Zastupnicy hospodarstwa zhladuja z wulkimi starosćemi do přichoda

Berlin (dpa/SN). Wodźace zwjazki němskeho hospodarstwa zhladuja z wulkimi starosćemi na połoženje konjunktury. Prezident zwjazka němskeje industrije Siegfried Russwurm rjekny powěsćerni dpa: „Němska kroči po dróze přěhračkow, wosebje w mjezynarodnym přirunanju.“ Prezident zwjazka dźěłodawarjow Rainer Dulger rjekny dpa: „Chcemy-li jedyn z wodźacych industrijnych ­krajow wostać, dyrbimy na mnohich blakach tójšto změnić.“ Prezident Centralneho zwjazka rjemjesła Němskeje Jörg Dittrich rjekny: „Dyrbimy nuznje jednać, zo njebychmy so sami do hłubokeje krizy storhnyli.“

Wězo je jara rjenje, zo je Turistiske towarstwo Budyšin na naprašowanje našeho wječornika hnydom reagowało a nětko dwurěčne logo za jědźne lisćiki w ramiku lětušich tydźenjow Budyskeho žonopa zhotowiło. Najebać to so prašam, kelko lětstotkow mamy hišće dočakać, doniž dwurěčnosć w „stolicy Serbow“ samozrozumliwosć njebudźe – a potom prošu jara přeco w samsnej wulkosći kaž němčina? Derje, zo mjeztym samo wyši měšćanosta Karsten Vogt w oficialnym zešiwku z titulom „Wir sind zweisprachig! Smy dwurěčni!“ wobchodnikam dwurěčne němsko-serbske popisanje poruča – scomter konkretnymi pokiwami za zeserbšćenje ­wšědnych wobrotow, postrowow, wo­te­wrjenskich časow atd. Přiwšěm bych sej tež na přikład na teritoriju zarjadniskeho zwjazka Při Klóšterskej wodźe, hdźež stej dwě třećinje ludnosće serbskej, konsekwentne dwurěčne wuhotowanje wobchodow přał. Snadź tule ze serbšćinu na prěnim městnje. Marcel Brauman

Z wysokodomu do smjerće padnył je w socialnych medijach derje znaty francoski krosnowar Remi Lucidi w Hongkongu. 30lětny ekstremny sportowc je tež znaty pod mjenom „Remi Enigma“, hdyž w interneće wideja zwažliwych krosnowarskich předewzaćow wozjewja. Ćěło muža běchu minjeny štwórtk před wysokodomom namakali. Pječa bě Lucidi spytał po fasadźe domu na třěchu twarjenja zalězć. Naposledk žiweho běchu jeho wuhladali, jako we 68. poschodźe wo wokno kłapaše. Krosnowar bě wot Dubaja hač do San Franciska aktiwny.

Dešćikojteho wjedra dla proša zarjadowarjo lětušeho heavy-metaloweho festiwala w schlesigsko-holsteinskim Wackenje wopytowarjow wo sćerpnosć. Wčera dyrbjachu stanowanišćo nachwilnje za­wrěć, dokelž bě płonina dešća dla chětro rozmokana. „Dešćik mějachmy na festiwalach hižo časćišo, tola telko kaž lětsa jenož zrědka“, organizatorojo pisachu. W běhu dnja chcychu wo dalšim postupowanju rozsudźić. Festiwal z wjace hač 80 000 wobdźělnikami zahaja jutře.

Dinklage (B/SN). Klóšter benediktinkow w Burg Dinklage chce rjadniske sotry po cyłym swěće, kotrež buchu znjewužiwane abo wot cyrkwinskich institucijow křiwdźene, podpěrać. Tohodla su tam nětko „Institut za rjadniske prawo – wot žonow za žony“ załožili. „Chcemy z našimi benediktinskimi bratrami runohódne być“, praji abatisa Franziska Lukas. ­Institut nawjedujetej specialistce na polu cyrkwinskeho prawa, rjadniskej sotře ­Šolastika a Lydia.

Katedrala wobškodźena

Odessa/Kijew (B/SN). Wot spočatka ruskeje wójny w Ukrainje je 500 cyrkwinskich twarow wobškodźenych abo zničenych, hakle njedawno katedrala w Odessy. Tónle mišterski wukon křesćanskeje architektury pochadźa z kónca 18. lětstotka, bu 1936 wot Stalina zničeny a lěta 2002 po originalu znowa natwarjeny.

Dominikan prezident instituta