Wočakuja haćenja stawka dla
Lipsk (dpa/SN). Wužiwarjo železnicy w Sakskej, Saksko-Anhaltskej a Durinskej dyrbja so planowaneho stawka dźěłarnistwa lokomotiwnikow GdL dla na bolostne poćežowanja železniskeho wobchada nastajić. Za čas stawka wot 2 hodź. jutře rano hač do 18 hodź pjatk wječor dóńdźe „k masiwnym haćenjam měšćanskeho, regionalneho a dalokowobchada železnicy“, rěčnica železnicy wčera zdźěli.
W dalokowobchadźe pojědu ćahi po nuzowym a tuž chětro wobmjezowanym jězbnym planje. Za to zasadźuje železnica dlěše ćahi z wjace městnami. Pućowacych železnica prosy, so nic nuznje trěbnych jězbow wzdać abo jězbu přestorčić. Nimo toho móža wšitcy, kotřiž su sej za čas stawka hižo jězdźenku kupili, tiket pozdźišo wužiwać. Wjazba na cyle wěsty ćah je zběhnjena. Rezerwowanja městnow móža ludźo darmotnje storněrować. Tež dočasna jězba je móžna.
Dźěłarnistwo lokomotiwnikow GdL chce w pasažěrskim wobchadźe wot jutře hač do pjatka stawkować, runje w tydźenju, w kotrymž su dróhi protesta ratarjow dla hižo zatykane. Po stawku so wobchad hakle poněčim normalizuje.
To a tamne (09.01.24)
Do wrotow Běłeho domu zrazyło je wosobowe awto w stolicy USA Washingtonje. Policija je šofera zajała, zarjad za škit prezidenta zdźěli. Přičinu a „dokładne wobstejnosće zražki“ chcedźa nětko pruwować. Prezident Joe Biden njebě za čas podawka w Běłym domje. Policija je wšitke dróhi wokoło kompleksa zaraćiła. Informacije wo zranjenych njepředležachu.
Dźakowano šćipatej zymje su sobudźěłaćerjo Mišnjanskeho drustwa winicarjow minjenu nóc zmjerznjene lodowe wino žnjeć móhli. Na něhdźe 3 000 kwadratnych metrach su kiće družiny Cabernet Blanc při jědnaće stopnjach zmjerzka šćipali. Kitki mjez lubowarjemi požadaneho lodoweho wina trjebaja znajmjeńša sydom stopnjow zmjerzka, po móžnosći někotre dny. Nětko pak dyrbi wino najprjedy raz wjacore měsacy zrawić. Mišnjanske drustwo ma 1 500 čłonow.
Zetkanje noworěčnikow a dźak Janej Bartej
Budyšin (SN). Na zetkanje noworěčnikow přeprosyštaj 4. januara do Rěčneho centruma WITAJ dr. Beata Brězanowa a Julian Nyča jako nawoda rěčneho managementa w projekće ZARI, kotrehož nošer Domowina je.
W bjesadliwej atmosferje 15 wobdźělnikow měješe so prašenje reflektować, kotry wliw maja emocije w partnerskich poćahach na wužiwanje serbšćiny abo němčiny a kotre změny móža so w běhu časa při tym jewić. Zo stejitej tutej prašeni we wobšěrnym konteksće, wuswětli Beata Brězanowa na zakładźe přiběraceje ličby mjezynarodnych porowych poćahow, kiž so hustodosć samo na jendźelšćinu złožić dyrbja, dokelž jedyn kaž druhi maćeršćinu lubowaneho čłowjeka njerěči abo ani njezrozumi. Tak rěčitaj wobě cuzu rěč a přiswojenje partnerskeje rěče je wužadacy proces dojednanja na tu abo tamnu maćeršćinu abo samo wobě maćeršćinje partnerow.
Za wjetšu zhromadnosć
Vatikan (B/SN). Na kónclětnym dźaknym nyšporje w Pětrowej cyrkwi wobdźělichu so tež zjawne wosobiny cyrkwje a towaršnosće, mjez nimi Romski měšćanosta Roberto Gualtieri. Bamž Franciskus zwurazni, zo chcedźa cyrkwinske a ciwilne žiwjenje přichodnje w etiskej a spirituelnej zhromadnosći wjesć. Za to ma so Rom jako město nadźije za swojich wobydlerjow atraktiwniši stać.
