Za Staszel pytaja naslědnicu
Wulke Hendrichecy (SN/bn). Towarstwo Kunstbauerkino zdźěla, zo so Ola Staszel kónc lěta ze swojeho zastojnstwa rozžohnuje. „Po 14 intensiwnych a formowacych lětach, dźesać z nich we wodźacej róli“ jako ko-nawjednica filmoweho festiwala Nysa (NFF) chce wona po swójskich informacijach nowe powołanske puće kročić. Pod jeje nawodom „njeje so festiwal jenož programatisce dale wuwił, ale tež w swojim mjezynarodnym wuprudźenju profilował. Z wulkim angažementom, rozžahłosću za kino a ze sensibelnej žiłku za towaršnostnje relewantne temy je Ola Staszel festiwal přez wužadace časy wjedła a jako kulturnu swětłownju w třikrajowym regionje Němska–Pólska–Čěska etablěrowała“, towarstwo piše.
Festiwal organizowaca skupina pyta wotnětka za naslědnicu resp. naslědnikom. Městno ma so w najlěpšim padźe spočatk decembra wobsadźić. Požadana je „angažowana, nazhonita a kreatiwna wosobina, kotraž chce přichod NFF sobu postajeć“. Wotpowědne wupisanje su mjeztym na internetnej stronje festiwala wozjewili. Zajimcy měli swoje požadanje hač do 31. oktobra zapodać.
Wo knihach a kniharni (10.10.25)
Lěćo je nimo a pisane łopjena rejuja w nazymskim wětrje. Někotryžkuli wužiwa składnosć, zo by ze swójbu w nazymskich prózdninach hišće raz do ćopłeho wotlećał. Tamny přihotuje sej swój wačok a při rjanym wjedrje po blišej wokolinje pućuje. Jako inspiracija a nastork móhła jemu nasćěnowa protyka „Łužica – Łužyca – Lausitz 2026“ słužić, za kotruž je serbski fotograf Maćij Bulank zaso tójšto zajimawych kućikow našeje domizny ze swojej kameru zapopadnył. Někotre motiwy kalendra, kaž wjesele smějace so družki na swjedźenju Božeho ćěła abo dostojny křižerski procesion drje tele dny njewuhladaš. Ale k historiskemu wětrnikej pola Chasowa pućować, so nad pisanym lisćom při Budyskim spjatym jězoru wjeselić abo w Błótach čołmikować při słónčnym wjedrje hišće móžeš.
W Choćebuzu na Minu Witkojc spominali
Choćebuz. Mina Witkojc a jeje přiwuzni stejachu w srjedźišću zetkanja, kiž wotmě so zawčerawšim hladajo na 50. smjertny dźeń basnicy a publicistki 11. nowembra. Cyłkownje 15 zajimcow – mjez nimi pjeć z Bórkow pochadźacych a jedna přiwuzna – so zeńdźe, zo bychu so wo swójbje Miny Witkojc wuměnjeli. Hosćićelka a moderatorka zarjadowanja Stefanie Krawcojc jich powita a na to skedźbni, zo bě Mina Witkojc wěsty čas pola swojeje młódšeje sotry a jeje muža, konditarskeho mištra Karola Tepcza w Choćebuzu bydliła. Hačrunjež steješe w přeprošenju, zo njeměło zarjadowanje być zetkanje ekspert(k)ow, je nimale kóždy a kóžda z přitomnych swoje cyle wosobinske dopomnjenki na basnicu a jeje Bórkowsku wokolinu přinošował.
