To a tamne (29.11.23)
Narodny hodowny štom powalił je wichor w stolicy USA Washingtonje. Na wobrazach bě wčera wječor hoberski ležacy štom widźeć, někotre lampički so hišće swěćachu. Kran běchu hižo nastajili. Dwanaće metrow wysoki štom steji bjezposrědnje při Běłym domje. Prezident Joe Biden chce swěčki na štomje jutře zhromadnje ze swojej mandźelskej Jill symbolisce zaswěćić a tak dohodownu sezonu oficialnje zahajić. We Washingtonje so tuchwilu mócnje wichori.
Dinosawrier je wotnětka nowy oficialny symbol awstralskeho zwjazkoweho stata Queensland. Muttaburrasaurus, kiž bě před sto milionami lětami w Awstralskej žiwy, je tak prěni fosilny emblem kraja. Tuchwilu su to koala, Great Barrier Reef a orchideja Cooktown. Z nowym symbolom chcedźa turizm wožiwić, kiž měri so přiběrajcy na fosilne namakanki w kraju.
Klětuše srědki za załožbu njeskrótšić
Njedawny wusud Zwjazkoweho wustawoweho sudnistwa w Karlsruhe, kotryž je amplowej koaliciji deficit 60 miliardow eurow nabrěmjenił, je zdobom wčerawše posedźenje Parlamentariskeje přirady Załožby za serbski lud wobwliwował. Što budźe z pjenjezami za Załožbu za serbski lud z dotalneho naćiska etatoweho zakonja za 2024?
Dalši stawk na Mikławša
Lipsk (dpa/SN). Dźěłarnistwa wukonjeja w tarifowym rozestajenju w zjawnej słužbje dale ćišć. Po tym zo bě dźěłarnistwo GEW dźensa do „stawkoweho dnja za kubłanje“ namołwjało, přihotuje zwjazk zastojnikow dbb w Zwjazku wučerjow Sakskeje přichodny cyłokrajny warnowanski stawk na swjateho Mikławša. Před financnym ministerstwom w Drježdźanach planuja protestne zarjadowanje jako „zakónčacy wjeršk dźěłoweho boja“ do tarifowych jednanjow 7. decembra.
AfD za mjenje pomocy Ukrainje
Mainz (dpa/SN). AfD w zwjazkowym sejmje chce borzdźidło zadołženja dodźeržeć a etatowu krizu rozrisać, mjez druhim ze zniženej pomocu na dobro Ukrainy. Wažny dypk wudawkow, kotrež měli so redukować, su „njesměrne kóšty brónjenja w kónčinach, kotrež nas ničo njestaraja“, rjekny Peter Boehringer, etatowy rěčnik frakcije AfD w zwjazkowym sejmje dźensa rano w ZDF. Při tym dźe tež wo srědki za nowonatwar Ukrainy.
NATO hněwna na Turkowsku
Prěnje dohodowne wiki Němskeje w tutym lěće su wčera w ...
Dalši zastajency w Gazy pušćeni
Tel Aviv (dpa/SN). Po podlěšenju přiměra w Gazaskej wójnje wo dalšej dnjej nadźijeja so dale na to, přichodnych zastajencow wuswobodźić móc. Wčera wječor běštej so Israel a Hamas na to dojednałoj, na štyri dny wobmjezowany přiměr hač do štwórtka ranja podlěšić. Na to bě Hamas dalšich jědnaće zastajencow pušćiła, mjez nimi dweju Němcow. Israel je runočasnje 33 Palestinjanow ze swojich jastwow pušćił. Minjenu nóc su israelskemu knježerstwu dalšu lisćinu z mjenami zastajencow přepodali, kotrychž chcychu dźensa pušćić. Medije rozprawjeja, zo jedna so wo dźesać wosobow.
Wot minjeneho pjatka je Hamas 69 zastajencow pušćiła. Z israelskich jastwow su 150 palestinskich politiskich jatych pušćili. Najmłódši z nich bě 14 lět. W jastwje sedźachu namócnosćow přećiwo Israelej a jeho wobydlerjam dla.
