanju dawkoweho skandala wokoło Hamburgskeje banki Warburg tójšto wotewrjenych prašenjow k róli dźensnišeho zwjazkoweho kanclera Olafa Scholza (SPD). Je wjele přećiwkow a njejasnosćow, rjekny Matthias Hauer, zastupnik frakcije CDU/CSU zwjazkoweho sejma w financnym wuběrku wčera w Berlinje. „Amplowa koalicija bě tomu stajnje zaso zadźěwała, zo sej financny wuběrk na žadanje unije Scholza skaza.“ Tuž bě přepytowanski wuběrk zwjazkoweho sejma njewobeńdźomny. Scholz sam dyrbjał na wujasnjenju zajimowany być, wšako dźe wo jeho wěryhódnosć, Hauer potwjerdźi.
Přepytowanski wuběrk ma wujasnić, hač su za čas Scholza jako Hamburgskeho měšćanosty dawkowy pad politisce wobwliwowali a so wotpohladnje toho wzdali, zo ma banka městu 40 milionow eurow wróćić. Scholz twjerdźi, zo njemóže so hižo na podawk dopomnić. Mjeztym wšak je dopokazane, zo je so wón w lětomaj 2016 a 2017 z manageromaj banki zetkał.
Proces samo hakle klětu móžny
Palm Beach/Washington (dpa/SN). Bywši prezident USA Donald Trump na tym wobsteji, zo je njewinowaty. Wčera přečita statne rěčnistwo skóržbu přećiwo njemu. Tak jemu wumjetuja, zo je wobchodne podłožki w cyłkownje 34 padach na swoje dobro změnił. Systematisce je Trump spytał, negatiwne informacije wo nim njewozjewić, za čož je mjez druhim tež pjenjezy za mjelčenje płaćił. Z tym chcyše wón šansy na wólby prezidenta w lěće 2016 pozitiwnje wobwliwować.
Hnydom po přečitanju skóržby statneho rěčnistwa w New Yorku poda so bywši prezident zaso do Floridy, hdźež prěni raz wumjetowanje komentowaše. Tak wón wuzběhny, zo je stajnje wšitko za to činił, narod zakitować. Po jeho słowach spytaja jeho přećiwnicy tomu zadźěwać, zo móže wón znowa za zastojnstwo kandidować. Justicnemu systemej Trump njedowěri.
Dalši procedere w zwisku z procesom přećiwo njemu budźe so trochu dlijić. Tak je nětko móžno hišće próstwy stajić. Prawiznicy Trumpa móhli spytać, wěste podawki do dołhosće ćahnyć, tak zo móhł proces samo zwrěšćić.
Su motiwowani
Smochćicy (SN). Budyski wokrjesny zwjazk CDU je minjeny pjatk a sobotu klawsurne posedźenje w Smochćicach wotměł. Tak přihotowachu čłonojo klětuše komunalne wólby, wólby Sakskeho krajneho sejma a europske wólby. Něhdźe 50 sobustawow předsydstwa wokrjesa CDU, wjesnjanosća a předsydźa wjesnych skupin běchu přitomni. Dale zaběrachu so čłonojo ze šansami změny strukturow w kónčinje. K tomu přeprosychu sej prof. dr. Christiana Stegmanna z Němskeho centruma za astrofyziku kaž tež dr. Birgit Beckmann z centruma za twarske slědźenje „LAB-Lausitz Art of Building“.
Čłonojo CDU Budyskeho wokrjesa su wysoko motiwowani, dokelž z dobrymi kandidatami ke klětušim wólbam nastupja. „Za to nětko wšitko přihotujemy. Zaměr je, zo CDU najwjac hłosow wolerjow dóstanje, tak zo móžemy zaso w parlamentach zastupjeni być a našu domiznu sobu wuhotować“, podšmórny předsyda wokrjesneje CDU Udo Wićaz. Hladajo na wšitke wužadanja chcedźa zhromadnje změnu strukturow pozitiwnje wobwliwować, tak zo region inowatiwny a zajimawy wostanje. Tak chce CDU wobstejace hódnoty zachować .
Wopory njezboža
Mjenje zrěčenjow
Wiesbaden/Drježdźany (dpa/SN). Mjenje młodostnych rozsudźi so loni za wukubłanje w hladanskim wobłuku. Kaž z dotal předležacych ličbow wuchadźa, je cyłkownje 3 375 młodostnych wukubłanske zrěčenje podpisało – 60 zrěčenjow mjenje hač w lěće 2021.
Hladajo na cyłu Němsku je loni něhdźe 4 000 wosobow mjenje tajke zrěčenje podpisało. Statistiske zarjady na to skedźbnjeja, zo budu wšitke daty snano hakle w lěću předležeć. Mjeztym zo je w Sakskej mjenje rozdźělow, za tym wupada, zo je tomu w druhich krajach hinak.
To a tamne (05.04.23)
Dokelž chcyše muž w Praze přitulnu atmosferu w swojej bydlenskej stwě měć, je na swojim telewizoru widejo kaminoweho wohenja nastajił. Kedźbliwy susod pak zawoła wohenja w stwě dla wohnjowu woboru, kotraž je hnydom reagowała a jězdźidło na přizjewjene městno pósłała. Kaž wobornik w stolicy Čěskeje wčera zdźěli, wšak bě to njetrjebawši alarm. Přiwšěm chwala sej tajkich kedźbliwych susodow, wšako móhło tomu tež hinak być.
Betty Buckland w šotiskim Edingburgh je sej nětko són spjelniła. Zhromadnje z nazhonitym pilotom je 93lětna hišće raz sama z lětadłom lećała. Z 240 kilometrami na hodźinu a 600 metrow wysoko zemje lećeć bě jej wulkotne dožiwjenje. Buckland njeje prěni raz za wodźidłom lětadła sedźała. W lěćnych prózdninach přebywaše často pola přiwuznych w USA, hdźež měješe z kuzenkom móžnosć lećeć.
Finska oficialnje sobustaw NATO
Brüssel (dpa/SN). Finska přistupi dźensa oficialnje k NATO. K tomu měješe so popołdnju swjatočna ceremonija w Brüsselu přewjesć. Nimo finskeho prezidenta Saulija Niinistöa wobdźěla so tež zwjazkowa wonkowna ministerka Annalena Baerbock (Zeleni) a 29 kolegow tamnych sobustawskich krajow. Finski přistup je reakcija na nadpad Ruskeje na Ukrainu. Finska ma 1 300 kilometrow dołhu mjezu k Ruskej. Tež Šwedska chce z čłonom NATO być. Turkowska pak so tomu spjećuje.
Zastojnicy hromadźe dźěłaja
Hrádek nad Nissou (dpa/SN). Zwjazkowi policisća a jich čěscy kolegojo w přichodźe hraničnu kónčinu mjez Němskej a Čěskej přepruwuja. Tak chcedźa zhromadnje wosoby a jězdźidła kontrolować a wotpowědne informacije wuměnjeć, zdźělištej wobě stronje dźensa w Hrádeku nad Nissou. EU naprawu spěchuje. Zastojnicy wobeju krajow su wot lěta 2020 zhromadnje zwučowali a wotpowědnu rěč swojich nowych kolegow nawuknyli. Wšědnje su zastojnicy nětko w kónčinje wokoło Žitawy zasadźeni.
Trěbnych je miliardow eurow
