Zmjechča wysoki cil nastupajo CO2?
Nastupajo swoju energijowu strategiju 2030 bě Braniborska druhim zwjazkowym krajam z přikładom. Nětko je přisłušne ministerstwo dokument pohódnoćić dało a rozmysluje mjez druhim wo korekturje zalutowanskeho cila za CO2 wot 72 na 55 procentow.
Podstupim/Choćebuz (SN/at). Choćebuska wobswětowa skupina pod třěchu Zeleneje ligi so starosći. We wotpohladanym „zmjechčenju“ zalutowanskeho cila za CO2 widźi wona ranjenje koaliciskeho zrěčenja SPD a Lěwicy za tuchwilnu wólbnu periodu. Tam rěka, zo „ma wustork wuhlikoweho dioksida hač do 2030 porno referencnemu lětu 1990 wo 72 procentow woteběrać“. W skupinje tukaja, zo zwisuje wotpohlad zniženja tež z tym, zo LEAG w Janšojcach žanu nowu milinarnju njetwari.
Awtobomba 24 ludźi moriła
Kabul (dpa/K/SN). W afghaniskej stolicy Kabulu je dźensa k ćežkej detonaciji dóšło, štož žadaše sej znajmjeńša 24 smjertnych woporow. Dwanaće zranjenych su do chorownjow dowjezli. Po rěčniku nutřkowneho ministerstwa bě w měšćanskej štwórći Gulai-e-Dawachana blisko priwatneje uniwersity awtobomba rozbuchnyła. Šofer wozydła je tohorunja žiwjenje přisadźił. Štó za njeskutkom tči, njeje dotal wujasnjene.
Schulz kritizowany
Dortmund (dpa/SN). Warnowanje kanclerskeho kandidata SPD Martina Schulza před nowej hrožacej krizu ćěkancow dla je wšelake reakcije zbudźiło. Předsydźe FDP Christianej Lindnerej su wuprajenja Schulza wólbnobojowy manewer, wšako je SPD politiku zwjazkoweje kanclerki Angele Merkel (CDU) ćěkancam napřećo dotal podpěrała. Nutřkowny fachowc CDU Wolfgang Bosbach pokaza w tym zwisku na trěbnosć, něšto přećiwo přičinam ćěkanja činić. Martin Schulz bě hladajo na přiběracu ličbu ćěkancow, kotřiž so přez Srjedźne morjo do Europy dóstawaja, wo „wulce brizantnym połoženju“ rěčał.
Wurjadne posedźenje
Wot soboty maja w Choćebuzu zaso piwarnju. Ludźo mějachu ...
Duda: Weto přećiwo justicnej reformje
W Turkowskej sudźa nowinarjow
Žadaja sej spěšne wujasnjenje kartela dla
Berlin (dpa/SN). Po Zelenych žada sej nětko tež frakcija Lěwicy w zwjazkowym sejmje bórzomne wurjadne posedźenje wobchadneho wuběrka, zo móhli so wumjetowanja přećiwo němskim awtotwarcam móžneho kartela dla wujasnić. To rjekny Herbert Behrens, wobchadny fachowc frakcije a bywši nawoda přepytowanskeho wuběrka manipulowaneho wotpłuna dieselowych awtow dla, dźensa powěsćerni dpa. „Wobchadny minister dyrbi rozłožić, što chce w zwisku z dotal njesłyšanymi wumjetowanjemi přećiwo wodźacym němskim awtotwarcam činić“, Behrens iniciatiwu frakcije rozłoži. Z wotmołwy na naprašowanje w parlamenće je wón zhonił, zo běchu so zastupnicy ministerstwa wospjet ze zastupjerjemi koncernow zetkawali. „Chce Dobrindt kaž w padźe manipulacijow zaso twjerdźić, zo njeje ničo wědźał?“, so Behrens praša. Kónc tydźenja běchu sej hižo Zeleni wurjadne posedźenje gremija žadali. Wuběrk měł hišće do „narodneho dieseloweho foruma“ 2. awgusta wotpowědnje informowany być, rjekny wobchadny fachowc Zelenych Oliver Krischer.
To a tamne (24.07.17)
Wodowa trubka je w Bielefeldźe wulkozasadźenje policije zawiniła. Muž bě zastojnikam zdźělił, zo je runje dweju podhladneju z mašinskej třělbu typa Kalašnikow a kófrom do susodneho domu zastupić widźał. Policija na to z wulkej jednotku přijědźe a mužow w bydlenju překwapi: Jeju „mašinska třělba“ wukopa so jako wulka shisha. Rěčnik policije je zasadźenje hladajo na tuchwilne wěstotne połoženje přiwšěm zakitował.
Z ultralochkim lětadłom wokoło swěta: Šwicarski dyrdomdejnik Xavier Rosset poda so wčera na 400 dnjow trajacy lět. We wjacorych etapach chce wón 80 000 kilometrow zmištrować a 50 krajow wopytać. Hłownje chce kultury a ludźi zeznać a planet pod wšelakimi aspektami přeslědźić, kaž Rosset nowinarjam rjekny. Lětacy nastroj waži 240 kilogramow a je hač do 157 km/h spěšny.
Wulkopósłanc powołany?
Washington (dpa/SN). Bywši diplomat a telewizijny komentator Richard Grenell ma so po informacijach medijow z nowym wulkopósłancom USA w Němskej stać. Prezident Donald Trump je 50lětnemu zastojnstwo pječa minjeny tydźeń na zetkanju w Běłym domje poskićił, piše New York Times w swojim wčerawšim wudaću. Oficialnje wobkrućene pak to ze stron knježerstwa njeje. Grenell je jedyn z prěnich a najsylnišich podpěraćelow Trumpa we wonkownej politice.
Islamistiscy wohrožerjo strašni
Frankfurt n. M. (dpa/SN). Najwjetše wěstotne riziko w Němskej wuchadźa dale ze stron islamistiskich wohrožerjow. Wo tym je šef Zwjazkoweho kriminalneho zarjada Holger Münch přeswědčeny. 690 ludźi tuchwilu do tuteje kategorije zastopnjuja, piše Münch dźensa w Frankfurter Rundschau. Kónc lěta 2016 bě jich hišće 549, w měrcu hižo 616. Porno tomu je strach ze stron lěwicarskich a prawicarskich ekstremistow w Němskej „přewidny“. Wočakować wšak je, zo prawicarjo skerje teroristiske struktury wutworja, štož přiběraca ličba nadpadow na domy požadarjow azyla pokazuje.
Turistaj žiwjenje přisadźiłoj
