Pady wobšudnistwa přiběraja
Policija warnuje nětko wobydlerjow z kampanju před jebanstwom
Poprawom je policija za to znata, zo wjele prašenjow staja, dokelž za informacijemi pyta. Tola na „Dnju policije“ njedawno w Zhorjelcu mějachu wobydlerjo składnosć, so zastojnikow woprašować.
Zahajił bě informatiwne zarjadowanje orchester policije hromadźe z moderatoromaj Romanom Knoblauchom wot radija Lausitz a policajskim hłownym komisarom Thomasom Knaupom. Tež sakski minister za nutřkowne naležnosće Armin Šuster (CDU), kaž tež sakski policajski prezident Jörg Kubiessa, prorektor Wysokeje šule sakskeje policije Hanjo Protze a nawoda staba Zhorjelskeje policajskeje direkcije Mirko Göhler běchu přitomni.
Na ležownosći bywšeje Zhorjelskeje wagonownje informowaše so něhdźe 7 000 wopytowarjow mjez druhim wo dźěle wobchadneje policije, słužbneje psyčeje stafle, jěcharskeje stafle policije, kolesoweje stafle zwjazkoweje policije, hotowostneje policije a kriminalneje policije.
Francoska organizuje pomoc
Paris (dpa/SN). Francoska je dźensa mjezynarodnu pomocnu konferencu přewjedła, zo by humanitarnu pomoc na dobro ciwilneje ludnosće w Gazaskim pasmje organizowała. Na zetkanju ze zastupnikami wjacorych krajow a pomocnych organizacijow dźěše po informacijach Elyséejoweho palasta wo dodźerženje mjezynarodneho prawa w pobrjóžnym pasmje a wo lěpši přistup wobydlerjow k žiwidłam, wodźe a lěkam.
Kijew hotuje so na přistup k EU
Kijew (dpa/SN). Po doporučenju komisije EU nastupajo zahajenje jednanjow wo přiwzaću Ukrainy do EU je prezident Wolodymyr Zelenskyj dekret podpisał, kotryž ma proces přihotować. Knježerstwo ma wotnětka pruwować, kak móhło zakonje Ukrainy předpisam EU zbližić. Doporučenje EU je na wuměnjenja wjazane. Do prěnjeho koła jednanjow měła Ukraina zahajene reformy wotzamknyć.
Linnemann za nowe rozmołwy
Z wjacorymi akcijemi – tule na dworje Mikławskeje cyrkwje – su w ...
Pogromy nacijow wopominali
Rěča wo dźěćacym zawěsćenju
50 000 ludźi do juha Gazy ćeknyło
Tel Aviv/Gaza (dpa/SN). Hladajo na razne wojowanja mjez islamistiskej Hamas na sewjeru Gazaskeho pasma chce israelske wójsko ciwilistam dale zmóžnić, do juha dospołnje zawrjeneho Gazaskeho pasma ćeknyć. „Humanitarny koridor do juha wostanje dale wotewrjeny“, zdźěli rěčnik wójska Daniel Hagari wčera. Připowědź měješe tež dźensa płaćić. Po trochowanju armeje je wčera něhdźe 50 000 ludźi koridor ewakuowanja wužiwało.
Mjeztym přiběra strach před móžnym rozšěrjenjom Gazaskeje wójny na cyły region. Jako reakciju na najnowše nadběhi Iranej přichilenych milicow su wojerske lětadła USA objekty na wuchodźe Syriskeje bombardowali. Při tym su pječa składy bróni zničili, kotrež milicy wužiwaja. Hižo kónc oktobra běchu USA wjacore objekty w Syriskej nadběhowali.
Ličba morjenych sobudźěłaćerjow UNO w Gazaskej wójnje je na 92 rozrostła. W žanym druhim konflikće na swěće njeje UNO w běhu jednoho měsaca telko smjertnych woporow měła kaž w Gazy, zdźěli pomocny skutk UNRWA.
