Rallye oldtimerow je tele dny w Sakskej po puću. Za 20. wudaće je so ...
Komuny maja plany nadźěłać
Berlin (dpa/SN). Wšitke komuny Němskej maja w běhu přichodnych lět plany za klimje přichilene tepjenja předpołožić. W tutych maja podać, w kotrych dróhach je zastaranje přez dalnoćopłotu planowane, hdźe budźe ćopłota na přikład přez biomasu k dispoziciji stać abo hdźe móhła so wodźikowa syć natwarić. Wobsedźerjow ležownosćow chcedźa tak informować, hač dyrbja so sami wo ćopłotnu klumpu abo wo dalše klimje přichilene tepjenja starać. Wotpowědny naćisk zakonja je zwjazkowy kabinet zawčerawšim wobzamknył.
Zwjazkowa ministerka za twarstwo Klara Geywitz (SPD) wuswětli, zo je to wažne, wšako ma Němska zaměr klimoweje neutrality. Za produkciju ćopłoty so tuchwilu přewjele wuhlikoweho dioksyda wustorkuje. W Němskej wužiwaja wšako hišće mnoho fosilnych maćiznow za tepjenje. „Wažne je, zo smy nětko wuměnjenja přihotowali, tak zo móža komuny přepytować, kelko maja na městnje potenciala.“
Dołhodobnje pjenjezy zaplanować
Berlin (dpa/SN). Wot chudoby potrjechene dźěći maja wjetši riziko, ćeže ze strowotu dóstać abo dźěło njekmane być hač dźěći z ekumenisce sylnych swójbow. Tole zdźěli dźensa Němski institut ta hospodarske slědźenje, kotrež je w nadawku diakonije přepytowanje přewjedło. Dołhodobnje su za wojowanje přećiwo chudobje dźěći wyše zjawne wudawki trěbne, wšako dyrbi so strowotniske a socialne zastaranje potrjechenych zapłaćić.
„W diskusijach njeměli tuž krótkodobnje za rozrisanjemi pytać, ale dołhodobnje pjenjezy w zwjazkowym etaće předwidźeć“, wuzběhny prezident diakonije Ulrich Lilie dźensa na prezentaciji posudka instituta. Strowe a derje zastarane dźěći maja lěpše šansy na samostatne žiwjenje a wyšu mzdu, tak zo njejsu wot stata wotwisni. Zakładne zawěsćenje dźěći, tak kaž ma je ministerka za swójby Lisa Paus (Zeleni) předwidźane, móže pomhać.
Serbske Nowiny wudawaja so w Domowina-Verlag GmbH Ludowym nakładnistwje Domowina
Jednaćel: Syman Pětr Cyž
Ludowe nakładnistwo Domowina tzwr spěchuje Załožba za serbski lud, kotraž dóstawa lětne přiražki z dawkowych srědkow na zakładźe hospodarskich planow, wobzamknjenych wot Němskeho zwjazkoweho sejma, Krajneho sejma Braniborskeje a Sakskeho krajneho sejma.
Šefredaktor a zamołwity redaktor w zmysle
nowinarskeho zakonja: Marcel Brauman 577 232/233 Naměstnik šefredaktora: Axel Arlt 577 238
tel.: 03591 / 577 232 faks: 03591 / 577 202 e-mail: www.serbske-nowiny.de
Adresa redakcije a nakładnistwa: Sukelnska 27, 02625 Budyšin
Adresse der Redaktion und des Verlages: Tuchmacherstraße 27, 02625 Bautzen
Zamołwita za rozšěrjenje: n. n. 577 262
Předań nawěškow: Janka Rögnerowa 577 220 e-mail:
Ćišć: DVH Weiss-Druck GmbH & Co. KG, Lejnjanska 14, 02979 Halštrowska Hola, wjesny dźěl Hory
Vertriebskennzeichen: 2 B 2560 B
To a tamne (18.08.23)
Pozdatny had je žona na třěše w sewjerorynsko-westfalskim Neussu wuhladała a nuzowe čisło zazwoniła. Policisća a wohnjowi wobornicy hnydom na městno přichwatachu a tež fachowcy za wulke hady běchu wo padźe informowani, policija wčera zdźěli. Jako sej eksperća hada wobhladachu, so wukopa, zo njejednaše so wo zwěrjo, ale twarsku maćiznu.
Swójba z Badensko-Württembergskeje je wčera ze swojim wupožčenym katamaranom na Müritz znjezbožiła. Tak su pytnyli, zo woda do čołma běži a tuž telefonisce wo pomoc prošachu. Mjeztym zo je wodoškitna policija startowała, je wobsadka dalšeho čołma nimale powróćeny čołm wuhladała a swójbu wuchowała. Katamaran pak su z powjazami zawěsćili, tak zo njemóžeše so podnurić. Na zbožo so při njezbožu nichtó njezrani.
Budget Sakskeje skoro wučerpany
Berlin/Halle (dpa/SN). Zwjazk je za změnu strukturow w brunicowych krajach dotal naprawy z cyłkownej sumu nimale 20 miliardow eurow wobzamknył. Mjez nimi su inwesticije do slědźenskich a wuwićowych předewzaćow kaž tež mnohe naprawy wobchadneje infrastruktury, kaž na přikład wutwar a elektrifikacija železniskeje čary wot Lubnjowa do Zhorjelca. Wo tym je zwjazkowe hospodarske ministerstwo wčera w Berlinje informowało. Zwjazkowy kabinet bě wčera prěnju rozprawu k ewaluaciji tak mjenowaneho inwesticiskeho zakonja wuhlowe regiony schwalił.
Jako wurunanje za kónc brunicy wot Zwjazka za cyły kraj přewostajene srědki buchu dotal jenož w snadnym rozměru wotwołane. We Łužiskim (136,3 procenty) kaž tež w Srjedźoněmskim rewěrje (163,9 procentow) pak je cyłkowny budget krajow za prěnju periodu spěchowanja mjez 2020 a 2026 hižo nadbytknje podpisowany, wuchadźa z wčera wozjewjeneho posudka Leibnizoweho instituta za hospodarske slědźenje w Halle a Essenje. Kaž pisaja, je budget za Saksku ze 96,3 procentami nimale wučerpany.
Ćeže při tworjenju knježerstwa
Madrid (dpa/SN). Tři a poł tydźenja po zažnych wólbach w Španiskej zeńdu so dźensa prěnjotnje wobě komorje parlamenta ke konstituowacej zhromadźiznje. Tworjenje noweho knježerstwa móhło pak ćežka naležnosć być. Ani dotalnemu šefej knježerstwa Pedrej Sánchezej, ani wjednikej opozicije Albertej Núñez Feijóo njeje so poradźiło přez koalicije z mjeńšimi stronami wjetšinu hłosow zhromadźić.
Prěnja němska łódź wotjěła
Odessa (dpa/SN). Wjacore hodźiny po tym zo bě němska nakładna lódź „Joseph Schulte“ z přistawa w Odessy wotjěła, je wona nětko ukrainske dźěle Čorneho morja překročiła. „Móžu wopodstatnić, zo je łódź ukrainske wody wopušćiła“, zdźěli rěčnica łódźernje Bernard Schulte w Hamburgu. Wot spočatka wójny hižo njebě za nakładnu łódź móžno přistaw wopušćić, nětko wužiwa wona temporerny koridor po Čornym morju hač na Bosporus.
Jednanje pječa w měrcu