Modlić so budźi nadźiju
Mnichow (B/SN). „Aktualne połoženje njeje w mnohich wobłukach rjane. Nadźija pak njewoznamjenja, zo woči před tym zawrějemy“, praji benediktinski mnich a wuspěšny awtor Anselm Grün Wječornikej Mnichow. Po jeho měnjenju trjeba nadźija wutrajne modlenje. Dale wón nastupajo strowotnistwo zwěsći, zo njejsu w času antiki lěkarjo chorych jenož hojili, ale wučachu tež wuměłstwo stroweho žiwjenja.
Swjata Marija dawa přikład
USA namołwjeja Israel
Tel Aviv (dpa/SN). USA widźa na Bliskim wuchodźe tuchwilu „wokomik wulkich napjatosćow“ a su Israel namołwjeli, wjace za škit ciwilistow w Gazaskim pasmje činić. Swětowa strowotniska organizacija WHO hižo dwaj tydźenjej spyta, pomocnu misiju za nuzu ćerpjacu ludnosć na sewjeru pasma zwoprawdźić. Mjeztym Israel ze swojimi nadpadami pokročuje. Dźensa je němska wonkowna ministerka Annalena Baerbock (Zeleni) do Jerusalema k politiskim rozmołwam dojěła.
Heil plany zakituje
Berlin (dpa/SN). Kritika na planach zwjazkoweho ministra za dźěło Hubertusa Heila (SPD) nastupajo přiwótřenje pola wobydlerskeho pjenjeza njewomjelknje. Heil wčera wječor w sćelaku ZDF potwjerdźi, zo nochcył wšitkim přijimowarjam pjenjeza wumjetować, zo su lěni. Wosebje samostejace žony z dźěćimi a chudźi trjebaja pomoc. Štóž pak wospjet dźěło wotpokazuje, byrnjež dźěłokmany był, njetrjeba hižo ze zrozumjenjom stata a wobydlerjow ličić, wón rjekny.
Wagenknecht předstaji stronu
Z pomocu transportnych helikopterow wójska spytaja zamołwići w ...
Ratarjo proša wo zrozumjenje
Berlin/Hannover (dpa/SN). Cyłoněmske protesty burow měli so po słowach prezidenta zwjazka ratarjow Němskeje Joachima Rukwieda měrnje a z demokratiskimi srědkami wotměć. Za cyłkownje wjace hač sto zarjadowanjow po wšěch zwjazkowych krajach prošeše Rukwied dźensa wo zrozumjenje. „Hdyž smy z traktorami po puću, dóńdźe awtomatisce k wobchadnym wobćežowanjam.“ Ratarjo nochcedźa „wulku podpěru a solidaritu“ we wulkich dźělach ludnosće zhubić, wón dźensa nowinarjam rjekny.
Ministerski prezident Delnjosakskeje Stephan Weil (SPD) je zwjazkowe knježerstwo namołwjał, planowane šmórnjenja subwencijow pola ratarjow wróćo wzać. Zwjazkowe knježerstwo měło zmužitosć měć, konflikt z ratarjemi skónčić.
Gaza a Ukraina podawkaj lěta
Wospjet ćežke nadpady na města
Kijew (dpa/SN). Po ćežkich ruskich powětrowych nadběhach na Ukrainu póndźelu rano rozprawjeja wjacore města a regiony kraja wo škodach a zranjenych. Tak bu na we wulkoměsće Saporiššja bydlenski dom wobškodźeny. Dohromady pjeć zatřělow registrowachu, kaž zdźěli regionalny wojerski zarjad. W měsće Nowomoskowsk maja dohromady 24 zranjenych, wot nich su pjeć dźěći, wozjewi sćelak Suspilne.
Z města Charkiw přizjewichu štyri zatřěle. Wosebje industrijne zawody su tam potrjechene, zdźěli měšćanosta Ihor Terechow. Na social media platformje Telegram pisaše wón wo jednej zranjenej. Wohnjowi wobornicy palace so twarjenja zhašechu. W městačku Smijiw w regionje Charkiw dyrbjachu wjacore ludźi z rozwalinow domskeho wuchować.
Ruske lětadła nadběhowachu w rańšich hodźinach třeći raz w běhu poslednich dnjow z wulkim kombinowanym nadběhom Ukrainu. Při tym wužiwachu nimo balistiskich raketow a dalšich tež truty, zdźěli wójsko Ukrainy.
impresum
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje a marketing:
Patricia Róblowa 577 273
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
