Po přestawce přez hody a Nowe lěto su nimale wšitcy koparjo FC Energije póndźelu k treningowemu zazběhej za druhu połseriju do Choćebuza přijěli. Štyri tydźenje maja woni nětko chwile so přihotować. Potom započnje so zaso horca faza winowatostnych dypkowych hrow.
Dokelž bě měsac december połny priwatnych terminow, rozsudźichu so koparjo Sokoła Ralbicy/Hórki, swoju hodowničku na prěnju sobotu januara přesunyć. Hižo připołdnju zetka so 17 akterow prěnjeho a druheho mustwa w sportowni, zo bychu so tam někotre hodźiny wubědźowali. Stanij Šewc a Jurij Bjeńš chcyštaj z pjeć stacijemi najlěpšeho w rjadach delanskich koparjow zwěsćić. Na prěnjej staciji dyrbješe kóždy z bulom tak spěšnje kaž móžno parcours přeprěčić. Najlěpši bě Denny Gloxyn ze 14 sekundami. Na dalšich stacijach (přihrawki, flanki, hłójčkowane bule a třělenje z dźewjeć metrow do wěsteho kašćika) wukopachu so stajnje druzy jako najlěpši, tak zo dyrbještaj zamołwitaj chětro ličić, prjedy hač bě cyłkowny dobyćer znaty. Tón wšak rěkaše na kóncu tola Denny Gloxyn, kiž bě 276 dypkow docpěł, a to před Bosćijom Lulakom (264).
Minjenu sobotu popołdnju su wokolne młodźinske mustwa zaso ze zapalom w Chróšćanskej sportowej hali za bulom honili a wo požadany pokal Towarstwa Cyrila a Metoda wojowali.
Cyłkownje sydom mustwow bě so pola hłowneho zamołwiteho turněra Guida Zahrodnika přizjewiło, tak zo móžeše wón po wulosowanju dweju skupin po zwučenym systemje hry nawjedować. Jemu poboku za kompjuterom sedźeše Tadej Špitank, kiž wuslědki a třělene wrota registrowaše.
W skupinje A hrajachu Traktor Lejpold (hrajerjo z Noweje Wjeski a Kozarc), Lacio Chrósćicy, Inter Chrósćicy a Topanowi japoštoljo (młodźina z Njebjelčic a Serbskich Pazlic). W skupinje B nastupichu cyłki z Wotrowa, Viktoria Worklecy a Puklot Chrósćicy (zestawa z juniorow kaž tež koparjow 1. a 2. mustwa SJC).
Hózk (UH/SN). Zo so 27lětny Roland Salowski a 31lětny Thomas Jentsch w małym Hózku stajnje zaso wo překwapjenki starataj, wo tym swědčeše minjenu njedźelu prěnje poradźene nowolětne płuwanje early blackbird. Přećelej běštaj je runje tak zhromadnje organizowałoj kaž wuspěšne wubědźowanje blackbird-run w pózdnim lěću 2015 a 2016. Wulka ličba wobdźělnikow na běhomaj po zadźěwkach dopokaza, zo předewšěm młodźi ludźo wurjadne wužadanja rady na so bjeru. Čehodla potajkim tajke něšto podobne tež w zymje njepřewjesć?
W Rychbachu pola Lubija wotmě so regionalne volleyballowe finale starobneje skupiny II pod hesłom „Młodźina trenuje za olympiju“. Mjez wobdźělnikami štyrjoch najlěpšich šulow wuchodneje Sakskeje dobychu holcy 9. do 11. lětnika Serbskeho gymnazija Budyšin (SGB) wšitke partije z 2:0 a pojědu w měrcu na krajne finale do Dippoldiswaldy.
Najwuspěšniše holče volleyballowe mustwo Budyskeho Serbskeho gymnazija je so štwórty raz za sobu za sakske finale skwalifikowało. To je w tutej bulosportowej družinje nowy rekord na SGB. Po dobyću bronzy w aprylu 2014 a 6. městnje w měrcu 2015 wubědźichu sej hrajerki wokoło kapitanki Luizy Šubertec loni slěbro a před něšto dnjemi samo złoto.
