Studijo prawdźepodobnje dale hraje – pytaja talenty
Budyšin (SN/bn). Dohromady štyri króć je elewka Činohrajneho studija při Němsko-Serbski ludowym dźiwadle Sarah Cyžec 16lětnu Sunny jako hłownu a jeničku rólu w inscenaciji „Pink Guerilla“ na jewišću małeje žurle Budyskeho Dźiwadła na hrodźe předstajiła. Cyłkownje je sej hru z pjera Choćebuskeho awtora Daniela Rattheija w dźělnym přełožku Lubiny Hajduk-Veljkovićoweje – wědomje běchu so za „awtentiskosć přisporjacu serbsko-němsku wersiju rozsudźili – něhdźe 200 wopytowarjow wobhladało, wjetšina z nich šulerjo. Režiju běše nawoda studija Ralph Hensel wukonjał. Tuchwilu wo tym rozmysluja, hru tež w přichodnej hrajnej dobje pokazać, štož je w stawiznach ćělesa skerje rědki zjaw. Dokelž pak je Cyžec mjeztym připrajiła, dalše lěto jako elewka na Budyskim jewišću skutkować chcyć, su wuhlady na wospjetne předstajenja „dosć dobre“.
Jan Suchi
Wosebite dožiwjenje wo znatym njeznatym
Wustajeńca the „The Mystery of Banksy – A Genius Mind“ we wuměłstwowej miliarni w Lipsku
Prašeš-li so za mjenom „Banksy“ – ći wjetšina z wěstosću z „haj“ wotmołwi. Hdyž pak so prašeš za tym, kak wuměłc wupada, tak rěka wotmołwa zwjetša: „Njewěm“. To zaleži na tym, zo wón swoju identitu chowa. A runje to wučinja mysterioznosć wokoło woneho britiskeho superstara street-artoweje sceny. Pućowansku wustajeńcu pod titulom „The mystery of Banksy – A Genius mind“, móža sej zajimcy tučasnje we wuměłstwowej milinarni w Lipsku wobhladać.
Mnohostronske dźěła
Akciski tydźeń fasetow wuměłstwa
Budyšin (SN/bn). „Farbtonale 2022“ je hesło akciskeho tydźenja Budyskeho wuměłstwoweho towarstwa a Kamjentneho domu, w kotrehož wobłuku wot minjeneje póndźele hač do njedźele „najwšelakoriše kreatiwne činitosće hromadu zrostu“, kaž w brošurce zarjadowanja rěka.
Fascinowacy potencial
Chowanje słónca ze soulom a popom
Słódki tróšt a małe myto
Žadaja sej strategiju za koronasezonu
Krajny zwjazk kulturneho a kreatiwneho hospodarstwa Sakska je w zjawnym stejišću wjacorym sakskim ministerstwam swoje starosće hladajo na pobrachowacu strategiju w hrožacym padźe přiwótřowaceho połoženja koronapandemije zwuraznił. W nim žada sej wjacore naprawy a spěchowanja.
Drježdźany (SN/CoR). „Jenož z transparentnej a přemyslenej strategiju, kotraž bazuje na dopóznaćach minjeneju koronazymow, móžemy kulturnemu a kreatiwnemu hospodarstwu Sakskeje w přichodnym ćežkim času naslědnje pomhać a njereparujomnym škodam zadźěwać“, rěka w stejišću. Krajny zwjazk zastupuje zajimy něhdźe 10 000 předewzaćow a 40 000 w kulturnym wobłuku dźěławych. Zwjazki Kreatiwna Łužica, Kreatiwna Kamjenica, Kreatiwny Lipsk, Kreatiwne Rudny hory a Wir gestalten Dresden su tu zastupjene.
Baje a myty Łužicy a Serbow
Korzym (RŠ/SN). Hnydom dwě paralelnej wustajeńcy je Korzymska iniciatiwa „Im Friese“ minjeny pjatk wotewriła: „Baje a myty Łužicy a Serbow“ a fotowu wustajeńcu „Rjanosć Ukrainy – to štož je wohrožene“. Wječor wobrubi něhdyši Wjazońčan Matthias Jakisch na swojej samotwarjenej kamjentnej pišćałce.
Wustajeńca rězbarki wotewrjena
Běła Woda (JŁu/SN). Wustajeńcu z twórbami rězbarki Dorotheje von Philipsborn (1894-1971) su minjenu srjedu w Běłej Wodźe wotewrěli. W Běłowodźanskim muzeju škleńcy witaše nawodnica muzeja Christine Lehmann něhdźe 30 zajimcow na wotewrjenje wustajeńcy wuměłče Dorotheje von Philipsborn, kotraž je w měsće před 51 lětami zemrěła.
Wuměłča je so w bliskim šleskim Strehlitzu narodźiła a po Druhej swětowej wójnje domiznu wopušćić dyrbjała a sej nowu – najprjedy w Trjebinje a potom w Běłej Wodźe – namakała. Znata je wona přez swoje mjeńše a wjetše spodobne plastiki, předstajejo wosebje dźěći a zwěrjata. Widźeć su wone w blišej wokolinje, ale tež we Wojerecach.
Znata je wulka Boža martra w Slepjanskim Božim domje a tam tež wopomnjenska tafla za padłych Druheje swětoweje wójny, předstajejo tež žarowacu Serbowku. Skerje mjenje je wona drjewjane figury zhotowiła a tohodla je žonjaca trójka – wowka a mać z dźěsćom w Slepjanskej narodnej drasće – wosebitosć jeje skutkowanja a wosebitosć mjez druhim tamnišeje wustajeńcy.
