Washington (dpa/SN). Wobswět škitacu organizaciju Greenpeace su w USA k wotškódnjenju 300 milionow dolarow zasudźili. Sudnistwo w zwjazkowym staće North Dakota je rozsudźiło, zo dyrbi organizacija za sćěhi wočornjowanja a druhich wumjetowanjow w zwisku z wjele diskutowanym wolijowodom Dakota Access w staće North Dakota před wjacorymi lětami rukować. Pipelina wot lěta 2017 dźěła. Do toho bě Greenpaece měsacy přećiwo wolijowodej protestował, kotryž wjedźe po teritoriju tamnišich indianskich prawobydlerjow Standing Rock Sioux. Wobhospodarjenski koncern bě Greenpeace wobskoržił, dokelž je hospodarsku škodu zawostajił a dobremu mjenu koncerna zeškodźał.

Brüssel (dpa/SN). Zwjazkowy kancler Olaf Scholz (SPD) je so dźensa posledni raz na wjerškowym zetkanju EU w Brüsselu wobdźělił. Na zetkanju statnych ­a knježerstwowych šefow 27 čłonskich statow wuradźowachu mjez druhim wo planach brónjenja a wo podpěrje na dobro Ukrainy. Dalše temy běchu planowane naprawy za zesylnjenje europskeho hospodarstwa a jeho kmanosće do wubědźowanja kaž tež nowa namóc na Bliskim wuchodźe. Daloko sahace wobzamknjenja přiwšěm njewočakuja.

Hižo do posedźenja bě Madźarska připowědźiła, zo wobzamknjenja na dobro Ukrainy njepodpěruje. Kaž hižo na wjeršku 6. měrca wočakuja tuž tekst, kotryž jenož 26 statnych a knježerstwowych ­šefow podpěruje. Madźarske knježerstwo wopodstatni swój rozsud z tym, zo podpěruje nowy kurs prezidenta USA Donalda Trumpa. Tón chce sej z ćišćom na Ukrainu přiměr wunuzować.

Rozžohnowanska swjatočnosć za Olafa Scholza njeje planowana – hinak hač 2021 za Angelu Merkel (CDU).

Poradźowarjo noweho knježerstwa CDU/CSU a SPD namjetuja směrnicy

Berlin (dpa/SN). Rozmyslowanja politikarjow CDU nastupajo wožiwjenje importa ruskeho zemskeho płuna zbudźeja njeměr. „Hrozy wulka škoda za naš kraj ze stron čorno-čerwjeneho knježerstwa, jeli wuwojowanu njewotwisnosć Němskeje wot ruskich fosilnych energijow ­zaso na hrački stajamy“, rjekny zastu­powaca frakciska předsydka Zelenych powěsćerni dpa w Berlinje. Wotpowědne naprašowanje dpa wo tutej temje njejstej ani CDU a SPD wotmołwiłoj.

„Hdyž knježi zaso sprawny a wěsty měr w Ukrainje, dyrbimy tež zaso wo tym rěčeć směć, ruski płun kupować“, rjekny Jan Heinisch politiskemu časo­pisej Berlin Playbook. Wón je městopředsyda frakcije CDU w sewjerorynsko-westfalskim krajnym sejmje a wobdźěli so ­jako čłon dźěłoweje skupiny klima a energija na wudźěłanju energijowych politiskich směrnicow přichodneje koalicije CDU, CSU a SPD. „Ruska je jedyn z móžnych dodawarjow płuna na swěće“, wón měni. Hač płun přez płunowód abo z łódźemi do Němskeje přińdźe, njesu hišće wobzamknyli.

Nětko wěmy, što je „feministiska wonkowna politika“ Annaleny Baerbock: Zo na­čolna politikarka Zelenych po wólbnej ­poražce kwalifikowanej žonje přichodne dźěło jako prezidentka zhromadźizny UNO preč bjerje. Něhdyši wonkopolitiski poradźowar kanclerki Merkel ma to za „lózyskosć, najlěpšu a mjezynarodnje najnazhonićišu diplomatku z wuběžacym modelom narunać“. To je wězo jara njediplomatiske wuprajenje. Prajmy tak: Za žony w Iranje, kotrež su wopory statneho terora, dokelž so islamskim předpisam zdrasćenja spjećuja, njeje Baerbock wjele činiła. To feministki raznje kritizuja. Zo njeje jej nowy syriski mócnar porno muskim hosćom ruku dał, je bjez protesta znjesła. A jeje zeleny kolega Habeck je „partnerstwo za energiju“ z arabskimi emiratami podpisał, hdźež smědźa mužojo štyri žony měć. „Naše hódnoty“ wočiwidnje jenož płaća, hdyž wo Rusku dźe. Za lěto trjeba Baerbock pak zaso dźěło – zawěsće žadyn problem. Marcel Brauman