Berlin (SN/at). Łužiski festiwal lětsa znowa na tójšto kultury na njezwučenych městnosćach přeprošuje. Poskićić budu zarjadowarjo wot 25. awgusta hač do 10. septembra prapremjery a premjery z kulturnje skutkowacymi swětoweho formata. Zahajenske zarjadowanje prezentuje „zahajensku akciju“ w bywšej lětadłowej hali w Choćebuzu, za kotruž je režiser Luk Perceval twórbje „Quattro pezzi sacri“ (1887–1897) Guiseppa Verdija a „Ekklesiastische Aktion“ (1970) Bernda Aloisa Zimmermanna za dźiwadło přetworił. Hižo dwaj dnjej pozdźišo je festiwal w Budyskim Serbskim muzeju z hosćom. Tam čita dźiwadźelnica Claudia Michelsen tři powědančka z třoch dobow pólskeje lawreatki Nobeloweho myta za literaturu 2018, Olgi Tokarczuk, pod titlom „Sauermehlsuppe“. Zakónčacy koncert budźe 10. septembra w Kumwałdskej wjesnej cyrkwi. Hudźitaj wirtuoza na huslach Maxim Vengerova jeho partnerka na klawěrje Polina Osetinskaya twórby wot Schumanna přez Brahmsa hač k Prokofjewej. Zarjadowanja budu po cyłej Łužicy. Ministerskaj prezidentaj Braniborskeje a Sakskeje staj patronatstwo přewzałoj.

Malešecy (LTh/SN). Malešanska Domowinska skupina je z pomocu Budyskeje župy „Jan Arnošt Smoler“ a Załožby za serbski lud na krasnej mejskej njedźeli wčera na nalětni koncert do tamnišeje cyrkwje přeprosyła. A zo by cyrkej skoro hač na poslednje městno wobsadźena była, prošachu dźěći tamnišeje Witaj-pěstowarnje „K wódnemu mužej“ k programej a jich staršich k pohosćenju přihladowarjow ze słódnym tykancom a kofejom. To bě zaruka za wulkotnje poradźene popołdnjo. W krasnych drastach serbskich ewangelskich holcow z Budyskeho kraja a w šikwanych rubiškach tajkich prawych serbskich hólcow zawjeselichu dźěći pod nawodom wjednicy dźěćaceho dnjoweho přebywanišća, Borbory Kraloweje, z nowymi serbskimi spěwami wo nalěću a z rejemi kaž „Cyb, cyb, cybolinka“ abo „Wjerću so“. Samo třihłósny nalětni kanon, rjany kruch na akordeonje a serbski hit „Přećelstwo“ so poradźi wulkotnje z pomocu pěstowarskich a hortowych dźěći. Za to žnějachu mócny přiklesk wopytowarjow.

Wustajeńca „Čej’ da sy?“ njedźelu w Serbskim muzeju zahajena

Budyšin (SN/mb). Na šćežce citatow na špundowanju su Deyzi Doxs („Přećeljo, najwjetše bohatstwo, na swěće nimamo ničo lěpšeho“) a The Beatles („With a Little Help from My Friends“) na jednym třiróžku. Kuratorce Andreji Pawlikowej a wšěm­, kotřiž su přihot wustajeńcy „Čej’ da sy?“ wo serbskim katolskim swěće w času wot 1900 hač do dźensnišeho podpěrali, je so kedźbyhódna zestawa eksponatow ze wšědneho žiwjenja, swjedźenjow a politiskich rozestajenjow radźiła. Nimo kokuratora Tadeja Šimana a wjele žiwych „žórłow“ je tež dźěłarnička z młodymi Serbami wobsahi přinošowała. Moderator Syman Pětr Cyž a Julian Nyča z kruha tehdomnišich wobdźělnikow staj sej runja dalšim podpěraćelam wuslědki wobhladałoj. Přehladka je hač do 22. winowca w Budyskim Serbskim muzeju přistupna. Direktorka Christina Boguszowa je so na swjatočnym zahajenju, hudźbnje wobrubjenym wot spěwarki Mileny Wowčerjec a Mateja Dźisławka ze skupiny Astronawt (za křidłom), domiznje wjetšiny maćernorěčnych Serbow wěnowała.

Radwor (SN/MiR). Na premjeru knihi „Šijemy ze Štefi“ sobotu dopołdnja w Radworskej „Meji“ bě wulka ličba zajimcow přichwatała. Zarjadowarjej běštej Serbski experiMint campus Radwor a Ludowe nakładnistwo Domowina. Jednaćel LND Syman Pětr Cyž přitomnych witajo zwurazni, zo je kniha na tak zrozumliwe ­wašnje natwarjena, zo ma kóždy šansu, sej něšto rjane zešić. Zwjazany je nowy produkt ze serbskorěčnymi słowami, kotrež so skerje zrědka wužiwaja.