Južny Tirol před njewěstosću
Wólby krajneho sejma dotalne politiske struktury zasadnje změnili
Bozen (HS/SN). Južnotirolska ludowa strona (SVP), zastupnica němsce rěčacych wobydlerjow najsewjernišeho regiona Italskeje, je při wólbach krajneho sejma 22. oktobra wulke straty poćerpjeła a je na historisce niski staw spadnyła: Wólbny wuslědk 34,5 procentow je zdobom minus 7,4 procenty. SVP změje jenož hišće 13 z cyłkownje 35 zapósłancow w krajnym sejmje a je prěni króć po lěće 1948 na wjace hač jednoho koaliciskeho partnera pokazana. Wutworić nowe knježerstwo njebudźe tuž lochko. Před 15 lětami měješe SVP hišće 48 procentow wšěch hłosow a tak absolutnu wjetšinu mandatow. Dokelž njeje žana z druhich stron wjace hač štyri mandaty zdobyła, trjebaja tam snano hač do pjeć stron, zo móhli nowe krajne knježerstwo wutworić.
To a tamne (09.11.23)
Pčołki jako škitarjow mjezy zasadźeć chce wójsko w Indiskej. Po tutym puću chcedźa ludźi wottrašeć, kotřiž so ilegalnje z Bangladesha zadobywaja, zo bychu zwěrjata a twory pašowali. Při tym pašowarjo stajnje zaso groćany płót rozrězaja, kotryž wobaj krajej dźěli. Kołće při płoće móhli k tomu wjesć, zo maja pčołki pašowarjow za njepřećelow a zo jich wotpowědnje nadběhuja.
Z wjace hač tysac policistami a runje telko priwatnymi wěstotnymi mocami hotuja so w Kölnje na nawal ludźi zajutřišim, 11.11. Dokelž je to runje sobota, liča tam z masowym zarjadowanjom. Hižo loni bě ličba swjećacych nimoměry rozrostła. Ćežišćo wočakuja lětsa w studentskej štwórći „Kwartier Latäng“ z wjele korčmami a barami. Tam liča zaso z wulkej tołkańcu a wulkim mjerzanjom: Čilać na kromje dróhi płaći 200 eurow.
W sejmje wopory wopominali
Drježdźany (dpa/SN). Z mjeńšinu mjelčenja je Sakski krajny sejm dźensa wopory nadpada Hamas na Israel 7. oktobra wopominał. „Nihdy po holocausće njejsu wjace telko Židowkow a Židow samsny dźeń morili, kaž tutón dźeń. Zasudźujemy terorowy nadpad Hamas najraznišo“, rjekny prezident krajneho sejma Matthias Rößler (CDU) při zahajenju plenuma. Swobodny stat steji „njepowalnje poboku Israela a židowskeho ludu“.
Wo migraciji wuradźowali
Berlin (dpa/SN). Zwjazkowy sejm je dźensa wo wobmjezowanju njeregularneje migracije do Němskeje wuradźował. Frakcija CDU/CSU bě k tomu wo aktualnu hodźinu prosyła. Wona žada sej razne naprawy, zo bychu ličby migracije zaso widźomnje woteběrali. Unija namjetuje, lisćinu tak mjenowanych wěstych krajow rozšěrić, přićah swójbnych ćěkancow wobmjezować a wjacorym próstwam jednotliwych migrantow wo azyl zadźěwać.
Frakcija Lěwicy so rozpušći
Deklaraciju za přiměr w Gazy
Tokio (dpa/SN). Skupina G7 je sej na swojim wuradźowanju w Tokiju humanitarny přiměr we wójnje mjez Israelom a Hamas w Gazaskim pasmje žadała. Wonkowni ministrojo chcychu w běhu dnja wotpowědnu zhromadnu deklaraciju wozjewić. Z přetorhnjenjom wojowanjow chcedźa humanitarnu pomoc za nuzu ćerpjacu ciwilnu ludnosć w Gazaskim pasmje zmóžnić. Israelski ministerski prezident Benjamin Netanjahu dlěši přiměr tuchwilu wotpokazuje. Wón žada sej jako wuměnjenje wot Hamas, pušćić wšitkich zawlečenych zastajencow.
Mjeztym su israelscy wojacy we wobłuku swojeje pozemskeje ofensiwy centrum Gazy docpěli, wukonjujo tam „wulki ćišć“ na Hamas. Po informacijach Hamas je w Gazaskim pasmje mjeztym wjace hač 10 000 ciwilistow žiwjenje přisadźiło. Njeličomni buchu zranjeni.
