Dorostowy chór pola susodow
Znajeće SAL, Societas amicuum Liberec? To je 2016 załožene, nadměru za spěchowanje kulturneje wuměny mjez Čěskej, Pólskej a serbskej Łužicu so zasadźowace towarstwo.
Liberec. Dorostowy chór a rejwanska skupina Budyskeho Serbskeho gymnazija stej składnostnje 10. róčnicy załoženja SAL wot zańdźeneho pjatka hač do wčerawšeho w Liberecu přebywałoj. Hnydom po přijězdźe započachu šulerjo pjatk dopołdnja pilnje zwučować. Sobota bě za wšěch wužadaca: Poł hodźiny nóžkowachmy wot młodownje do centruma, do Krajneje wědomostneje knihownje, hdźež přihotowachmy so na wobšěrny swjedźenski program SAL. Popołdnju dožiwi publikum wotměnjawe přinoški: Naš chór bě z rejwanskej skupinu sep woblubowanych serbskich a mjezynarodnych spěwow a rejow spřihotował. Přinoški dźěćaceje rejwanskeje skupiny z Čěskeje kaž tež krótke wideja wo 10lětnej dźěławosći SAL swjedźenske popołdnjo skulojćichu. Pjatk a sobotu wječor wužiwachu naši šulerjo za zhromadnu zabawu a za krótke wuchodźowanje.
Herbstwo Łužicy w fokusu
Kubło rěče a spěwow zachować
Juliana Kaulfürstowa zhladuje na 16 intensiwnych lět w Slepom
Cyłkownje 16 lět je so Juliana Kaulfürstowa za serbsku rěč, kulturu a hajenje tradicijow w Slepjanskej wosadźe angažowała. Předewšěm Njepilic statok w Rownom a Hanza Šusterowy statok w Trjebinje jej na wutrobje ležitej. W běhu wjacorych lět je wona swědomiće dopomnjenki serbskich drastynošerkow zběrała. Čestnohamtsce angažuje so Juliana Kaulfürstowa dźensa w towarstwje Njepilic statok w Rownom kaž tež w Slepjanskim towarstwje Kólesko. Wo wažnych měznikach jeje skutkowanja a wo jeje přichodźe je so Andreas Kirschke ze 46lětnej slawistku rozmołwjał.
Njedawno sće na swoje poslednje pućowanje jako rěčna motiwatorka w Slepom přeprosyła. Dokal sće pućowali?
Dźěše něhdźe dwanaće kilometrow wot Slepoho podłu železniskeje čary do Grodka. Mjez 25 wobdźělnikami běchu samo ludźo z Choćebuza, Budyšina a Drježdźan. Po puću powědach jim lóštnej serbskej anekdoće. Zdobom mějach serbsku hru ze słowami přihotowanu. Zhromadnje zaspěwachmy Handrija Zejlerjowu pěseń „Što radosć rjeńšu dawa“.
Maćicarjo Prahu wopytali
Praha (SN/LuNo). Šěsć čłonow Maćicy Serbskeje inkluziwnje jeje předsydki Anje Pohončoweje, je minjenu sobotu Prahu a tamniše Towarstwo přećelow Serbow (SPL) wopytało. Městno zetkanja wobeju skupinow běše njewšědne: mały kěrchow w měšćanskej štwórći Motol na južnej kromje čěskeje stolicy, hdźež ma sorabist a wažny Maćicar Jiří Mudra swój wěčny wotpočink. Na njeho su spominali a jemu serbsku hymnu zaspěwali. Katja Brankačkec, kotraž w Praze prěni hornjoserbsko-čěski onlinowy słownik „Mudra 2.0“ přihotuje, čěskeho sorabista wobšěrnje předstaji a wuzběhny jeho entuziazm při nałožowanju serbskeje rěče tež hišće we wysokej starobje.
