New York (dpa/SN). Hłowna zhromadźizna UNO žada sej z rezoluciju hnydomny humanitarny přiměr w Gazaskim pasmje. Wot Egyptowskeje předpołoženy dokument je wčera wječor trěbnu wjetšinu dweju třećinow hłosow dóstał. 153 krajow hłosowaše za njón, dźesaćo běchu přećiwo tomu. 23 krajow je so hłosa wzdało, mjez nimi tež Němska.

Rezolucija je Němsku před „ćežki rozsud“ stajiła, w zdźělence wonkowneho ministerstwa rěka. „Chcemy njeznjesliwe horjo ludźi skónčić – w Israelu a w Gazy.“ Rezolucija žada sej „pawšalny přiměr, zdobom pak njepraji, čehodla je Israel nuzowany, so zakitować: Dokelž je Hamas Israel 7. oktobra nadpadnyła a dokelž chce wona Israel přeco hišće zničić.“ Tohodla njeje Němska přihłosować móhła, ministerstwo zdźěla. Israel je rezo­luciju mjeztym raznje kritizował.

Prezident USA Joe Biden je Israel ­wčera w njewšědnje jasnej formje namołwjał, wojowanja w Gazaskim pasmje na dobro ciwilneje ludnosće skónčić a dotalny kurs namocy wopušćić.

Pólska ma zaso nowe knježerstwo – a Stanisław Tilich měješe prawje. Tehdomniši ministerski prezident Sakskeje warnowaše němsku politiku hladajo na nowe knježerstwo pod režiju strony PiS, kaž „wyši wučer“ napřećo pólskemu ludej wustupować. Pod hesłom „Naše zrozumjenje demokratije njeje to jeničke wěrne“ běchu medije tute wot mainstreama wotchilace stejišćo serbskeho knježerstwoweho šefa Sakskeje wozjewili, kiž jasne praješe: Wězo sadźi nowe pólske knježerstwo nowe akcenty, ale čłonstwo Pólskeje w EU a ­NATO njebudu do prašenja stajeć. A tak to běše. Nětko su Polacy nowe knježerstwo ze zaso hinašimi politiskimi akcentami wolili. Normalna demokratija. A zo reprezentant stareho knježerstwa naslědnika noweje wjetšiny „němskeho agenta“ mjenuje, słuša w demokratiji do dowoleneje polemiki. Za styki w namjeznych kónčinach wolóža nowe knježerstwo kooperaciju. A tež to je w zmysle Tilicha, přeswědčeneho Europjana. Marcel Brauman

Pirna (dpa/SN). Wjele spadkow w lěću dla njebě w Sakskej telko lěsnych wohenjow kaž lěto do toho. Po tuchwilu předležacej bilancy statneho zawoda Sakski lěs je so dotal 102 razaj w lěsach paliłoj. Loni registrowaše zawod cyłkownje 215 wohenjow. Tež přestrjenje, kotrež běchu lětsa potrjechene, su wo wjele mjeńše hač w lěće 2022. Tak je to lětsa 125 hektarow, loni bě tomu 784 hektarow. Statistika njeje hišće dospołna, dokelž móža zarjady za lěsnistwo hišće do kónca lěta wohenje přizjewić.

Strach lěsnych wohenjow je stajnje chětro wulki, jelizo je dlěje sucho. Lětsa bě tomu w meji a septembrje tak. W lěćnych měsacach pak je so časćišo dešćowało, štož je strach lěsnych wohenjow pomjeńšiło. Ličba tuchwilu přizjewjenych wohenjow wotpowěduje niwowej dołhodobneho přerězka z něhdźe sto wohenjemi.

Po słowach rěčnika Sakskeho lěsa Renke Coordesa je najčasćišo čłowjek wohenje zawinował. Nimale dwě třećinje přizjewjenych padow nastaštaj w zwisku z njezamołwitym zadźerženjom. K tomu słušeja kurjenje, lěhwowe wohenje abo grilowanje w lěsu. Kóždy dźesaty woheń pak je wotpohladnje něchtó zamiškrił.

We wuskej hasce tčacy wostał je šofer ze swojim wulkim nakładnym awtom we wsy w Porynsko-Pfalcy. Nawigaciski nastroj bě jeho do dróhi wodźił, kotraž so za wulke awta scyła njehodźeše. Najebać wołanje a kiwanje wobydlerjow 61lětny dale jědźeše. Při tym wobškodźi třěchi a fasady twarjenjow a wottorha płoty a dešćikowe roły. We wuskej křiwicy bě jězba ke kóncej. Policija trochuje škodu na 45 000 eurow. Přećiwo šoferej přepytuja.

Ze železnej žerdźu je muž na hłownym dwórnišću w Bremenje informaciski centrum železnicy wobškodźił. 63lětny rozbiwaše z dźesać kilogramow ćežkim retlom škleńcy a wobškodźi jězdźenkowej awtomataj. Nichtó so njezrani. Na ludźi so roznjemdrjeny njeměrješe. Pućowacy móžachu mužej žerdź wutorhnyć a jeho zadźeržeć, doniž policija njepřijědźe. Motiw skućićela hišće njeznaja.