Tel Aviv/Gaza (dpa/SN). Israelscy wojacy wojuja nětko tež na juhu Gazaskeho pasma. Při wšěm njeje wojerske zasadźenje na sewjeru hišće wotzamknjene. „Njejsmy na sewjeru hišće dospołnje wojersce dobyli, smy pak na dobrym puću“, zdźěli rěčnik wójska Jonathan Conricus nowinarjam. Bě wot wšeho spočatka jasne, zo njebudźe bój přećiwo Hamas lochki a zo trjeba Israel za to wjele časa, wón rjekny. Wumjetowanja pomocnych organizacijow, zo njeskići israelska armeja ciwilistam dosć chwile, sej před wojowanjemi wućeknyć, rěčnik wotpokaza. Israel čini wšitko, zo by ciwilnu ludnosć škitał. Wina je po jeho słowach Hamas, kotraž znjewužiwa ciwilistow cyle wědomje jako žiwe škitne tarče. Rěčnik pomocneho skutka na dobro dźěći Unicef, James Elder, bě israelske nadpady do toho raznje kritizował. Na juhu Gazaskeho pasma wotměwa so „krejpřeliwanje“. Powěsće wo tak mjenowanych „wěstych pasmach“ w Gazy mjenowaše Elder „wopačne“. Nastork wójny bě masaker Hamas na israelskej ciwilnje ludnosći 7. oktobra.

Amplowa koalicija wuradźuje – socialne zwjazki warnuja před skrótšenjemi

Berlin (dpa/SN). Amplowa koalicija SPD, Zelenych a FDP wojuje dale wo etat 2024. Wicekancler Robert Habeck (Zeleni) je z teje přičiny swoju dźensa plowanu jězbu na swětowu klimowu konferencu do Dubaja a do bliskeje regiony wotprajił, ministerstwo zdźěla. Generalny sekretar SPD Kevin Kühnert rjekny we wusyłanju ZDF „Berlin direkt“: „Čłonojo knježerstwa wužiwaja kóždu swobodnu mjeńšinu, zo bychu naćisk etata 2024 wotpowědujo směrnicam zwjazkoweho wustawoweho sudnistwa zestajeli.“

Habeck widźi dobre wuwiće při wobćežnych jednanjach w koaliciji. „Sym jara optimistiski, zo smy na dobrym puću k dojednanju“, rjekny wón sobotu wječor w sćelaku ARD. Při wšěm njemóže Habeck za wšěch čłonow knježerstwa rěčeć.

Najwjetše wohroženje wjelka je po měnjenju akciskeje skupiny „wjelk“ hajnikow w Sakskej přehnaty status škita rubježneho zwěrjeća. Dokelž to akceptancu w ludnosći dołhodobnje podrywa. Štož zwjazkowa politika a krajni ministrojo za wobswětoškit nětko poskićuja, su zastupjerjo wowčerjow hižo do toho jako njepraktikabelne kritizowali (Serbske Nowiny su rozprawjeli). Pod jara kruće definowanymi wuměnjenjemi směš wjelka tam třělić, hdźež je wjelk wowcy zakusał. Regulowanje cyłkowneho wobstatka wjelkow w regionje wostanje tabu. To je w Sakskej zamołwity minister Wolfram Günther (Zeleni) hišće raz zwuraznił. Najebać to je aktualny rozsud signal knježacych politikarjow, zo na wobmyslenje ludnosće reaguja, kotraž ma „kulturnu krajinu“ za wohroženu – wot wjelka. Mamy dołhodobnje z wjelkom žiwi być, tež wón słuša do Łužicy. „Management“ wobchadźenja z wjelkami pak ma so z dotalnej ideologiju rozžohnować. Marcel Brauman

Kamjenc (SN). Štóž dóstanje jako ćěkanc škit w Němskej, měł tež něšto za našu towaršnosć zdokonjeć. Z tutym wopodstatnjenjom sej žada Kamjenski wyši měšćanosta a předsyda swobodnych wolerjow w Budyskim wokrjesu Roland Dantz „winowatosć dźěła“ za migrantow, na přikład jako pomocnik při hladanju starych ludźi. Štóž na dźěłowych wikach job njenamaka, njech w „zjawnym sektoru“ dźěła. Migranća, kotřiž to wotpokazuja, maja – tak Dantz w interviewje z „Wochenkurier“ – Němsku zaso wopušćić.

Rozsud něhdyšeje politikarki Lěwicy, Sahry Wagenknecht, klětu swójsku stronu załožić, hódnoći Dantz jako „wažny signal politiskej kulturje w našim kraju“. Wón ma Wagenknecht za „wobdarjenu politikarku, módru hłójčku, kotraž analytisce mysli.“ Dale Dantz, kiž je mjeztym znaty za zwadne zjawne wuprajenja, „ideologisce proklamowanu energijowu změnu“ kritizuje. Wón sej „nowy politiski diskurs“ přeje, tež „wo prašenjach měra a wójny“. Zdobom chwali ministerskeho prezidenta Michaela Kretschmera (CDU), kiž ma wuski kontakt z ludźimi a je politisce w realiće zakótwjeny.