Portret ambiwalentneje antifašistki
Lětuše 130. posmjertne narodniny Marje Grólmusec su mnohim towarstwam, institucijam a zjednoćenstwam z přiležnosću, ze sepju zarjadowanjow na serbsku katolsku antifašistku spominać. W tym zwisku wotmě so wčera we wobłuku rjadu Budyska akademija přednošk stawiznarki a nawodnicy Drježdźanskeho wopomnišća Mnichowske naměsto.
Zazběh festiwala
Drježdźany (SN/bn). Dźensa zahaji so Drježdźanski filmowy swjedźeń. Wot lěta 1989 wot towarstwa Filmowa iniciatiwa Drježdźany wuhotowany, na krótkofilmy specializowany festiwal słuša k najbóle profilowanym zarjadowanjam swojeho razu w Němskej. Ćežišćo programa tworja wubědźowanske přinoški w jědnaće segmentach. Lětsa bu wjace hač 3 000 namjetow z cyłeho swěta zapodatych, 70 z nich konkurěruja wo myta.
Wo knihach a kniharni (10.04.26)
Hižo jako dźěćo běch wot kniharnjow a bibliotekow fascinowana. Wěm so hišće derje dopominać, zo sej po šuli prawidłownje z kolesom tam dojědźech, so cyłu chwilu mjez regalemi wokoło šmórach, prjedy hač so skónčnje za jednu abo wjacore knihi rozsudźich. Wěsty čas běch cyle zahorjena wot „Třoch prašakow“ – je to knižny rjad kriminalkow US-ameriskeho spisowaćela Roberta Arthura, w kotrymž třo hólcy w Kaliforniskej wšelake kriminalistiske pady wuslědźeja. Dyrdomdeje młodźinskich detektiwow běch tehdom z wulkim zajimom čitała a tohodla mje wosebje wjeseli, zo w Ludowym nakładnistwje bórze knižka serbskeje trójki „Wćipne nosy“ z pjera Lubiny Hajduk-Veljkovićoweje wuńdźe. To su Hanka, Korla a Lucian, kiž runja mojim ameriskim idolam z detektiwiskej čućiwosću mysteriozny pad rozrisaja. Přeju jim kopicu zahoritych čitarjow a čitarkow, zo by so z toho snadź nowy serbski rjad dźěćacych knihow wuwił.
Bibliski musical na Třělnišću pokazali
Wliw spěwa na rěč
Budyšin (SN). W Małym rjedźe Serbskeho instituta (SI) je wušła kniha Marleen Schindler „Do wutroby spěwane. Ochranowska mystika ranow w němskich a serbskich spěwach 1740ych lět“. Germanistisku studiju bě awtorka w lěće 2023 jako masterske dźěło na Techniskej uniwersiće Drježdźany dopisała. Lěto pozdźišo spožči jej Maćica Serbska za nju Myto Arnošta Muki. W srjedźišću steja spěwy bratrowskeje jednoty ze swojej charakteristiskej rěču, kotraž je němčinu runje tak kaž serbšćinu wobwliwowała.
Publikacija je w Smolerjec kniharni a w SI na předań a online zdarma přistupna.
Z přećelemi so najlěpje hudźi
„Prózdniny z instrumentom“ rěka prózdninski poskitk Serbskeho ludoweho ansambla. Što so tam stawa? Smy na jednej z probow pobyli a so za tym wobhonili.
Budyšin (SN/MG). Žurla Serbskeho ludoweho ansambla (SLA) je wot póndźele zdobom probowa rumnosć dohromady 17 hólcow a holcow, kiž so na poskitku „Prózdniny z instrumentom“ wobdźěla. Šesty raz ansambl mjeztym hižo wosebite prózdninske lěhwo zarjaduje. Z tym skići młodym hudźbnicam a hudźbnikam móžnosć, zhromadnje hudźbne kruchi nazwučować. Při tym jich Jan Brězan-Hejduška nawjeduje. Wulce koncentrowany a sćerpnje wón swojich chowancow přez proby wjedźe. Na wjacorych kruchach za čas lěhwa dźěłaja. Pjatk chcedźa wuslědki swojim swójbnym, znatym a přećelam předstajić, a to popołdnju w pjećich na žurli SLA.