Zymske njewjedro na juhu Ukrainy
Scholz za modernizowanje kraja
Berlin (dpa/SN). Zwjazkowy kancler Olaf Scholz (SPD) chce najebać deficit wjacorych miliardow eurow w etaće kraja kurs modernizowanja Němskeje wobchować. By „ćežki a njewodajomny zmylk był, při zmištrowanju wulkich wužadanjow modernizowanje kraja zanjechać“, rjekny Scholz dźensa w swojej knježerstwowej deklaraciji w zwjazkowym sejmje. „Modernizowanje je trěbne a prawe, dokelž twori wuměnjenja za dobre dźěłowe městna a sylne hospodarstwo a je tak zakład přichodneho derjeměća.“
Zwjazkowe wustawowe sudnistwo bě přerjadowanje 60 miliardow eurow srědkow za koronakrizu na dobro klimowych projektow w etaće wotpokazało. Nětko wo tym debatuja, kak móhli pobrachowace srědki wurunać.
Scholz dale na tym wobstawa, Němsku dale wuwiwać. „Chcu, zo je Němska cyle prědku“, wón hladajo na hoberske inwesticije w USA a Chinje rjekny.
Nawoda opozicije Friedrich Merz (CDU) narěč Scholza šwikaše: „Wy njejednaće kaž politikar, ale kaž zamkar.“
Krajny rada: Wostańće doma!
Nawal zymy w mnohich kónčinach Němskeje wulke problemy zawinił
Offenbach/Berlin (dpa/SN). Nawal zymy je nadróžny wobchad we wjacorych zwjazkowych krajach raznje trjechił a tójšto wobchadnych njezbožow zawinował. Při tym zemrěštej znajmjeńša dwě wosobje. We wokrjesu Schwäbisch-Hall w Badensko-Württembergskej je 71lětny wčera wječor při frontalnej zražce na zasněženej hładkej dróze žiwjenje přisadźił. 54lětna šoferka wosoboweho awta zemrě w Porynsko-Pfalcy při zražce na zalodźenej dróze. W mnohich dźělach Němskeje wočakowachu dźensa dalši sněh.
W Hessenskej bě połoženje wosebje napjate. Tam dyrbješe wohnjowa wobora něhdźe sto ludźi z awtow wuswobodźić, kotřiž běchu powalenych štomow dla w swojich jězdźidłach zawrjeni. Jich dowjezechu najprjedy raz do hale.
Krajny rada wokrjesa Rheingau-Taunus, Sandro Zehner (CDU) ludźi namołwješe, doma wostać. „Mój naležny apel: Wostańće wutoru na kóždy pad doma. Prošu njewuchodźujće so w lěsu. Tam wobsteji chutny smjertny strach, dokelž móhli so hałzy mokreho sněha dla wotłamać abo štomy so powalić.“
To a tamne (28.11.23)
Zabyta pistola na nuzniku tankownje je w Stralsundźe zasadźenje policije a wosebiteje antiteroroweje jednotki zawiniła. Stražnik bě rewolwer z pjeć patronami na nuzniku zabył. Jako so na to dohlada, bě pistola preč. Krótko po nim bě dalši muž na nuzniku był a pistolu sobu wzał. Policija pak muža po wobšěrnym přepytowanju wuslědźi a toho bydlenje přepytowaše. Při tym rewolwer namakachu. Dwě kulce pak pobrachowaštej: Muž bě je na brjoze morja do powětra třělił.
98 hodownych štomow z wjace hač 142 000 lampičkami – to je lětuša hodowna dekoracija Běłeho domu. Jill Biden, mandźelska prezidenta USA, je pychu knježerstwoweje centrale we Washingtonje wčera předstajiła. Něhdźe 300 dobrowólnych pomocnikow je minjene dny wšitko spřihotowało a 34 000 hodownych kulow powěsnyło.
Tradicionalny adwentny wěnc
Regensburg (B/SN). Na adwentnym wěncu su po starej tradiciji tři fijałkojte a jedna róžojta swěčka. Fijałkojte swěčki woznamjenjeja rozmyslowanje a pokućenje, róžojta swěčka za třeći adwent pokazuje předwjeselo na bližace so hody. Tež měšnik třeću njedźelu adwenta w róžojtym abo swětłofijałkojtym ryzwje kemše swjeći. Kulojty wěnc symbolizuje ze zrowastanjenjom wěčne žiwjenje, zelenosć hałužkow same žiwjenje a swěčki přiběrace swětło hač do hód.
Adwentne wiki
Bonn (B/SN). Loni měješe adwentny čas 28 dnjow, lětsa jenož 22. Datum hód je kruty, jenož dźeń so měnja. Cyrkej předpisuje, zo ma adwentny čas štyri njedźele wopřijeć. Adwentne wiki nastachu spočatnje w protestantiskich městach. W katolskich kónčinach bě adwent zdobom póstny čas.
Nowy nawoda
