2025 pozitiwnje bilancowali
Budyšin (SN/bn). 25 premjerow w němskej a serbskej rěči je Němsko-Serbske ludowe dźiwadło w minjenym kalendrowym lěće předstajiło. Najwjace přihladowarjow, mjenujcy nimale 36 000, přiwabi inscenacija Budyskeho lěćneho dźiwadła pod hołym njebjom „Alice im Wunderland“. „Zawěšk za lěto 2025 je mjeztym zawrjeny, zhladujemy na wulku prezencu a žiwu wćipnosć. Dohromady 123 643 wopytowarkow a wopytowarjow je na 801 zarjadowanjach žurle pjelniło, so smjało a so dźiwało, diskutowało a z nami dźiwadło dožiwiło. Wutrobny dźak wšitkim, kotřiž su k tomu přinošowali – na jewišću kaž tež před a za nim! Tute ličby njesteja za statistiku, ale za přitomnosć, za bjezposrědne dožiwjenja mjez publikumom a hrajerjemi, za wuměnu mjez žurlu a jewišćom, za přiklesk. Wone su pohon a nas zawjazuja, tež přichodnje ze zmužitosću, rozpalitosću a zastupujo jasnu poziciju postupować.“ Tele słowa intendanta NSLDź Lutza Hillmanna su wobstatk zdźělenki, z kotrejž NSLDź zašłe dwanaće měsacow bilancuje.
Meja w nowym outfiće koncertowała
Z galu nic jenož we Łužicy po puću
Francoski oratorij zaklinčał
Mětšk na nowej CD
Film wo póndźelach připowědźili
Słowo lěta wolić!
Budyšin (SN/bn). Druha faza akcije „Hornjoserbske słowo lěta 2025“ so nachila. Hišće hač so 27. decembra móža zajimcy z dohromady dwanaće namjetow swojeho faworita wuzwolić. Wothłosować hodźi so přez wotkaz na webstronje www.serbske-nowiny.de abo z pomocu tu wotćišćaneho qr-koda.
Dohromady 33 namjetow bě jury pruwowała, dwanaće z nich steji na lisćinje kandidatow. Jury wuzběhny, zo dyrbja słowa „po móžnosći zwisk k lětu 2025 měć a so za tónle čas často jewić. Njeje-li časowy zwisk daty, pruwujemy, hač ma słowo potencial, so nic jenož w ertnej wobchadnej rěči, ale tež w spisownej etablěrować, abo hač so stare, pozabyte słowo zaso wožiwja.“
Zběrka 111 basnjow
Přichod digitalny a darmotny
Serbski institut hotuje so z pozitiwnej bilancu na jubilejne lěto
Budyšin (SN/bn). „Přeco hišće wobhladuje so Serbski institut (SI) častodosć jako poměrnje małe slědźenišćo. Hladajo na něhdźe 70 wědomostnych projektow, kotrež hač do 80 sobudźěłaćerkow a sobudźěłaćerjow lěto wob lěto wobdźěłuje, pak tónle wobraz wobstejnosćam dawno hižo njewotpowěduje.“ Z tymile słowami zahaji direktor SI prof. dr. Hauke Bartels wčera nowinarsku rozmołwu, w kotrejež wobłuku zastupjerjam medijow bilancu nachilaceho so lěta 2025 kaž tež wuhlady na klětuši 75. institutny jubilej předstaji. Naspomnjena ličba projektow wopřijima nimo slědźenja na tradicionalnymaj polomaj SI, potajkim rěčespyta a stawiznow, mjeztym tež samostatny wotrjad za regionalne wuwiće a škit mjeńšinow, (přirunowace) kulturne wědomosće a kopicu interdisciplinarnych kooperacijow. „Bjez solidneho bazoweho financowanja njeby móžno było, wšitke tele nadawki spjelnić“, podšmórny Bartels na institucionalne spěchowanje ze stron Załožby za serbski lud pokazawši, kotrež wučinja něhdźe tři miliony eurow wob lěto.