Móžny nowy format při skale
Miłoćicy (SN/bn). Pod hesłom „Bruchkult – spěwy Łužicy“ wuhotowaše čestnohamtsce skutkowace mustwo wokoło Jakuba Čornaka wčera při Miłočanskej skale hudźbne zarjadowanje we wobłuku Krabatoweho tydźenja. Spěwytwórc Sascha Hollick ze Sepic zahaji so sam na gitarje a banju přewodźiwši koncert ze swójskimi pěsnjemi, z kotrymiž poruča „optimistisce po dolinach žiwjenja kročić“. Po nim wustupowaca šansoneta-gitaristka Steppe und Moor z Rěčic sposrědkowa ze swojimi spěwami raz melancholisce, raz lakonisce, ale stajnje ze suchim humorom žiwjenske stawiznički. Jeje kredo: „Njezabudźće na ćopłotu we wašich wutrobach a na to, być z čłowjekom!“ Na to zamó hosćićel najprjedy w dueće z gitaristom Willyjom Stoyanom a pozdźišo ze spěwarkami skupiny Jacke Schwarz Banda publikum putać. Nimo hižo znatych spěwow, kaž na přikład „Čas słuša nam“, „Weit ist der Weg“ a „Lubosć“ předstaji kopicu nowšich twórbow, kotrež chce přichodnje „na tačel a, snano tež na kaseće“ wozjewić. Digitalnje budu „so wě tež přistupne, ale za to wšak njetrjebaće ničo zapłaćić“.
Z dźěłarničku wo zajimcow wabili
We wobłuku čěsko-němskeho, mjeztym 30 lět wobstejaceho hudźbneho ...
„Wichorojte časy“ w Njebjelčicach
Žurnalizm jemu wažny
Wojerecy (AK/SN). Čitarjow w Němskej wšědnje stronu www.hoyte24.de wopytaja. Přez 400 000 přistupow wob měsac naliči regionalna powěsćowa internetna platforma. Nakładnik Siegbert Matsch (61) chce z tym lokalny žurnalizm dale wuwić. „Chcemy wo wšědnym žiwjenju pisać“, wón wuzběhny. 61lětny, kiž je w Ćisku wotrostł, wotkry hižo zahe swoju žadosć za powěsće. W serbsko rěčnej swójbje je přeco wjele tajkich słyšał. Poprawom chcyše so wón z sportowym reporterom stać, tola w NDR běše za to jenož mało městnow. Najprjedy nawukny po maturje powołanje mechanikarja. Po času we wójsku přińdźe do Budyšina a rozsudźi so za wolontariat pola „Noweje Doby“. Tam podpěrachu jeho wosebje Manfred Laduš a Měrćin Weclich při pisanju tekstow jako młody žurnalist. Předewšěm Anton Nawka, něhdyši korektor Noweje Doby, pohonjowaše jeho teksty z Wojerowskej serbšćinu, potajkim z dialektom, spisać. Po studiju žurnalistiki a sportoweje wědomosće załoži Matsch z komilitonom Frankom Treue Wojerowski tydźenik a pozdźišo Wojerowski dźenik. To běše wot měrca 1993 do junija 2025 lokalny dźěl Sakskich Nowin (Sächsiche Zeitung).
Skomponowana poezija w muzeju
Budyšin (SN/bn). Hižo dlěje hač štwórć lětstotka wěnuje so bariton Ronald Hein, narodźeny w Budyšinje, tworjenju łužiskich komponistow. To njewotbłyšćuja jenož nahrawanja, kotrež je jako hudźbnik a wudawaćel zwoprawdźił, ale tež wosebite komornohudźbne koncerty, kotrež wot lěta 2022 w Budyskim Serbskim muzeju wuhotuje. Program, tónraz bjez titula, kotryž předwčerawšim zhromadnje z pianistom Hirotom Saigusu předstaji, přiwabi nažel jenož něhdźe 25 zajimcow, kotřiž sej spočatnje ani aplawděrować njezwažichu. Ćim wichorojćiši bě přiklesk po wuklinčenju wuměłstwoweho spěwa „Młodym Serbam“, skomponowaneho wot Bjarnata Krawca na wjerše Jakuba Barta-Ćišinskeho, z kotrymž hudźbnikaj zarjadowanje zakónčištaj.