Sportowe towarstwo Módro-běli Kulow je spočatk lěta znowa na swój tradicionalny piwowy cup přeprosyło. Koparski turněr podpěruje stajnje Kulowska měšćanska piwarnja z Glaabec swójbu. Cyłkownje wosom cyłkow je so wubědźowało, a to w dwěmaj staflomaj. W stafli 1 běchu to Jednota Wojerecy, ST Grodk, Motor Kumwałd a Kulowske prěnje mustwo; w stafli 2 zakitowar pokala SZ Weixdorf, SC Großröhrsdorf, Sokoł Ralbicy/Hórki a druhe mustwo domjacych.
Na tajke wurjadne „kejžorske wjedro“ w zwisku z 50. jubilejnym Budyskim silwesterskim běhom, na kotryž je Budyske lochkoatletiske zjednoćenstwo Čerwjeno-běli 90 přeprosyło a na kotrymž so 46 króć sobu wubědźowach, njemóžu so docyła dopomnić. Tele běhi su wot wšeho spočatka 1967 stajnje silwester dopołdnja, a lubowarjo běhanja zakónčeja w Budyšinje wotpowědne lěto rady z tajkim wurisanjom w kruhu sportowych přećelow. Na jubilejnym wubědźowanju posledni dźeń lěta 2016 je cyłkownje 342 atletow w starobje pjeć do 82 lět cil docpěło, štož běše rekordne wobdźělenje. Dotalny rekord 285 z lěta 2015 bu tak wo 57 starterow přetrjecheny.
Aktiwni wubědźowachu so po tradiciji na jednej z čarow 2,5 km, 5,3 km abo 10,6 km, kotrež wjedu z Młynkec łuki po pućach a podłu Sprjewje do rjaneho Humboldtoweho haja a zaso wróćo. Starterojo na 10,6 km dyrbja kołočaru 5,3 km dwójce zmištrować. Wobdźělnicy běchu z cyłeje Hornjeje Łužicy a wulkeho Drježdźanskeho knježerstwoweho wobwoda kaž tež z Gothy, Podstupima, Berlina, Rostocka, Mnichowa, Stuttgarta, Hamma a ze Zgorzeleca.
Serbska koparska wubranka (SKW) je wčera na halowym koparskim turněrje w Kamjencu štwórte městno wobsadźiła. Za SKW, wo kotruž staraštaj so trenar André Strelow a mustwowy nawoda Bjarnat Deleńk, nastupichu wrotar Hubertus Čórlich (FSV Fortuna Pankow 46) a pólni hrajerjo Tom Henčl (SJ Chrósćicy) , Bosćij Cyž (SJ Chrósćicy), Fabian Korjeńk (Sokoł Ralbicy/Hórki), Fabian Bejma (Rakečanske KT), Simon Žur (SJ Chrósćicy), Robert Lejnart (SJ Njebjelčicy), Tomaš Bejma (Sokoł Ralbicy/Hórki) a Dirk Šołta (Wacker 09 Choćebuz-Strobice). Z Jonasom Krawčikom a Dennyjom Kralom (wobaj FC Hornja Łužica Neugersdorf), kaž tež Patrikom Wokom, Feliksom Hrjehorjom a Frankom Ričelom (wobaj Jednota Kamjenc) měješe Serbska koparska wubranka hišće dalšich akterow a trenarja na halowym parkeće w sportowej hali při Kamjenskim lětanišću. Nimo runje mjenowanych staraše so serbski koparski sudnik Matijas Kral ze Smjerdźaceje (Sokoł Ralbicy/Hórki) zhromadnje z kolegomaj-sudnikomaj wo nawod hrow. Zapósłanc krajneho sejma Alojs Mikławšk (CDU) bě patronat za turněr přewzał.